Ny Salamo

       ¹ Nataon'i Davida. Fisaintsainana masina.
Sambatra izay voaesotra ny helony,
sy voavela ny fahotany.
       ² Sambatra ny olona tsy tànan'ny Tompo heloka,
izay tsy misy fitaka ny fanahiny.
       ³ Raha mbola nangina aho, nihalany ny taolako rehetra,
tamin'ny fitolokoko isan'andro.
       ⁴ Fa nanindry ahy, andro aman'alina, ny tànanao;
nihamaina ny herin'ny aiko tamin'ny hainandro lohataona. - Selà.
       ⁵ Nambarako taminao ny fahotako, tsy mba nafeniko ny heloko.
Hoy aho: Hiaiky ny fahadisoako amin'ny Tompo aho,
dia navelanao kosa ny heloky ny fahotako. - Selà.
       ⁶ Ka aoka hivavaka aminao ny olona tia vavaka rehetra, amin'ny fotoana mety.
Marina, fa amin'ny fahatondrahan'ny rano be,
dia tsy hahatratra azy izany.
       ⁷ Hianao no fialofako; hiaro ahy amin'ny fahoriana hianao,
hodidininao hiram-pamonjena aho. - Selà.
       ⁸ Hampianariko sy hasehoko anao izay lalan-kizoranao;
ho mpanolo-tsaina anao aho, sady hitsinjo anao ny masoko.
       ⁹ Aza manahaka ny soavaly ama-mole tsy manan-tsaina:
tsy maintsy entina amin'ny vy sakam-bavany amam-damboridy ireny;
fa tsy mety manaiky izy raha tsy izany.
       ¹⁰ Fahoriana be no anjaran'ny ratsy fanahy;
fa fahasoavana kosa no manodidina an'izay matoky an'ny Tompo.
       ¹¹ Mifalia sy miravoravoa amin'ny Tompo hianareo olo-marina,
Manaova hobin-kafaliana hianareo mahitsy fo rehetra!