Bokin'i Jodita

Toko faha-10

¹ Nony tapitra ny fivavahan'i Jodita tamin'ny Tompo, nitsangana avy teo amin'ilay fitoerany niankohofany tamin'ny tany teo anatrehan'ny Tompo izy.

² Niantso ny ankizivaviny izy, ka nidina tao an-tranony, dia nalany ny akanjony malailay, nesoriny ny fitafiam-pitondratena teny aminy. ³ Nandro izy, dia nihosotra ny mira manitra indrindra, nanao volo, nanodidina ny lamba fehiloha tamin'ny lohany; niakanjo ny akanjo fitondrany amin'ny fety, namehy kapa tamin'ny tongony, nitondra ny fehin-tànany, ny fehivozony, ny kaviny, ary ny perany, dia niraratra tamin'ny fihaingoana rehetra. ⁴ Notovonan'ny Tompo aza ny famirapirany, satria tsy mba hafalian'ny nofo fa ny hatsaram-panahy no fototry ny nanaovany an'izany haingo rehetra izany; ka noho izany nampitomboin'ny Tompo fatratra ny hatsaran-tarehiny ka tonga namirapiratra teo imason'ny olona rehetra, tamin'ny hakantoana tsy azo tahafina. ⁵ Rahefa izany, ny ankizivaviny nasainy nitondra divay iray siny hoditra, diloilo iray tavoara, lafarina voaendy, voankazo maina ary mofo sy fromazy, dia niainga izy. ⁶ Nony mby teo am-bavahadin'ny tanàna, izy sy ny ankizivaviny, dia indreo eo Oziasa mbamin'ny loholona, niandry azy.

⁷ Nony nahita azy izy, dia variana nitampim-bava noho ny hatsaran-tarehiny. ⁸ Tsy nanontany na inona na inona azy anefa izy ireo, fa namela azy handeha, nanao hoe: Andriamanitry ny razantsika anie hanome fahasoavana anao; hohamafisiny amin'ny fahefany anie ny hevitra voakasa rehetra izay ao am-ponao, ka hankalazaina noho ny aminao Jerosalema; ary hilahatra eo amin'ny an'ny olomasina sy marina ny anaranao. ⁹ Dia indray namaly tamin'ny feo iray, izay rehetra teo, nanao hoe: Ho tanteraka anie izay! Ho tanteraka anie izany! ¹⁰ Izay, vao nivoaka ny vahahady Jodita sy ny ankizivaviny sady nivavaka tamin'ny Tompo. ¹¹ Nony nidina ny tendrombohitra izy, tamin'ilay vaky masoandro iny, dia nifanehatra tamin'ny mandry tsy aman'afon'ny Asiriana, ka najanony nataony hoe: Avy aiza hianao, ary ho aiza?

¹² Hoy ny navaliny: Zanakavavin'ny Hebrio aho, ary nandositra avy any aminy satria fantatro fa hatolotra ho babonareo izy, noho izy naneso anareo sy tsy nety nitolo-tena an-tsitra-po taminareo, hahita fitia eo anatrehanareo. ¹³ Ka noho izany hoy aho anakampoko: Ndeha ho any anatrehan'ny andriandahy Holoferina aho, hanambara aminy ny ankaromiafin'ireto, sy hanoro azy ny fidirana hahazoany azy rehetra, tsy hisy hahafatesan'ny miaramilany, na dia iray aza. ¹⁴ Rahefa nandre ny teniny ireo olona ireo, dia nojereny ny tarehiny, ka variana teo ny masony, fa nahagaga azy loatra ity hatsaran-tarehiny tafahoatra. ¹⁵ Namonjy ny ainao hianao, hoy izy ireo taminy, amin'izao nanapahanao hevitra hankaty amin'ny tomponay izao. ¹⁶ Ary mahazo matoky hianao, fa horaisiny tsara rahefa miseho eo anatrehany, sady hahafinaritra ny fony indrindra hianao. Dia nentiny ho any an-dain'i Holoferina izy sy nambarany taminy. ¹⁷ Vao tafiditra teo anatrehany izy, dia voa tamin'ny masony niaraka tamin'izay Holoferina.

¹⁸ Hoy ireo manam-boninahiny taminy: Iza re no hahesoeso foana ny vahoaka Hebrio, izay tsara vehivavy toy itony? Tsy mendrika ho an'itony va ny hiadiantsika aminy, mba hananantsika an'itony? ¹⁹ Hitan'i Jodita Holoferina nipetraka tao an-dainy, tenona jaky amam-bolamena, voaravaka emeraoda sy vato sarobidy. ²⁰ Nafantony tamin'ny endriny ny masony, dia nihohoka tamin'ny tany nitsaoka azy izy, nefa natsangan'ireo mpanompon'i Holoferina niaraka tamin'izay, araka ny didin'ity tompony, izy.