Bokin'i Mikea
Toko faha-6
1 Mihainoa ary izay lazain'ny Tompo hianareo: - Mitsangàna hianao ary ataovy vita ny adinao eo anoloan'ny tendrombohitra, ary aoka ny havoana handre ny feonao!2 Mihainoa ny adin'ny Tompo hianareo, ry tendrombohitra, mbaminareo fanorenan'ny tany tsy azo ovana! Fa manan'ady amin'ny vahoakany Iaveh; ka handahatra manohitra an'Israely izy. -
3 Inona no nataoko taminao, ry vahoakako, inona no nampalahelovako anao? Valio ny teniko.
4 Fa nitondra anao niakatra avy any amin'ny tany Ejipta aho, ary nanavotra anao tamin'ny andro nahandevozana; ary naniraka teo anoloanao, an'i Moizy sy Aarona ary Maria.
6 Inona no hoentiko hanoloana an'ny Tompo sy hiankohoka eo anatrehan'ny Andriamanitry ny any ambony? Hanoloana azy mitondra sorona dorana va aho dia zanak'omby efa iray taona?
7 Hankasitrahan'ny Tompo va ny ondry arivoarivo, ny renirano diloilo alinalina? Hanolotra ny lahimatoako va aho, noho ny heloko, dia ny naloaky ny kiboko, noho ny fahotan'ny fanahiko?
8 Efa nampahalalaina anao, ry olombelona, izay tsara, sy izay ilain'ny Tompo aminao, dia ny hanao ny fahamarinana, ny ho tia famindram-po, ary ny hanaraka an'Andriamanitra amim-panetren-tena.