Bokin'i Ezekiela

       ¹ Tonga tamiko ny tenin'Iaveh, nanao hoe: ² Ry zanak'olona, atodiho mankany amin'ny tendrombohitr'Israely ny tavanao, ka maminania ny hamelezana azy. Lazao hoe:
       ³ Ry tendrombohitr'Israely,
Mihainoa ny tenin'Iaveh Tompo.
Izao no lazain'Iaveh Tompo
amin'ny tendrombohitra aman-kavoana,
sy amin'ny hadin-driaka aman-dohasaha:
Indro aho hahatonga sabatra hamely anareo;
ary ny fitoerana avonareo horavako.
       ⁴ ny otelinareo ho voarava,
ny andrinareo ho an'ny masoandro, hotapahana;
ny lehilahinareo hataoko mitsingidina, voan'ny fahafatesana,
eo anoloan'ny sampinareo;
       ⁵ Ny fatin'ny zanak'Israely hataoko
eo anoloan'ny sampiny.
Ary ny taolanareo haeliko,
manodidina ny otelinareo.
       ⁶ Na aiza na aiza onenanareo,
ny tanàna ho lao,
ny fitoerana avo horavana;
mba ho rava sy lao koa ny otelinareo;
ho montsana sy levona ny sampinareo,
hazera ny andrinareo ho an'ny masoandro
ary ho fongotra ny asanareo.
       ⁷ Hiampatrampatra eo aminareo, ny maratra ho faty;
dia ho fantatrareo fa Iaveh aho.
       ⁸ Havelako hisy sisa ihany anefa aminareo;
dia izay afaka amin'ny sabatra, any amin'ny firenena,
rahefa haely any amin'ny tany samihafa.
       ⁹ Ka ireo afaka ireo dia hahatsiaro ahy eny amin'ny firenena,
izay hitondrako azy ho babo;
nony efa notorotoroiko ny fony mpisintaka
izay nivily niala tamiko,
sy ny masony mpisintaka
izay nitodika nankany amin'ny sampiny;
ka haharikoriko azy ny tenany,
noho ny ratsy nataony,
tamin'ny fahavetavetana rehetra vitany.
       ¹⁰ Dia ho fantany fa Iaveh aho,
ka tsy mba foana ny nilazako
fa hahatonga izany loza izany aminy aho.
       ¹¹ Izao no lazain'Iaveh Tompo:
Mitehafa tànana hianao
ary mitotoa tongotra, ka manaova hoe: Indrisy!
amin'ny fahavetavetana ratsy rehetra,
nataon'ny taranak'Israely,
izay efa ho levon'ny sabatra,
sy ny mosary ary ny pesta.
       ¹² Ny lavitra ho fatin'ny pesta;
ny akaiky ho lavon'ny sabatra;
izay sisa tavela voatahiry, ho fatin'ny hanoanana;
ka hampariko amin'izy ireo ny fahatezerako.
       ¹³ Dia ho fantatrareo fa Iaveh aho;
rahefa hiampantrampatra eny afovoan'ny sampiny ny maty amin'izy ireo
manodidina ny oteliny,
eny amin'ny havoana avo rehetra,
eny an-tampon-tendrombohitra rehetra;
eny ambanin'ny hazo maitso rehetra,
eny ambanin'ny oaka be ravina rehetra,
amin'ny fitoerana nanaterany emboka manitra mahafinaritra,
tamin'ny sampiny rehetra.
       ¹⁴ Haninji-tànana hamely azy ireo, aho,
ka hataoko lao sy simba ny taniny,
hatramin'ny efitra ka hatrany Diblah,
amin'izay rehetra onenany;
dia ho fantany fa Iaveh aho.