Bokin'i Mikea

       ¹ Tenin'Iaveh natao tamin'i Mikea avy ao Moreseta, tamin'ny andro nanjakan'i Joatana sy Akaza ary Ezekiasa, mpanjakan'i Jodà, izay nahazoany fahitana momba an'i Samaria sy Jerosalema.
       ² Mihainoa hianareo, ry firenena rehetra!
Mandrenesa tsara, ry tany, mbamin'izay rehetra monina eo aminao!
Efa hitsangan-ko vavolombelona hiampanga anareo ny Tompo Iaveh,
dia ny Tompo avy ao amin'ny lapan'ny fahamasinany!
       ³ Fa indro Iaveh efa hivoaka avy ao amin'ny fonenany;
hidina izy handia ny havoana amin'ny tany.
       ⁴ Ny tendrombohitra hitsonika eo ambanin'ny diany,
ny lohasaha hitresaka
toy ny savoka eo anoloan'ny afo,
toy ny rano voarotsaka amin'ny tany misolampy.
       ⁵ Ny hisian'izany dia noho ny helok'i Jakoba
sy noho ny fahotan'ny taranak'Israely.
Inona no helok'i Jakoba?
Tsy Samaria va?
Ary iza no fitoerana avon'i Jodà?
Tsy Jerosalema va?
       ⁶ Koa Samaria dia hataoko antontam-bato any an-tsaha,
tany fambolena voaloboka;
hakodiako ho any an-dohasaha ny vatony,
ary hampihanjahanjaiko ny fanorenany.
       ⁷ Hotorotoroina ny sariolona rehetra ao aminy;
ho levon'ny afo ny tambiny rehetra;
hataoko faharavan-javatra avokoa ny sampiny
fa tangim-pijangajangana no nanangonany an'ireny,
ka hody ho tangim-pijangajangana indray koa ireny.
       ⁸ Noho izany aho dia hitomany sy hidradradradra,
handeha tsy mitafy sy miboridana;
handefa finaonaonana toy ny amboadia,
ary fitarainana toy ny ostritsa.
       ⁹ Fa fery mahafaty ny azy,
fa tonga hatrany amin'i Jodà,
tonga hatreo ambavahadin'ny vahoakako
dia hatrany Jerosalema.
       ¹⁰ Aza ambaranareo any Geta izany;
aza mitomany any Akao hianareo!
Mihosinkosina amin'ny vovoka any Beta-Afra aho.
       ¹¹ Mandalova mitanjaka amin-kenatra, ry kala mponina ao Safira!
Tsy mivoaka ikala mponina ao Tsoanàna;
ny fisaonan'ny ao Beta-Hatsely no tsy ahazoanareo mialoka eo.
       ¹² Ory ikala mponina ao Maroty, noho ny amin'ny fananany;
fa nidina avy tany amin'Iaveh ny loza,
ho eo ambavahadin'i Jerosalema.
       ¹³ Afehezo amin'ny kalesa ny soavaly, ry kala mponina ao Lakisa;
fiandohan'ny fahotana ho an'ny zanakavavin'i Siona,
no nahitana ny helok'Israely ao aminao.
       ¹⁴ Noho izany hianao hamoy ny anananao an'i Moreseta ao Geta;
ny trano ao Akziba dia ho fanodokana ho an'ny mpanjakan'Israely.
       ¹⁵ Hitondrako mpandresy hianao, ry kala mponina ao Maresà;
ho lasana hatrany Odollama ny tabihan'Israely.
       ¹⁶ Ongoty ny volonao, kakaso izy,
noho ny amin'ireo zanakao malalanao;
ataovy tonga sola toy ny papango sola ny lohanao
fa lasan-ko babo lavitra anao ireny.