Evanjely Masin'i Jesoa-kristy Nosoratan'i Md. Matio

Toko faha-14

¹³ Nony nandre izany Jesoa, dia niala teo ka niondrana an-tsambo kely mba hitokana samy irery any an'efitra; fa rahefa nahare izany ny vahoaka, dia niainga avy amin'ny tanàna samihafa ka nandeha an-tongotra nanaraka azy.

¹⁴ Rahefa niala tao an-tsambo izy, dia nangoraka nahita ireto vahoaka betsaka, ka nositraniny ny marary teo aminy. ¹⁵ Ary nony hariva ny andro, dia nanatona azy ny mpianany nanao hoe: Tany efitra ity, ary efa hariva ny andro; koa ravao ny vahoaka handeha hividy hanina eny amin'ny vohitra. ¹⁶ Fa hoy Jesoa taminy: Tsy tokony handeha izy, fa omeo hanina. ¹⁷ Dia hoy ireo taminy: Tsy misy afa-tsy mofo dimy sy hazandrano roa atý aminay. ¹⁸ Ento atý amiko izany, hoy izy taminy. ¹⁹ Dia nasainy nipetraka tamin'ny ahitra ny vahoaka, ary noraisiny ny mofo dimy sy ny hazandrano roa, dia niandrandra ny lanitra izy ka nitso-drano; ary nony efa novakiny ny mofo dia nomeny ny mpianany, ka nozarain'ny mpianany tamin'ny vahoaka. ²⁰ Dia nihinana izy rehetra ka voky, ary nangonina ny sombintsombiny sisa tsy lany ka nahafeno sobika roa ambin'ny folo. ²¹ Nefa dimy arivo lahy no isan'ny nihinana afa-tsy ny zaza amam-behivavy.