Evanjely Masin'i Jesoa-kristy Nosoratan'i Md. Lioka

Toko faha-20

¹ Ary indray andro tamin'izany, nampianatra ny vahoaka tao an-tempoly izy ka nitory ny Evanjely, dia tonga ny lehiben'ny mpisorona sy mpanora-dalàna mbamin'ny loholona,

² ka nanao taminy hoe: Lazao anay: Inona moa no fahefana anaovanao izao zavatra izao, ary iza no nanome anao izany fahefana izany? ³ Ary namaly Jesoa ka nanao tamin'izy ireo hoe: Mba hanontany zavatra anankiray aminareo koa àry aho ka valio: ⁴ Avy aiza moa ny batemin'i Joany, avy amin'Andriamanitra sa avy amin'ny olona? ⁵ Dia niara-nisaina izy ireo nanao hoe: Raha izao mantsy no lazaintsika hoe, avy amin'Andriamanitra, dia hovaliany hoe: nahoana àry hianareo no tsy nino azy? ⁶ Ary raha hataontsika hoe, avy amin'ny olona indray, dia hitora-bato antsika ny vahoaka, satria inoany ho mpaminany Joany. ⁷ Koa namaly izy ireo, fa tsy fantany izay nihaviany. ⁸ Dia hoy Jesoa taminy: Izaho koa tsy hilaza aminareo izay fahefana anaovako izao zavatra izao. ⁹ Dia nilaza ity fanoharana ity tamin'ny vahoaka izy nanao hoe: Nisy lehilahy anankiray namboly tanimboaloboka ka nahofany tamin'ny mpiasa, dia lasa izy ka nitoetra ela tany an-tany hafa.

¹⁰ Nony tonga ny taom-pahavokarana dia naniraka mpanompo anankiray tany amin'ny mpiasa izy, mba haka amin'ny vokatry ny tanimboalobony; nefa nokapohin'izy ireo sy nampodiny maina. ¹¹ Dia naniraka mpanompo anankiray hafa indray izy, fa nokapohin'ireo ihany koa sady notevatevainy sy nampodiny maina. ¹² Ary naniraka fanintelony izy, fa io koa sady nataony naratra no noroahiny. ¹³ Ka hoy ny tompon'ny tanimboaloboka: Inona re no hataoko? ndeha hirahiko lahy ny zanako malalako, fa angamba hanaja azy izy ireo raha mahita azy. ¹⁴ Kanjo nony nahita iny ny mpiasa dia nanao anakampo hoe: Ity ny mpandova ka ndeha hovonointsika, dia ho antsika ny lova. ¹⁵ Dia noroahiny ho any ivelan'ny tanimboaloboka izy ka novonoiny. Inona àry no hataon'ny tompon-tanimboaloboka amin'izy ireo? ¹⁶ Ho avy izy ka handringana ireo mpiasa ireo, ary ny tanimboaloboka dia hafindrany amin'olon-kafa. Nony nandre izany ry zareo teo, dia nanao hoe: Sanatria izany! ¹⁷ Fa nibanjina azy ireo Jesoa ka nanao hoe: Inona àry ity voasoratra ity: Ny vato nolavin'ny mpanao trano no efa tonga vato fehizoro? ¹⁸ Izay rehetra lavo amin'izany vato izany dia ho torotoro, ary izay hianjerany dia ho mongomongo. ¹⁹ Dia notadiavin'ny lehiben'ny mpisorona sy ny mpanora-dalàna hosamborina teo no ho eo ihany izy, satria fantany fa izy ireo ihany no nanaovan'i Jesoa izany fanoharana izany; saingy ny tahony ny vahoaka no nampiato azy indray. ²⁰ Koa dia nataony andri-maso izy sy nanirahany mpitsikilo, izay nody ho marina, mba haningotra azy amin'ny teniny, hanolorany azy eo ampelatànan'ny governora.

²¹ Ary toy izao no fanontanian'ireo olona ireo azy: Ry Mpampianatra ô, fantatray fa miteny sy mampianatra araka ny hitsiny hianao ka tsy mizaha tavan'olona, fa mampianatra ny làlan'Andriamanitra araka ny marina: ²² mety va raha mandoa hetra ho an'i Sezara izahay sa tsia? ²³ Fa fantatr'i Jesoa ny hafetsen-dratsin'izy ireo, ka hoy izy taminy: Nahoana no maka fanahy ahy hianareo? ²⁴ Asehoy ahy ny vola denie. Sarin'iza sy anaran'iza ity? An'i Sezara, hoy iretsy. ²⁵ Dia hoy izy taminy: Aloavy ho an'i Sezara àry izay an'i Sezara, ary ho an'Andriamanitra izay an'Andriamanitra. ²⁶ Gaga foana ry zareo tamin'ny valin-teniny ka kepoka nangina terý, fa tsy nahita teny iray akory haniniany azy teo imason'ny vahoaka teo. ²⁷ Dia nanatona koa ny sasany tamin'ny Sadoseana izay mandà ny fitsanganan'ny maty, ka nanontany azy hoe:

²⁸ Ry Mpampianatra ô, Moizy nanome lalàna ho antsika hoe: Raha misy lehilahy manambady ka maty momba, dia aoka ny rahalahiny hampakatra ny vadiny mba hiteraka hamelo-maso ny rahalahiny. ²⁹ Koa nisy olona fito mirahalahy, ary nanambady ny zokiny, fa maty momba. ³⁰ Dia nanambady an-dravehivavy ny faharoa, fa maty momba koa. ³¹ Nanaraka izany dia nanambady azy indray ny fahatelo, ary nanao toy izany avokoa izy fito mirahalahy, fa maty momba daholo. ³² Farany, dia maty koa ravehivavy. ³³ Koa ho vadin'iza ravehivavy raha mby amin'ny fitsanganan'ny maty? fa efa samy nanambady azy avokoa izy fito lahy? ³⁴ Dia hoy Jesoa taminy: Ny zanak'izao fiainana izao no mampaka-bady sy avoaka hampakarina; ³⁵ fa izay efa hita ho mendrika hahazo ny fiainana ho avy sy ny fitsanganana amin'ny maty kosa, dia tsy mba mampaka-bady, na avoaka hampakarina, ³⁶ ary tsy mety maty intsony izy, fa tahaka ny anjely sady zanak'Andriamanitra, satria zanaky ny fitsanganana amin'ny maty. ³⁷ Ary raha ny hoe hitsangana ny maty, dia zavatra efa nambaran'i Moizy teo amin'ilay nilazany ny Voaroy izany, fa tamin'io izy dia niantso ny Tompo hoe: Andriamanitr'i Abrahama sy Andriamanitr'Isaaka ary Andriamanitr'i Jakoba. ³⁸ Koa velona eo anatrehany izy rehetra ireo, satria tsy mba Andriamanitry ny maty izy, fa an'ny velona. ³⁹ Dia namaly ny sasany tamin'ny mpanora-dalàna ka nanao taminy hoe: Ry Mpampianatra ô, marina ny filazanao. ⁴⁰ Ary tsy nisy sahy nanontany azy intsony izy ireo. ⁴¹ Dia hoy Jesoa taminy: Ahoana no iantsoana ny Kristy hoe zanak'i Davida,

⁴² nefa Davida ihany no milaza ao amin'ny bokin'ny Salamo hoe: Ny Tompo nilaza tamin'ny Tompoko hoe: Mipetraha eo an-tànako an-kavanana, ⁴³ ambara-panaoko ny fahavalonao ho fitoeran-tongotrao? ⁴⁴ Antsoin'i Davida hoe Tompo izy, ka ahoana no maha-zanany azy? ⁴⁵ Mbola mihaino azy eo ny vahoaka rehetra dia hoy izy tamin'ny mpianany:

⁴⁶ Tandremo ny mpanora-dalàna, izay finaritra mitsangantsangana amin'ny akanjo rebareba, te-ho arahabaina eny amin'ny kianja, tia ny fipetrahana voalohany amin'ny fanasana, ⁴⁷ fa mifetsy ny fananan'ny mpitondratena amin'ny fivavahana lavareny ataony mba ho fieboana fotsiny, ka hohelohina mafimafy kokoa izy.