Evanjely Masin'i Jesoa-kristy Nosoratan'i Md. Lioka

Toko faha-17

¹¹ Nony nandeha ho any Jerosalema Jesoa, dia nanara-tsisina an'i Samaria sy Galilea.

¹² Ary raha niditra tao amin'ny vohitra anankiray izy, dia nifanena tamin'ny boka folo lahy izay nijanona teny lavidavitra eny. ¹³ Dia niantso izy ireo ka nanao hoe: Ry Jesoa Mpampianatra ô! mamindrà fo aminay. ¹⁴ Vantany vao nahita azy ireo izy dia nanao hoe: Mandehana, misehoa amin'ny mpisorona; ka nony nandeha ho any izy ireo dia sitrana teny am-pandehanana. ¹⁵ Ary ny anankiray tamin'ireny, rahefa nahita fa sitrana izy, dia niverina ka nankalaza an'Andriamanitra tamin'ny feo mahery. ¹⁶ Niankohoka tamin'ny tongotr'i Jesoa izy, dia nisaotra azy; ary Samaritana izy io. ¹⁷ Dia niteny Jesoa ka nanao hoe: Moa tsy folo lahy va no nadio? Ka nankaiza àry ny sivy? ¹⁸ Ny vahiny indray ity no hàny niverina tamin'izy ireny mba hankalaza an'Andriamanitra? ¹⁹ Dia hoy izy taminy: Mitsangàna, ary mandehana, fa ny finoanao no nahavonjy anao.