Boky Voalohan'i Samoela

Toko faha-10

¹ Nalain'i Samoela ny tavoara nisy diloilo, naidiny tamin'ny lohan'i Saola, dia norohany izy, sady nataony hoe: Moa tsy nohosoran'ny Tompo ho mpanapaka amin'ny lovany va hianao?

² Rahefa tafasaraka amiko hianao anio, dia hahita olona roa lahy, eo akaikin'ny fasan-dRasely amin'ny faritanin'i Benjamina, any Selsaky, hilaza aminao hoe: Ny ampondra notadiavinao efa hita ka tsy heverin-drainao intsony ny momba ny ampondravavy fa ny aminareo indray no ahiany sy ataony hoe: Inona no tsy maintsy hataoko ny amin'ity zanako ity? ³ Avy eo hianao, dia hanohy ny dianao, ary ho tonga ao amin'ny aokan'i Tabora, ka hotsenain'olona telo lahy miakatra ho any amin'Andriamanitra any Betela: ny iray mitondra zanak'osy telo, ny iray mitondra mofo telo, ny iray mitondra divay iray siny hoditra; ⁴ rahefa avy miarahaba anao izy ireo, dia hanome anao mofo roa, ka horaisinao avy amin'ny tànany izany. ⁵ Manaraka izany ho tonga ao Gabaàn'Andriamanitra hianao, izay misy miaramila Filistina mpiambina. Rahefa miditra ao an-tanàna, hifanena amin'ny mpaminany maro, andiany iray, midina avy any amin'ny fitoerana avo, ialohan'ny lokanga, ampongatapaka, sodina, valiha, sady maminany. ⁶ Hilatsaka aminao ny Fanahin'ny Tompo dia hiara-maminany amin'ireo hianao, ka ho voaova ho olom-baovao. ⁷ Rahefa tanteraka ho anao ireo famantarana ireo, dia ataovy araka izay sendra eo anoloanao fa momba anao Andriamanitra. ⁸ Ary midìna alohako any Galgalà, ary indro fa hidina aho hanatona anao, mba hanatitra sorona dorana mandra-pahatongako any aminao, dia holazaiko aminao izay tokony hataonao. ⁹ Vao nihodina nisaraka tamin'i Samoela Saola, dia nomen'Andriamanitra fo vaovao; ary tanteraka androtr'izay ihany ireo famantarana rehetra ireo.

¹⁰ Nony tonga tany Gabaà izy, indreto ny mpaminany maro, andiany iray, nifanena taminy, dia nilatsaka taminy ny Fanahin'Andriamanitra ka naminany teo afovoan'ireo izy. ¹¹ Nony hitan'izay rehetra nahalala azy taloha fa niara-naminany tamin'ireo mpaminany koa izy, dia nifampilaza ireo olon-drehetra ireo hoe: Fa naninona ity zanak'i Kisy? Mba isan'ny mpaminany koa va Saola? ¹² Niteny ny iray teo amin'ny vahoaka ka nanao hoe: Ary iza moa no rain'izy ireo? Izany no nahatonga ilay fitenenana hoe: Mba isan'ny mpaminany koa va Saola? ¹³ Nony efa nitsahatra tsy naminany izy, dia nankeo amin'ny fitoerana avo. ¹⁴ Ary hoy ny rahalahin-drain'i Saola taminy sy tamin'ity mpanompony: Nankaiza hianareo? Dia hoy ny navalin'i Saola: Nitady ny ampondra izahay, fa nony tsy nahita azy hatraiza hatraiza dia nankany amin'i Samoela.

¹⁵ Ary hoy ny rahalahin-drain'i Saola: Tantarao amiko izay nambaran'i Samoela taminareo. ¹⁶ Dia hoy Saola tamin'ity rahalahin-drainy: Nambarany taminay fa efa hita ny ampondravavy. Fa tsy nolazainy taminy ny momba ny fanjakana nambaran'i Samoela azy. ¹⁷ Novorin'i Samoela ho eo anatrehan'ny Tompo any Masfà ny vahoaka,

¹⁸ dia hoy izy tamin'ny zanak'Israely: Izao no lazain'ny Tompo Andriamanitr'Israely: Izaho no nampiakatra an'Israely avy any Ejipta; izaho no nanafaka anareo tamin'ny tànan'ny Ejipsiana, sy tamin'ny tànan'ireo fanjakana nampahory anareo. ¹⁹ Fa hianareo kosa izao manary ny Andriamanitrareo, izay nanafaka anareo tamin'ny loza amam-pijalianareo rehetra, ary milaza aminy hoe: Manangàna mpanjaka aminay! Koa ankehitriny misehoa hianareo isam-poko sy isam-pianakaviana, eo anatrehan'ny Tompo. ²⁰ Dia nasain'i Samoela nanatona ny fokon'Israely rehetra, ka ny fokon'i Benjamina no voafidy.

²¹ Nampanatoniny isam-pianakaviana indray ny fokon'i Benjamina, ka ny fianakavian'i Metrì no voafidy, ary Saola zanak'i Kisy no voatendry. Dia notadiavina izy nefa tsy hita. ²² Amin'izany dia nanontany an'ny Tompo indray ny olona hoe: Moa mbola misy olona tonga teto va? Hoy ny navalin'ny Tompo: Indro izy miery ao amin'ny entana. ²³ Dia nihazakazaka naka azy tao ny olona, ary nitsangana teo afovoan'ny vahoaka izy, dia nanatombo noho ny olona rehetra hatramin'ny sorony no ho miakatra. ²⁴ Ary hoy Samoela tamin'ny vahoaka rehetra: Hitanareo va ilay voafidin'ny Tompo, fa tsy misy toa azy eo amin'ny vahoaka rehetra! Dia nihoby ny vahoaka rehetra, ka nanao hoe: Ho ela velona anie ny mpanjaka! ²⁵ Tamin'izay nasehon'i Samoela ny vahoaka ny fahefana hampiasain'ny fanjakana, sady nosoratany tamin'ny boky, izay napetrany teo anatrehan'ny Tompo. Izay vao nampodiny ny vahoaka, samy ho any an-tranony avy.

²⁶ Saola koa nandeha nody ho any an-tranony, any Gabaà, notronin'olona mahery fo, izay nohetsehin'ny Tompo ny fony. Fa ny olon'i Beliala kosa dia nanao hoe: Dia iny ve no hamonjy antsika? Sady naneso azy izy no tsy nitondra fanatitra ho azy, nefa tsy nasian'i Saola raharaha akory izany.