Fitomanian'i Jeremia

       ¹ ALEPH
Izaho no ilay olona nahita ny fahoriana
tamin'ny tsora-kazon'ny fahatezerany.
       ² Nentiny sy nampandehaniny aho
tamin'ny aizina fa tsy tamin'ny mazava.
       ³ Izaho irery no asiany dia asian'
ny tànany mandritra ny andro.
       ⁴ BETH
Ny nofo aman-koditro, nataony korotika;
ny taolako notapatapahany.
       ⁵ Nanorina izay hamelezany ahy izy; notemerany
ny mangerokeroka sy mahasorisorena aho.
       ⁶ Nampitoeriny amin'ny maizina,
toy ny efa maty fahagola aho.
       ⁷ GHIMEL
Nohodidininy tamboho aho, tsy ho afa-mivoaka;
novesarany gadra vy.
       ⁸ Na mitaraina sy miangavy aza aho,
tampenany avokoa ny fidiran'ny fivavahako.
       ⁹ Notampenany vato voapaika ny làlako;
nakorokorony ny sakeli-dalako.
       ¹⁰ DALETH
Mova izy amiko tsy ny orsa manotrika
sy ny liona manotrika iny.
       ¹¹ Naviliny ny làlako, dia noviravirainy aho,
ka nataony fandao!
       ¹² Nanenjana ny tsipìkany izy; dia izaho no napetrany
hokendreny amin'ny zana-tsipìkany.
       ¹³ HE
Natanterany ny valahako ny zanaky
ny tranon-jana-tsipìkany;
       ¹⁴ efa fihomehezan'ny vahoakako rehetra aho,
ataony an-kira mandritra ny andro.
       ¹⁵ Novokisany zava-mangidy aho,
nobobohany absinta.
       ¹⁶ VAV
Nampikosohiny fasika ny nifiko;
nasitriny tao anaty lavenona aho.
       ¹⁷ Ny fanahiko voasintona mafy lavitra ny fahatokiana,
ny fifaliana efa hadinoko,
       ¹⁸ ka hoy aho: Very ny heriko,
mbamin'ny fanantenako an'Iaveh.
       ¹⁹ ZAIN
Tsarovinao ny fahoriako amam-pijaliako,
ny absinta aman'afero!
       ²⁰ Mahatsiaro izany mandrakariva ny fanahiko,
ka reraka ato anatiko izy.
       ²¹ Izao no hotsarovako ato anatin'ny foko,
ka dia izany no mba hanantenako.
       ²² HETH
Famindram-pon'Iaveh no tsy nahalany ritra antsika,
fa tsy lany ny famindram-pony.
       ²³ Mihavao isa-maraina izany;
lehibe ny fahamarinanao!
       ²⁴ Iaveh no anjarako, hoy ny fanahiko,
koa izy no hanantenako.
       ²⁵ TETH
Tsara fo Iaveh amin'izay manantena azy,
amin'ny fanahy mitady azy.
       ²⁶ Tsara ny miandry amim-pahanginana,
ny famonjen'Iaveh.
       ²⁷ Tsara ho an'ny olona ny mitondra ny jioga
hatramin' ny fahatanorany.
       ²⁸ YOD
Aoka hitoetra irery amim-pahanginana izy,
raha ampitondrain'Andriamanitra an'izany.
       ²⁹ Aoka hanohoka ny vavany amin'ny vovoka izy;
angamba misy hantenaina!
       ³⁰ Aoka hanolotra ny takolany amin'izay mamely azy izy;
aoka hivoky latsa izy!
       ³¹ KAPH
Satria ny Tompo tsy manary
mandrakizay;
       ³² fa raha mampahory izy, dia mangoraka,
araka ny famindram-pony lehibe ;
       ³³ Ary tsy satriny ny manetry,
na mampahory ny zanak'olombelona.
       ³⁴ LAMED
Raha hitsakitsahin'ny olona amin'ny tongony,
ny babo rehetra amin'ny tany;
       ³⁵ raha ny manana ny rariny no ampandeferin'ny olona,
eo anatrehan'ny Avo indrindra;
       ³⁶ raha misy mampidi-doza ny olona amin'ny adiny,
moa tsy ho hitan'ny Tompo va izany?
       ³⁷ MEM
Iza moa no niteny, dia tanteraka izany,
raha tsy efa voadidin'ny Tompo?
       ³⁸ Tsy avy amin'ny vavan'ny Avo Indrindra va no mivoaka
ny soa sy ny loza?
       ³⁹ Ka ahoana no itarainan'ny olombelona raha mbola velona izy?
Aoka ny fahotany avy no sampy hitarainany!
       ⁴⁰ NUN
Aoka isika samy handinika ny làlany sy hamantatra azy,
ka hiverina amin'Iaveh,
       ⁴¹ amin'Andriamanitra any an-danitra:
Asondroty ny fontsika mbamin'ny tanantsika.
       ⁴² Izahay dia efa nanota, efa niodina;
hianao tsy namela heloka.
       ⁴³ SAMECH
Nisarona ny fahatezeranao hianao, dia nenjehinao izahay,
novonoinao tsy nanananao antra:
       ⁴⁴ Nisarona rahona hianao,
tsy hisy hidiran'ny fivavahana.
       ⁴⁵ Nataonao fakofako amam-paikan-javatra
eo afovoan'ny firenena izahay.
       ⁴⁶ PHE
Misanasana vava aminay avokoa
ny fahavalonay rehetra;
       ⁴⁷ ny tahotra aman-davaka no anjaranay,
sy ny fandravana amam-pandringanana.
       ⁴⁸ Ranomaso mandriaka no mijononoka amin'ny masoko,
noho ny fandravana ny zanakavavin'ny vahoakako.
       ⁴⁹ AIN
Mitomany tsy mijanona ny masoko,
satria tsy misy hiainana,
       ⁵⁰ mandra-pitsinjony sy ijeren'
Iaveh any an-tampon'ny lanitra.
       ⁵¹ Mampidi-pahoriana amin'ny fanahiko ny masoko,
noho ny amin'ireto zanakavavin'ny tanànako rehetra.
       ⁵² TSADE
Manenjika ahy, hoatra ny fanenjika fody,
ireo mpankahala ahy tsy ahoana tsy ahoana.
       ⁵³ Nitady hamono ny aiko tao anatin'ny lavaka izy ireo,
dia efa nandatsaka vato hanindry ahy.
       ⁵⁴ Nisondrotra mihoatra ny lohako ny rano,
ka hoy aho: Maty aho!
       ⁵⁵ KOPH
Iaveh ô, niantso ny anaranao
tany anaty lavaka lalina aho.
       ⁵⁶ Renao ny feoko: Aza manentsin-tadìny,
amin'ny fisentoako, amin'ny fitarainako!
       ⁵⁷ Tamin'ny andro niantsoako anao, nanatona hianao,
dia nanao hoe: Aza matahotra!
       ⁵⁸ RESCH
Tompo ô, niandraikitra ny adiko hianao,
namonjy ny aiko.
       ⁵⁹ Hitanao, ry Iaveh, ny anaovany an-keriny amiko,
omeo ny rariny aho!
       ⁶⁰ Hitanao avokoa ny lolom-pony
sy ny fiokoan'izy rehetra hamely ahy.
       ⁶¹ SCHIN
Renao avokoa, ry Iaveh, ny latsa ataony,
ny fiokoan'izy rehetra hamely ahy,
       ⁶² ny resaky ny fahavaloko mbamin'ny fisainany
hamely ahy mandritra ny andro.
       ⁶³ Jereo, fa na mipetraka izy ireo na mitsangana,
dia izaho no ataony an-kira.
       ⁶⁴ Valio araka ny mendrika azy ireo izy, ry Iaveh ô!
araka ny asan'ny tànany,
       ⁶⁵ ataovy jamba ny fony;
atokano ho azy ny ozonao.
       ⁶⁶ Enjeho an-katezerana izy, ary fongory,
tsy ho ety ambanin'ny lanitr'Iaveh!