Fitomanian'i Jeremia

       ¹ ALEPH
Ahoana no nihamatroka ny volamena,
nihasimba ny volamena madio,
nieli-patrana ny vato voahasina,
eny an-joron-dalambe rehetra eny.
       ² BETH
Ireo zanakalahin'i Siona, miendrik'andriana indrindra,
voatombana an-danjam-bolamena madio,
ka ahoana no natao toy ny vilany tany,
asa-tànan'ny mpanefy vilany?
       ³ GHIMEL
Ny amboadia aza manolotra nono amin'ny zanany,
ka mampinono azy;
fa ny zanakavavin'ny vahoakako kosa nanjary masiaka,
hoatra ny ostritsa any an'efitra.
       ⁴ DALETH
Ny lelan'ny zaza minono tafaraikitra
amin'ny lanilaniny, azon'ny hetaheta;
mangataka hanina ny ankizy madinika,
nefa tsy nisy olona manome azy.
       ⁵ HE
Ireo nihinam-kanim-py fahizay,
dia midaboky ny hanoanana eny an-dalambe;
mandamaka eny amin'ny zezika
ireo nolanjaina mipetraka amin'ny jaky.
       ⁶ VAV
Fa ny heloky ny zanakavavin'ny vahoakako tafahoatra
noho ny fahotan'i Sodoma,
izay noravana indray mihelina monja,
nefa tsy nisy tanana niainga hamely azy.
       ⁷ ZAIN
Namirapiratra noho ny oram-panala ny mpanapaka azy,
fotsy noho ny ronono;
mena noho ny voahangy ny tenany;
vato safira ny tarehiny.
       ⁸ HETH
Ny tavany, mainty noho ny fahamaizinana,
ka tsy fantatra intsony izy eny an-dalambe,
ny hodiny, miraikitra amin'ny taolany,
maina tahaka ny hazo.
       ⁹ TETH
Sambatra ireo matin-tsabatra,
noho iretsy matin'ny hanoanana,
izay mihareraka tsikelikely, maratra,
noho ny tsy fisian'ny vokatry ny tany!
       ¹⁰ YOD
Nisy vehivavy mora mangoraka, nefa tànany
no nahandro ny zanany,
dia nataony hanina izany,
tamin'ny fandringanana ny zanakavavin'ny vahoakako.
       ¹¹ KAPH
Nanampatra hatramin'ny fara fahatezerany Iaveh,
nandefa ny fahatezerany mirehitra;
dia nandrehitra afo tao Siona izy,
ka levon'izany ny fanorenany.
       ¹² LAMED
Tsy mba nino ireo mpanjakan'ny tany,
na ny mponina rehetra tamin'izao tontolo izao,
fa ny mpandrafy, ny fahavalo dia ho tafiditra
ny vavahadin'i Jerosalema.
       ¹³ MEM
Izany no tonga dia noho ny fahotan'ny mpaminaniny,
sy ny heloky ny mpisorony,
izay nandatsaka tao anatin'ny mandany
ny ran'ny marina.
       ¹⁴ NUN
Niraparapa toy ny jamba teny an-dalambe izy ireo,
sady nihosin-dra,
hany ka tsy azo nokasihina akory
ny fitafiany.
       ¹⁵ SAMECH
Mitanilà! Maloto e! hoy ny antsoantson'ny olona, Mitanilà hianareo!
Mitanilà hianareo! Aza mikasika azy.
Nirenireny atsy sy arý, ka hoy ny olona any amin'ny firenena:
Aoka tsy hitoetra atý ireny!
       ¹⁶ PHE
Ny tavan'Iaveh vinitra nampihataka azy;
tsy mijery ireny intsony izy.
Ny mpisorona, tsy nasian'ny fahavalo hajany;
ny anti-panahy, tsy nananany antra.
       ¹⁷ AIN
Ary isika, nihavizaka ny masontsika,
mbola miandry izay vonjy foana;
eny an-tampon'ny tilikambontsika eny isika no nitsinjo,
izay firenena tsy hahavonjy antsika akory.
       ¹⁸ TSADE
Nitsikilo ny diantsika izy,
nisakana antsika tsy handeha eny amin'ny kianjantsika.
Manantomotra ny fiafarantsika, tapitra ny androntsika;
eny, efa tonga ny fiafarantsika!
       ¹⁹ KOPH
Izay nanenjika antsika dia faingam-pandeha,
noho ny voromahery eny an-danitra.
Notanahiny teny an-tendrombohitra isika;
nanaovany otrika tany an'efitra.
       ²⁰ RESCH
Ilay fofon'aintsika, ilay voahosotr'Iaveh,
voasambotra tao an-davak'izy ireo,
dia ilay nataontsika hoe: Eo ambanin'ny alokalony,
no ho velona any amin'ny firenena isika.
       ²¹ SCHIN
Mifalia sy miravoravoa, ry zanakavavin'i Edoma,
izay monina any amin'ny tanin'i Hosa!
Horosoana ny kapoaka koa hianao;
ka himamo dia hitanjaka.
       ²² THAV
Lasan'izay ny helokao, ry zanakavavin'i Siona,
tsy hanesi-tany anao intsony izy.
Mamangy ny helokao izy, ry zanakavavin'i Edoma,
asehony miharihary ny fahotanao.