Ny Fanisana
Toko faha-5
1 Ary niteny tamin'i Moizy Iaveh ka nanao hoe:2 Asaovy avoaky ny zanak'Israely any ivelan'ny toby izay rehetra boka, na voan'ny fitsihana, na voaloton'ny faty. 3 Avoahy any ivelan'ny toby avokoa ireny, na lahy na vavy, mba tsy handoto ny tobiny, izay onenako eo afovoany. 4 Dia nataon'ny zanak'Israely izany, ka navoakany any ivelan'ny toby ireny: araka ny nandidian'ny Tompo an'i Moizy no nataon'ny zanak'Israely. 5 Niteny tamin'i Moizy Iaveh ka nanao hoe:
6 Lazao amin'ny zanak'Israely hoe: Raha misy lehilahy na vehivavy diso amin'ny Tompo manao fahotana isan'ireo mahafaty antoka ny namana, fa tsy manaraka an'ny Tompo, ka dia meloka izy, 7 dia tsy maintsy hiaiky ny fahotany, sy hamerina ny zavatra rehetra azony tsy an-drariny, tongoaviny ny fahadiminy, hatolony amin'izay olona nanaovany hadisoana. 8 Ary raha tsy manana solony io olona io, izay azo hamerenana ny zavatra azo tamim-pahotana, dia ho an'ny Tompo izany zavatra izany, ho an'ny mpisorona, miaraka amin'ny ondralahy fanonerana, izay hanaovana ny fanonerana ho an'ilay meloka. 9 An'ny mpisorona ny fanatitra rehetra avahana amin'ny zava-masina aterin'ny zanak'Israely amin'ny mpisorona; 10 azy avokoa ny zavatra atokan'ny olona rehetra na iza na iza. Izay omen'ny olona ho an'ny mpisorona dia ho azy.