Evanjely Masin'i Jeso-kristy Nosoratan'i Md. Joany

       ¹ Nony afaka izany dia lasa nankany an-dafin'ny ranomasin'i Galilea, na ny farihin'i Tiberiady Jeso, ² ary vahoaka be no nanaraka azy, noho izy ireo nahita ny fahagagana nataony tamin'ny marary. ³ Dia niakatra tany an-tendrombohitra Jeso, ka nipetraka teo izy mbamin'ny mpianany. ⁴ Efa akaiky ny Paka andro lehibe tamin'ny Jody.
       ⁵ Nony nanopy ny masony Jeso, ka nahita ireto vahoaka be nanatona azy, dia hoy izy tamin'i Filipo: Aiza no hividianantsika mofo hohanin'ireo? ⁶ Fantany rahateo ny hataony, fa ny hitsapany azy no nilazany an'izany. ⁷ Dia hoy Filipo taminy: Na dia mofo-na denie roan-jato aza, tsy ampy hahazoan'izy ireo sombiny kely avy akory. ⁸ Ny anankiray tamin'ny mpianany koa, dia Andre rahalahin'i Simona Piera, nilaza taminy hoe: ⁹ Misy zazalahy anankiray manana mofo orja dimy sy hazandrano roa ao: fa ho ampy inona izany amin'ny olona maro be toy izao? ¹⁰ Dia hoy Jeso: Asaovy mipetraka ny olona. Ary nisy ahitra be teo, ka dia nipetraka ny olona, ary tokony ho dimy arivo no isan'ny lehilahy. ¹¹ Dia nandray ny mofo Jeso, ka nony efa nisaotra dia nizara azy tamin'izay nipetraka ary nomeny toy izany koa ny hazandrano sady nampanaranany fo. ¹² Rahefa voky izy ireo, dia hoy Jeso tamin'ny mpianany: Angony ny sombitsombiny sisa tsy lany, mba tsy hisy very. ¹³ Dia nangoniny, ka nahafeno sobiky roa ambin'ny folo ny sombitsombin'ny mofo dimy sisa tsy lanin'izay nihinana.
       ¹⁴ Nony nahita ny fahagagana nataon'i Jeso ireo olona ireo, dia nanao hoe: Ity tokoa no ilay Mpaminany ho avy amin'izao tontolo izao. ¹⁵ Dia fantatr'i Jeso fa ho avy haka azy an-keriny hatao mpanjaka izy ireo, ka lasa indray izy irery nankany an-tendrombohitra.
       ¹⁶ Nony hariva ny andro, nidina nankeny amoron-dranomasina ny mpianany, ¹⁷ dia niondrana tamin'ny sambo kely ka nita ny ranomasina ho any Kafarnaoma. Efa alina ny andro tamin'izay, nefa tsy mbola tonga teo aminy Jeso, ¹⁸ ary nanonja ny ranomasina, fa nifofofofo mafy ny rivotra. ¹⁹ Rahefa nivoy tokony ho dimy amby roa-polo na telo-polo stady izy ireo, dia nahita an'i Jeso nandeha teny ambony ranomasina sy nanatona ny sambo kely, ka natahotra. ²⁰ Fa hoy izy taminy: Izaho ihany, fa aza matahotra. ²¹ Dia naniry handray azy ho eo an-tsambo kely izy ireo, ka niaraka tamin'izay dia tafatody tamin'ny tany nokasainy haleha ny sambo.
       ²² Nony ampitso, tsaroan'ny vahoaka izay nijanona teny an-dafin'ny ranomasina fa tsy nisy afatsy sambo kely anankiray no teo, ary Jeso tsy niara-niondrana an-tsambo tamin'ny mpianany, fa ny mpianany ihany no nandeha; ²³ nefa nisy sambo kely hafa maro avy any Tiberiady tonga tao akaikin'ny tany nanomezan'ny Tompo mofo hohaniny rahefa nisaotra izy. ²⁴ Dia niondrana tamin'ireo sambo ireo izy nony nahita fa tsy teo Jeso na ny mpianany, ka nankany Kafarnaoma hitady an'i Jeso. ²⁵ Ary rahefa hitany teny an-dafin'ny ranomasina izy, dia nilazany hoe: Raby, oviana no tonga teto hianao?
       ²⁶ Dia namaly Jeso ka nanao taminy hoe: Lazaiko marina dia marina aminareo: Hianareo no mitady ahy dia tsy noho ny nahitanareo fahagagana, fa noho ny nihinananareo ny mofo ka voky. ²⁷ Miasà hianareo, tsy mba hahazo ny hanina mety ho levona, fa ny hanina maharitra ho amin'ny fiainana mandrakizay, dia izay homen'ny Zanak'olona anareo; fa izy no nasian'Andriamanitra Ray tombo-kase. ²⁸ Ary hoy izy ireo taminy: Inona àry no hataonay mba hiasanay ny asan'Andriamanitra? ²⁹ Namaly Jeso ka nanao tamin'izy ireo hoe: Izao no asan'Andriamanitra, dia ny hinoanareo ilay nirahiny. ³⁰ Fa hoy ireo taminy: Inona àry no fahagagana ataonao, mba ho hitanay ka hinoanay anao? Inona no asa ataonao? ³¹ Ny razantsika nihinana ny mana tany an'efitra araka ny voasoratra hoe: Mofo avy any an-danitra no nomeny azy hohaniny. ³² Dia hoy Jeso taminy: Lazaiko marina dia marina aminareo fa tsy Moizy no nanome anareo ny mofo avy any an-danitra, fa ny Raiko no manome anareo ny mofo avy any an-danitra izay tena izy tokoa; ³³ satria izay mofo midina avy any an-danitra sy manome ny fiainana an'izao tontolo izao no mofon'Andriamanitra. ³⁴ Ary hoy izy ireo taminy: Tompo ô, omeo anay mandrakariva izany mofo izany.
       ³⁵ Dia hoy Jeso taminy: Izaho no mofon'aina; izay manatona ahy tsy mba ho noana intsony, ary izay mino ahy tsy hangetaheta mandrakizay. ³⁶ Fa efa voalazako taminareo, fa nahita ahy hianareo, nefa tsy mino. ³⁷ Izay rehetra omen'ny Ray ahy no hanatona ahy, ary izay manatona ahy dia tsy horoahiko any ivelany, ³⁸ satria izaho no nidina avy any an-danitra dia tsy ny hanao ny sitra-poko, fa ny sitra-pon'izay naniraka ahy. ³⁹ Ary izao no sitra-pon'izay naniraka ahy, dia ny tsy hamelako hisy very izay rehetra nomeny ahy, fa ny mba hananganako azy amin'ny farandro. ⁴⁰ Satria izao no sitra-pon'ny Raiko izay naniraka ahy, dia ny mba hahazo ny fiainana mandrakizay izay rehetra mahita ny Zanaka ka mino azy, ary izaho hanangana azy amin'ny farandro.
       ⁴¹ Dia nimonomonona taminy ny Jody satria izy nanao hoe: Izaho no mofo velona izay nidina avy tany an-danitra. ⁴² Moa tsy Jeso zanak'i Josefa va ity, hoy izy ireo, izay fantatsika ny rainy aman-dreniny? Ka ahoana ary no anaovany hoe: Nidina avy any an-danitra aho? ⁴³ Fa namaly Jeso ka nanao taminy hoe: Aza mimonomonona hianareo. ⁴⁴ Tsy misy olona mahay manatona ahy akory raha tsy taomin'ny Ray izay naniraka ahy, ary izaho hanangana azy amin'ny farandro. ⁴⁵ Voasoratra ao amin'ny mpaminany hoe: Hampianarin'Andriamanitra izy rehetra. Koa izay rehetra nahare tamin'ny Ray ka nianatra taminy no manatona ahy. ⁴⁶ Tsy dia hoe nisy nahita ny Ray akory: fa ilay avy amin'Andriamanitra no hàny nahita ny Ray. ⁴⁷ Lazaiko marina dia marina aminareo: Izay mino ahy no manana ny fiainana mandrakizay.
       ⁴⁸ Izaho no mofon'aina. ⁴⁹ Ny razanareo nihinana ny mana tany an'efitra, nefa maty ihany; ⁵⁰ tsy toy izany ny mofo nidina avy any an-danitra, fa tsy ho faty izay mihinana azy. ⁵¹ Izaho no mofo velona izay nidina avy any an-danitra: ⁵² raha misy mihinana ity mofo ity dia ho velona mandrakizay izy, ary ny mofo izay homeko dia ny nofoko ho fiainan'izao tontolo izao. ⁵³ Dia nifanditra ny Jody nanao hoe: Hataon'ilay io ahoana àry no fanome antsika ny nofony hohanina? ⁵⁴ Fa hoy Jeso tamin'izy ireo: Lazaiko marina dia marina aminareo fa raha tsy mihinana ny nofon'ny Zanak'olona hianareo sy tsy misotro ny rany, dia tsy manana ny fiainana ao aminareo. ⁵⁵ Izay mihinana ny nofoko sy misotro ny rako no manana ny fiainana mandrakizay; ary izaho hanangana azy amin'ny farandro. ⁵⁶ Fa tena fihinana ny nofoko, ary tena fisotro ny rako. ⁵⁷ Izay mihinana ny nofoko sy misotro ny rako, dia mitoetra ao anatiko, ary izaho ao anatiny. ⁵⁸ Velona ny Ray naniraka ahy, izaho koa dia velona amin'ny Ray: toy izany koa no hahavelona amiko izay mihinana ahy. ⁵⁹ Izany àry no mofo nidina avy any an-danitra: tsy mba tahaka ny razanareo izay nihinana mana nefa maty ihany; fa izay mihinana ity mofo ity kosa dia ho velona mandrakizay.
       ⁶⁰ Izany no nolazainy raha nampianatra tao amin'ny sinagoga tany Kafarnaoma izy. ⁶¹ Betsaka tamin'ny mpianany nony nandre izany no nanao hoe: Sarotra izany teny izany, ka iza no mahahaino izany? ⁶² Ary fantatr'i Jeso tao am-pony fa nimonomonona tamin'izany ny mpianany, ka hoy izy taminy: Mahatafintohina anareo va izany? ⁶³ Hanao ahoana hianareo, raha mahita ny Zanak'olona miakatra any amin'izay toerany taloha. ⁶⁴ Ny Fanahy no mahavelona, ny nofo tsy mahasoa ohatr'inona akory; ny teny voalazako taminareo dia fanahy sy fiainana. ⁶⁵ Nefa misy tsy mino aminareo. Fa fantatr'i Jeso hatramin'ny voalohany, izay tsy hino sy izay hamadika azy. ⁶⁶ Ary hoy izy: Izany no nilazako taminareo fa tsy misy mahay manatona ahy raha tsy nomen'ny Ray azy izany. ⁶⁷ Hatramin'izay dia maro tamin'ny mpianany no nihemotra, ka tsy niaraka taminy intsony. ⁶⁸ Ka hoy Jeso tamin'ny roa ambin'ny folo lahy: Hianareo koa va mba te-hiala? ⁶⁹ Dia namaly Simona Piera ka nanao taminy hoe: Tompo ô, hankany amin'iza àry izahay? Hianao no manana ny tenin'ny fiainana mandrakizay; ⁷⁰ ary izahay efa nino sy nahalala fa hianao no ilay Masin'Andriamanitra. ⁷¹ Jeso namaly azy ireo hoe: Moa tsy izaho no nifidy anareo roa ambin'ny folo lahy? nefa demony ny iray aminareo. ⁷² Jodasy zanak'i Simona Iskariota no nantsoiny, fa io, izay isan'ny roa ambin'ny folo lahy, no hamadika azy.