Bokin'i Osea

       ¹ Aza miarana amin'ny fifaliana, ry Israely,
na amin'ny firavoravoana toy ny firenena.
Fa hianao, efa nitolo-tena amin'ny ratsy lavitra ny Andriamanitrao,
efa nankamamy ny tangin'ny mpijangajanga,
teny am-pamoloana rehetra teny.
       ² Ny famoloana amam-pandomam-boaloboka, tsy hisy hamelona azy ireo,
ary ny divay vaovao handà azy.
       ³ Tsy honina eo amin'ny tanin'Iaveh izy ireo;
fa hiverina ho any Ejipta Efraima,
ary hihinana ny zava-padina any Asiria izy ireo.
       ⁴ Tsy hanolotra divay ho fanatitra araraka ho an'Iaveh izy:
ary tsy hankasitrahany ny sorona ataony;
fa ho toy ny fahan-kanina fisaonana izany aminy,
ka haloto izay mihinana amin'izany;
satria ny hanin'izy ireo ho an'ny tenany ihany,
fa tsy hiditra ao an-tranon'Iaveh.
       ⁵ Inona no hataonareo amin'ny fety lehibe,
amin'ny andro fetin'Iaveh?
       ⁶ Fa indro lasa izy ireo teo anatrehan'ny fandringanana:
i Ejipta handray azy, ary Memfisy handevina azy;
ny fanaka volafotsiny sarobidy, ho rembin'ny beroberokamboa
ny lainy ho tongan'ny tsilo.
       ⁷ Tonga ny andro famaizana!
Tonga ny andro fanodiavana;
vetivety ho fantatr'Israely izany.
Adala ny mpaminany,
ny olona tsindriam-panahy mirediredy foana,
noho ny haben'ny helokao
sy ny fanoheranao mafy.
       ⁸ Ny tilin'i Efraima dia ao amin'Andriamanitro;
fandriky ny mpamandri-borona avokoa, no eny amin'ny alehan'ny mpaminany,
ary fanenjehana no any amin'ny tranon'Andriamaniny.
       ⁹ Simba hatrany am-potony izy ireo,
toy ny tamin'ny andron'i Gabaa;
hotsarovan'Iaveh ny helony,
ary hovaliany ny fahotany.
       ¹⁰ Tahaka ny voaloboka any an'efitra
no nahitako an'Israely;
tahaka ny voaloham-bokatry ny aviavy tanora
no nahitako ny razanareo.
Kanjo tonga tao Beelfegora izy ireo,
sy nanolo-tena ho an'ny sampy vetaveta,
ka tonga vetaveta tahaka itsy zava-tiany ihany.
       ¹¹ Nihelina toy ny voromanidina, ny voninahitr'i Efraima;
tsy hisy intsony ny hiteraka na hanan'anaka, na ho torontoronina.
       ¹² Na hitaiza ny zanany aza izy,
hesoriko aminy alohan'ny hahatongavany ho lehilahy ireny;
satria loza ho azy ireo, raha ihatahako izy!
       ¹³ Raha nitodi-maso nankany Tira aho, dia indreo Efraima
voavoly eo amin'ny tanim-bilona mahafinaritra;
kanjo Efraima efa nitondra ny zanany ho any amin'ny mpamono.
       ¹⁴ Omeo azy Iaveh ô!... Inona no homenao azy?...
Omeo azy ny kibo momba,
sy ny nono ritra.
       ¹⁵ Any Galgala ny faharatsiany rehetra;
fa tany no vao nankahalako azy.
Noho ny faharatsian'ny ataony,
horoahiko hiala ao an-tranoko izy;
tsy hanam-pitiavana azy intsony aho,
mpiodina avokoa ny mpanapaka izy.
       ¹⁶ Voa Efraima,
maina ny fakany,
tsy hamoa intsony izy ireo;
ary na dia miteraka aza izy,
hovonoiko ny malalany naloaky ny kibony.
       ¹⁷ Harian'ny Andriamantro izy,
satria tsy nihaino azy,
ka ho mpirenireny foana eny amin'ny firenena.