Bokin'Izaia

Toko faha-41

¹³ Fa izaho Iaveh Andriamanitrao, mitantana anao amin'ny tànana an-kavanana, milaza aminao hoe: Aza matahotra, izaho no tonga mamonjy anao.

¹⁴ Aza matahotra, ry kankana avy amin'i Jakoba, ry olom-bitsy sisa, tamin'Israely! fa izaho no tonga mamonjy anao - teny marin'ny Tompo - ary ilay Masin'Israely no mpanavotra anao.

¹⁵ Indro ataoko ambaramba maranitra hianao sady vao no marani-daniroa, hodiavinao ny tendrombohitra sy hotorotoroinao, ary hampanjarinao akofa ny havoana.

¹⁶ Hokororohinao izy, ka hopaohin'ny rivotra, sy haelin'ny ranonoram-baratra. Fa ianao kosa hientan-kafaliana amin'ny Tompo ary ilay Masin'Israely no hireharehanao.

¹⁷ Ireo ory sy mahantra, izay mitady rano fa tsy mahita, ka mainan'ny hetaheta ny lelany, dia izaho Iaveh no hihaino azy, izaho Andriamanitr'Israely tsy handao azy.

¹⁸ Hampiboiboika renirano, eo amin'ny tendrombohitra mangadihady aho, ary loharano eo afovoan'ny lohasaha; hovako ho farihy ny efitra; ary ho loharano miboiboika, ny tany karankaina.

¹⁹ Ny efitra hampaniriako sedra akasia, mirta sy oliva; hataoko indray maniry eo amin'ny tany lava volo ny sipresa, platana, ary boisy.

²⁰ Mba ho hitany sy fantany ary hodinihiny sy hiarahany mahalala, fa ny tànan'ny Tompo no nanao izany, ary ilay Masin'Israely no nahary izany.