Evanjely Masin'i Jesoa-kristy Nosoratan'i Md. Lioka

Toko faha-18

¹ Ary nanao fanoharana tamin'izy ireo koa izy, momba ny tsy maintsy ivavahana lalandava sy amim-paharetana.

² Hoy izy: Tany amin'ny tanàna anankiray nisy mpitsara anankiray tsy natahotra an'Andriamanitra sy tsy mena-maso olona. ³ Ary tao amin'izany tanàna izany koa, dia nisy mpitondratena anankiray nankao aminy matetika nanao hoe: Omeo rariny aho amin'ilay miady amiko; ⁴ fa tsy nanaiky na oviana na oviana izy. Kanjo tamin'ny farany dia hoy izy anankampo: Na dia tsy matahotra an'Andriamanitra aza aho sy tsy mena-maso olona, ⁵ dia manahirana ahy ity mpitondratena ity, ka homeko rariny izy mba tsy hiverimberina mandrakariva hanorisory ahy. ⁶ Ary henoy, hoy ny Tompo, izay lazain'ilay mpitsara tsy marina, ⁷ ka Andriamanitra indray va no tsy hanome rariny ny olom-pinidiny izay mitaraina aminy andro aman'alina, ary tsy halaky hamonjy azy? ⁸ Lazaiko aminareo fa homeny rariny haingana izy ireo. Kanefa rahefa tonga ny Zanak'olona, moa mba hahita finoana etý ambonin'ny tany izy? ⁹ Dia nanao ity fanoharana ity koa izy, mankamin'ny sasany natoky tena ho marina sy nanebaka ny namany:

¹⁰ Nisy roa lahy niakatra hivavaka tany an-tempoly: Farisiana ny iray ary poblikàna ny anankiray. ¹¹ Nitsangana ilay Farisiana ka nivavaka tao am-pony hoe: Andriamanitra ô, misaotra anao aho fa tsy mba tahaka ny olona hafa izay mpangalatra, tsy marina, mpijangajanga, na tahaka itsy poblikàna itsy akory aza; ¹² mifady hanina indroa isan-kerinandro aho, ary mandoa ny am-pahafolon'ny fananako rehetra. ¹³ Fa ilay poblikàna kosa nijanona eny lavidavitra eny sady tsy sahy niandrandra ny lanitra akory, fa nandona ny tratrany nanao hoe: Andriamanitra ô, mamindrà fo amiko, fa mpanota aho. ¹⁴ Lazaiko aminareo fa ity no nidina efa nohamarinina tany an-tranony, fa tsy ilay anankiray; fa izay rehetra manandra-tena no haetry, ary izay manetry tena no hasandratra. ¹⁵ Ary nisy koa olona nitondra zazakely ho eo aminy mba hametrahany tànana: fa nony nahita izany ny mpianatra dia niteny azy ireo.

¹⁶ Nefa nantsoin'i Jesoa hankeo aminy kosa ireo ka nataony hoe: Avelao hanatona ahy ny zazakely, ary aza sakanana izy, fa ny toa azy no hanana ny fanjakan'Andriamanitra. ¹⁷ Lazaiko marina aminareo, fa izay tsy handray ny fanjakan'Andriamanitra tahaka ny zazakely, dia tsy hiditra any akory. ¹⁸ Ary nisy lehibe anankiray nanontany azy hoe: Ry Mpampianatra tsara ô, inona no hataoko hahazahoako ny fiainana mandrakizay?

¹⁹ Dia hoy Jesoa taminy: Ahoana àry no iantsoanao ahy hoe: tsara? tsy misy tsara afa-tsy Andriamanitra irery. ²⁰ Fantatrao ny didy hoe: Aza mamono; aza mijangajanga; aza mangalatra; aza miampanga lainga; manajà ny rainao aman-dreninao. ²¹ Dia hoy izy: Efa nitandrina izany rehetra izany hatry ny fony kely aho. ²² Nony nandre izany Jesoa, dia nanao taminy hoe: Zavatra iray loha no tsy ampy aminao: amidio ny fanananao rehetra ka omeo ny mahantra, dia hanan-drakitra any an-danitra hianao, ary avia hanaraka ahy. ²³ Fa nony nandre izany teny izany izy, dia nanjonitra, satria mpanan-karen-doatra izy. ²⁴ Koa hoy Jesoa nony nahita azy nalahelo: Akory ity hasarotry ny hidiran'ny mpanan-karena amin'ny fanjakan'Andriamanitra!

²⁵ Fa moramora kokoa ny hidiran'ny rameva amin'ny vody fanjaitra noho ny hidiran'ny mpanan-karena amin'ny fanjakan'Andriamanitra. ²⁶ Dia hoy izay nihaino hoe: Iza àry no ho voavonjy? ²⁷ Ka hoy ny navaliny: Izay tsy azon'ny olona atao, dia azon'Andriamanitra atao. ²⁸ Ary hoy Piera: Indro izahay efa nandao ny zavatra rehetra ka nanaraka anao. ²⁹ Dia hoy Jesoa taminy: Lazaiko marina aminareo fa na iza na iza handao ny tranony, na ny havany, na ny rahalahiny, na ny vadiny, na ny zanany noho ny fanjakan'Andriamanitra, ³⁰ dia sady hahazo bebe kokoa amin'izao fiainana izao, no hanana ny fiainana mandrakizay any aoriana. ³¹ Nony inona dia nalain'i Jesoa manokana ny roa ambin'ny folo lahy ka nilazany hoe: Indro miakatra ho any Jerosalema isika, ka ho tanteraka izay rehetra nosoratan'ny mpaminany ny amin'ny Zanak'olona:

³² fa hatolotra amin'ny jentily izy ka hoesoina, holatsaina, hororàna, ³³ ary rahefa voakapoka dia hovonoina, fa hitsangana amin'ny maty amin'ny andro fahatelo. ³⁴ Tsy nisy azon'izy ireo anefa izany, fa teny miafina ho azy ka tsy fantany akory izay heviny. ³⁵ Nony mby tao akaikin'i Jerikao izy, dia nisy kosa jamba anankiray nipetraka nangataka teo amoron-dàlana.

³⁶ Ary nony nandre ny vahoaka nandalo izy dia nanontany hoe inona izany? ³⁷ ka nilazana fa Jesoa avy any Nazareta no nandalo. ³⁸ Dia niantso izy nanao hoe: Ry Jesoa Zanak'i Davida ô! mamindrà fo amiko. ³⁹ Noraran'izay teo aloha izy mba hangina, fa vao mainka niantso mafimafy kokoa nanao hoe: Ry Zanak'i Davida ô! mamindrà fo amiko e! ⁴⁰ Dia nijanona Jesoa, ka nasainy hoentina mankeo aminy izy. Ary nony tonga teo akaikiny dia nanontaniany hoe: ⁴¹ Inona no tianao hataoko aminao? Ary hoy izy: Mba hahiratra aho, Tompoko. ⁴² Dia hoy Jesoa taminy: Mahiràta, ny finoanao no nahavonjy anao. ⁴³ Niaraka tamin'izay, dia nahiratra izy ka nanaraka azy sy nankalaza an'Andriamanitra. Ary ny vahoaka rehetra nahita izany koa nidera an'Andriamanitra.