Bokin'i Joely

Toko faha-4

¹² Aoka hitsangana ny firenena, ary aoka hiakatra izy ho eny amin'ny lohasahan'i Josafata! Fa any no hipetrahako hitsara ny firenena rehetra manodidina.

¹³ Raiso ny antsy fijinjana fa masaka ny vary; avia hanosihosy fa feno ny famiazam-boaloboka, mihoatra ny barika; satria be ny haratsian'izy ireo.

¹⁴ Vahoaka be, vahoaka be, ao amin'ny lohasahan'ny fanapahana!

¹⁵ Ny masoandro amam-bolana, nihamaizina, afaka amin'ny kintana ny famirapiratany.

¹⁶ Hierona avy ao Siona Iaveh, ary hampandre ny feony avy eo Jerosalema izy; hihorohoro ny tany aman-danitra. Nefa Iaveh no ho fialofana ho an'ny vahoakany, ho fiarovana ho an'ny zanak'Israely.

¹⁷ Dia ho fantatrareo fa Iaveh Andriamanitrareo aho, izay monina ao Siona, tendrombohitro masina; ho fitoerana masina, Jerosalema, ka tsy hodiavin'ny hafa firenena intsony.

¹⁸ Amin'izany andro izany dia hitete avy amin'ny tendrombohitra rehetra ny divay vaovao; ny havoana handriaka ronono; ary ny lohasahan-driaka any Jodà, hitsororohan'ny rano avokoa. Hisy loharano hivoaka avy ao an-tranon'ny Tompo, ka handena ny lohasahan'ny Akasià.

¹⁹ Ejipta kosa, hanjary tany lao, Edoma ho efitra faharavana, noho ny fahasiahana namelezany ny taranak'i Jodà, fa nandatsaka ny ra tsy manan-tsiny teo amin'ny taniny izy ireo.

²⁰ Ary Jodà, honenana mandrakizay, ary Jerosalema koa mandritra ny taona mifandimby.

²¹ Fa hosasako ny ran'izy ireo, izay mbola tsy voasasako. Dia honina ao Siona Iaveh.