Boky Voalohan'i Samoela

Toko faha-18

¹ Nony tapitra niteny tamin'i Saola Davida, dia raiki-pitia tamin'ny fanahin'i Davida ny fanahin'i Jonatasy, ka tia azy toy ny ainy Jonatasy.

² Androtr'izay ihany, dia noraisin'i Saola Davida ka tsy navelany hody any an-tranon-drainy. ³ Ary Jonatasy nanao fanekem-pihavanana tamin'i Davida, fa tia azy toy ny ainy izy. ⁴ Ka notsoahan'i Jonatasy nomena an'i Davida ny kapaoty nentiny, toy izany koa ny akanjo fiadiany, mbamin'ny sabany, hatramin'ny tsipìkany sy hatramin'ny fehin-kibony. ⁵ Raha nivoaka Davida na aiza na aiza no nanirahan'i Saola azy dia nahomby izy; nataon'i Saola filohan'ny lehilahy mpiady izy, ary nankasitrahan'ny vahoaka rehetra hatramin'ny mpanompon'ny mpanjaka aza. ⁶ Nony niditra izy ireo, tamin'ny niverenan'i Davida avy namono ilay Filistina, dia nivoaka avy tamin'ny tanànan'Israely rehetra ny vehivavy, nihira sy nandihy teo anoloan'i Saola mpanjaka, an-kafaliana, tamin'ny feon'ny ampongatapaka sy ny valiha.

⁷ Ka nifamaly ny vehivavy, ny mpandihy, nanao hoe: Arivoarivo no matin'i Saola, Fa alinalina kosa, ny an'i Davida. ⁸ Tezitra mafy Saola ary tsy sitrany izany teny izany, ka hoy izy: Ny an'i Davida nataony alinalina, fa ny ahy kosa nataony arivoarivo ka ny fanjakana izany no sisa tsy azony.

⁹ Hatramin'izay andro izay dia ratsy fijery an'i Davida Saola. ¹⁰ Ny ampitson'izay dia nisy fanahy ratsy avy tamin'Andriamanitra nilatsaka tamin'i Saola, ka nihoalahoala teo afovoan 'ny tranony izy. Dia nitendry harpa, araka ny fanaony amin'ny andro hafa Davida, ary teo an-tànan'i Saola ny lefony.

¹¹ Nampandihizin'i Saola ny lefony; sady nataony hoe: Hataoko indray migorobaka Davida sy ny rindrina. Kanjo indroa Davida no nihodivitra teo anoloany. ¹² Dia natahotra an'i Davida Saola, satria nomba azy Iaveh, fa Saola kosa nialany; ¹³ ka nataon'i Saola lavitra azy izy, ary natsangany ho mpifehy arivo lahy. Ary nivoaka sy niditra teo anatrehan'ny vahoaka izy. ¹⁴ Nampiseho fahakingana tamin'izay rehetra nataony Davida ary nomba azy Iaveh. ¹⁵ Natahotra azy Saola nahita ity izy hendry dia hendry; ¹⁶ fa Israely sy Jodà rehetra kosa tia an'i Davida, noho izy nivoaka sy niditra teo anoloan'izy ireo. ¹⁷ Ary hoy Saola tamin'i Davida: Indro homeko ho vadinao Meroba, zanako vavimatoa. Misehoa ho mahery fo anefa hianao, ary tohàny ny adin'ny Tompo. Fa Saola nanao anakampo hoe: Aza ny tànako no mamely azy, fa aoka ny tànan'ny Filistina no hamely azy.

¹⁸ Dia namaly an'i Saola Davida nanao hoe: Zinona moa aho, zinona ny aiko, ary zinona ny fianakavian'ikaky eo amin'Israely, no dia ho vinanton'ny mpanjaka aho? ¹⁹ Kanjo nony tonga ny fotoana tokony hanomezana an'i Meroba zanakavavin'i Saola, ho vadin'i Davida, dia nomena ho vadin'i Hadriela, any Molati, indray kosa izy. ²⁰ Ary Mikola zanakavanin'i Saola tia an'i Davida; dia nampandrenesina an'i Saola izany, ka nankasitrahany.

²¹ Hoy Saola anakampo: Homeko azy izy, mba ho fandrika ho azy, ka hamelezan'ny tànan'ny Filistina azy. Dia hoy Saola tamin'i Davida fanindroany: Ho tonga vinantoko hianao anio. ²² Ary nomen'i Saola didy ny mpanompony, nataony hoe: Miresaha mangingina amin'i Davida ataovy hoe: Raiki-pitia anao ny mpanjaka, ary tia anao koa ny mpanompony rehetra, ka aoka ho vinanton'ny mpanjaka hianao amin'izao. ²³ Dia nolazain'ny mpanompon'i Saola tamin'i Davida mba ho ren'ny sofiny izany teny izany; ka hoy ny navalin'i Davida: Fa ataonareo ho zavatra kely ve izany ho vinanton'ny mpanjaka e? Izaho dia olo-mahantra sy iva razana. ²⁴ Notaterin'ny mpanompon'i Saola taminy izany, nataony hoe: izany no teny nataon'i Davida. ²⁵ Dia hoy Saola: Izao no holazainareo amin'i Davida: Tsy mila zavatra akory ho vody ondry ny mpanjaka, fa hodi-tsy miforan'ny Filistina zato lahy, mba ho voavaly faty ny fahavalon'ny mpanjaka. Ny hisamboran'ny tànan'ny Filistina an'i Davida no nampoizin'i Saola tamin'izany. ²⁶ Dia nolazain'ny mpanompon'i Saola tamin'i Davida izany teny izany, ka nankasitrahan'i Davida izany hoe ho tonga vinanton'ny mpanjaka izy. ²⁷ Ary tsy mbola tapitra akory ny fetr'andro dia nitsangana Davida ary niainga izy sy ny olony, namono roan-jato lahy tamin'ny Filistina sy nitondra ny hodi-tsy miforan'izy ireo Davida; ary nomeny ny mpanjaka araka ny isany marina mba hahatonga azy ho vinantony. Ka dia nomen'i Saola ho vadiny Mikola zanany vavy. ²⁸ Hitan'i Saola sy fantany tsara, fa omban'ny Tompo Davida, ary Mikola zanakavavin'i Saola dia tia an'i Davida. ²⁹ Ka nitombo ny fahatahoran'i Saola an'i Davida ary nitsangan-ko fahavalon'i Davida Saola isan'andro isan'andro. ³⁰ Tonga nanafika ireo andrianan'ny Filistina ary isaky ny nivoaka ireny, dia nahomby nandresy azy Davida noho ny fahakingany mihoatra noho ny mpanompon'i Saola rehetra, ka tonga malaza indrindra ny anarany.