Bokin'ny Ohabolana

       ¹ Tenin'i Lamoela mpanjaka. Oha-teny nampianaran-dreniny azy.
       ² Inona no ho lazaiko aminao, anaka? Inona no holazaiko, ry zanako nateraky ny kiboko?
Inona no holazaiko aminao, anaka, hianao izay nalehan'ny faniriako!
       ³ Aza atolotrao ny vehivavy ny herinao;
na ny lalanao an'ireo vehivavy mamery mpanjaka.
       ⁴ Tsy mba an'ny mpanjaka, ry Lamoela,
tsy mba an'ny mpanjaka ny misotro divay,
na an'ny mpanapaka ny mitady toaka;
       ⁵ fandrao manadino ny lalana izy, raha misotro;
ka mamily ny rariny ananan'ny mahantra rehetra.
       ⁶ Fa ny efa ho faty no omeo toaka,
ary ny efa vontom-pahoriana ny fanahiny no omeo divay;
       ⁷ aoka hisotro izy, ka hanadino ny fahoriany
ary tsy hahatsiaro ny manjo azy intsony.
       ⁸ Sokafy ny vavanao hanasoavana ny moana,
sy hanohanana ny resy tondro maso rehetra manana ady.
       ⁹ Sokafy ny vavanao, mamoaha fitsarana marina,
ary omeo rariny ny ory sy ny mahantra.

(Ny vehivavy mahery fo.)
       ¹⁰ ALEPH
Iza no mba mety mahita vehivavy mahery fo?
mihoatra lavitra noho ny an'ny voahangy, ny tombany.
       ¹¹ BETH
Matoky azy, ny fon'ny lahy,
ary tsy mba handao azy ny tombony miditra.
       ¹² GHIMEL
Soa no ataony aminy, fa tsy mba ratsy;
amin'ny andro rehetra iainany.
       ¹³ DALETH
Mamory ny volon'ondry aman-drongony izy,
dia miasa an-kafaliana, amin'ny tanany.
       ¹⁴ HE
Manahaka ny sambon'ny mpandranto izy,
mitondra ny haniny, avy lavitra.
       ¹⁵ VAV
Mifoha mbola alina izy,
dia manome hanina ny ankohonany,
sy lahasa ho an'ny ankizivaviny.
       ¹⁶ ZAIN
Mandinika saha izy, dia mividy azy,
ary mamboly tanimboaloboka amin'izay efa azon'ny tànany.
       ¹⁷ HETH
Sikinany hery ny valahany,
ary hatanjahiny ny sandriny.
       ¹⁸ TETH
Tsaroany mamy ny tombony efa azony,
tsy maty jiro izy mandritra ny alina.
       ¹⁹ YOD
Mandray ny fihazonam-bohavoha ny tanany;
ary mihazona ny ampela ny rantsan-tanany.
       ²⁰ KAPH
Manatso-tanana amin'ny ory izy;
ary mamela-tanana amin'ny mahantra.
       ²¹ LAMED
Tsy atahorany fanala ny akohonany,
fa voatafy lamba mena antitra avokoa izy ao an-tranony.
       ²² MEM
Manao firakotra ho azy izy,
manam-pitafiana rongony fotsy madinika sy jaky izy.
       ²³ NUN
Fantatra tsara ny lahy eo am-bavahady,
raha mipetraka hitsara miaraka amin'ny loholona.
       ²⁴ SAMECH
Manao akanjo lobaka izy, hamidiny;
ary mivarotra fehikibo amin'ny mpandrato.
       ²⁵ AIN
Ny hery sy ny hasoavana no firavaka eny aminy,
ary ny andro ho avy ihomehezany.
       ²⁶ PHE
Amim-pahendrena no isokafan'ny vavany,
ary teny soa no eo amin'ny lelany.
       ²⁷ TSADE
Mitandrina ny alehan'ny ankohonany izy;
ary tsy mba mihinana mofom-pahakamoana.
       ²⁸ KOPH
Ny zanany lahy mitsangana ka milaza azy hoe sambatra;
ny vadiny koa mitsangana manome fankalazana azy.
       ²⁹ RESCH
Maro ny zazavavy miseho ho tsara fanahy,
fa hianao kosa anefa dia tafahoatra azy rehetra.
       ³⁰ SCHIN
Fitaka ny bika soa, zava-poana ny hatsaran-tarehy;
fa ny vehivavy matahotra an'Iaveh ihany no hoderaina.
       ³¹ THAV
Aoka ny vokatra avy amin'ny tanany homena azy;
ary aoka hitory fiderana eo am-bavahady ny asany.