Bokin'i Osea

       ¹ Mandrenesa izao, ry mpisorona;
mihainoa tsara, ry taranak'Israely;
manongilàna sofina, ry taranaky ny mpanjaka;
fa hianareo no hamoahana ny teny fitsarana,
satria hianareo no efa fandrika tao Masfà
sy fandrika harato voavelatra ao ambonin'i Tabora.
       ² Nataon'izy ireo mihoa-pampana ny fahadisoany, tamin'ny sorona nataony;
fa ho famaizana anareo rehetra kosa aho!
       ³ Mahalala an'i Efraima aho
ary tsy takon'amiko Israely;
ary hianao, ry Efraima, nijangajanga,
ary Israely nandoto tena.
       ⁴ Tsy avelan'ny asa nataony
hiverina amin'Andriamanitra izy ireo,
fa saim-pijangajangana no eo afovoany,
ka tsy mahalala an'Iaveh izy.
       ⁵ Ny avonavon'Israely no vavolombelona manameloka azy;
ho lavon'ny helony, Israely sy Efraima;
hiara-davo amin'ireo koa Jodà.
       ⁶ Hitondra ny ombiny aman'ondriny izy ireo,
handeha hitady an'Iaveh,
nefa tsy hahita azy, fa nisaraka tamin'ireo izy.
       ⁷ Namitaka an'Iaveh izy ireo,
fa niteraka zaza hafa firenena;
ary ankehitriny ho levon'ny volana ambony izy
mbamin'ny ananany.
       ⁸ Tsofy ao Gabaà ny anjomara;
ary ao Ramà ny trompetra;
miantsoa vonjy taitra ao Betavena!
Mitandrema hianao, ry Benjamina!
       ⁹ Horavana Efraima amin'ny andro famaizana;
ny amin'ny hanjo ny fokon'Israely
zava-tsy maintsy to no ambarako.
       ¹⁰ Ireo mpanapaka an'i Jodà
efa toy ny mpamindra faritany;
hampidiniko amin'izy ireo
ny fahatezerako toy ny rano.
       ¹¹ Ampahorina sy torotoroin'ny fitsarana Efraima
satria ninia nanaraka ny sampy tsinontsinona izy.
       ¹² Koa tahaka ny kalalao aho amin'i Efraima,
ary tahaka ny fahalovana amin'ny taranak'i Jodà.
       ¹³ Rahefa nahita ny aretiny Efraima,
ary Jodà ny ratrany,
dia nankany amin'i Asora Efraima
ary naniraka ho any amin'ny mpanjaka anankiray izy, hamaly ny ratsy natao taminy;
tsy ho afa-manasitrana anareo anefa izany mpanjaka izany
ka tsy ho afaka aminareo ny ferinareo.
       ¹⁴ Fa ho tahaka ny liona aho, amin'i Efraima,
ary ho tahaka ny liona tanora amin'ny taranak'i Jodà.
Izaho dia izaho no hamiravira, dia lasa mandeha;
hitondra ny rembiko, ka tsy hisy haharombaka izany amiko.
       ¹⁵ Handeha aho hody any amin'ny fonenako,
mandra-pihaikiny ny maha-meloka azy,
ka hitadiavany ny tavako.
Fa hitady ahy izy ireo, rahefa azom-pahoriana.