Boky Voalohan'i Samoela

Toko faha-30

¹ Nony tonga tao Sikelega Davida mbamin'ny olony, tamin'ny andro fahatelo, dia efa notafihin'ny Amalesita ny Negeba sy Sikelega: nasiany Sikelega ka nodorany;

² ny vehivavy sy ny olon-drehetra trany tao nobaboiny avokoa, na ny kely na ny lehibe, ary tsy nisy novonoiny izy fa nentiny ho babo dia lasa nandeha izy. ³ Nony tonga tao an-tanàna Davida sy ny olony, dia hitany fa voadoro ny tanàna, ary ny vadiny, ny zanany lahy, ny zanany vavy lasan-ko babo. ⁴ Ary samy nanandra-peo nitomany Davida sy ireto olona niaraka taminy, mandra-pahalanin'ny heriny tsy hanatomany intsony. ⁵ Lasan-ko babo mbamin'izy roa vavy, vadin'i Davida, dia Akinoama avy any Jezraela, sy Abigaila avy any Karmela, ilay novinadin'i Nabala. ⁶ Niferin'aina mafy Davida, fa nanao teny hitora-bato azy ny antoko-miaramilany, satria samy nahatsiaro mangidy mafy loatra tao am-pony ny vahoaka noho ny amin'ny zanany lahy sy ny zanany vavy. Nefa nampahery ny tenany tamin'ny Tompo Andriamaniny, Davida.

⁷ Hoy Davida tamin'i Abiatara mpisorona zanak'i Abimeleka: Ento aty amiko ny efoda;

⁸ ka nanontany an'ny Tompo Davida nanao hoe: Hanenjika izany jirika izany va aho? Hahatratra azy va aho? Ary hoy ny navaliny: Enjeho, fa hahatratra azy marina tokoa hianao, sady hanafaka. ⁹ Dia niainga Davida sy izy enin-jato lahy izay niaraka taminy. Nony tonga teo amin'ny ranon-driaka Besora izy ireo, dia niato ny mpitaredretra tamin'izy ireo. ¹⁰ Nanohy ny dia fanenjehany niaraka tamin'ny efa-jato lahy Davida, fa ny roan-jato lahy nijanona noho izy efa reraka tsy nahatafita ny ranon-driaka Besora. ¹¹ Ary nahita lehilahy Ejipsiana anankiray tany an-tsaha izy ireo ka nentiny tao amin'i Davida. Ary nomeny mofo izy dia nihinana ary nampisotroin-drano,

¹² norosoana ampempan'aviavy maina iray didy, sy voaloboka maina roa takelaka. Nony efa nihinana izy, dia nody ny ainy, fa hateloan'andro sy hateloan'alina izy, tsy nihinan-kanina na nisotro rano. ¹³ Hoy Davida taminy: An'iza hianao, ary avy aiza? ka hoy ny navaliny: Andevo Ejipsiana lasan-ko mpanompon'ny Amalesita anankiray aho, saingy narary, ka narian'ny tompoko, efa hateloana izay. ¹⁴ Nanafika ny Negeban'ny Keretiana sy ny faritanin'i Jodà mbamin'ny Negeban'i Kaleba izahay, ary nodoranay Sikelega. ¹⁵ Dia hoy Davida taminy: Manaiky hitarika ahy ho any amin'izany jirika izany va hianao? Ary hoy ny navaliny: Mianiàna amiko amin'Andriamanitra fa tsy hamono ahy hianao, na hanolotra ahy eo an-tànan'ny tompoko, dia hitarika anao ho any amin'izany jrika izany aho. ¹⁶ Nony nitarika azy izy, dia indreo ny Amalesita, miely eran'ny tany, mihinana sy misotro, ary mandihy, fa nahazo babo betsaka tamin'ny tanin'ny Filistina sy ny tanin'i Jodà. ¹⁷ Nasian'i Davida izy ireo, hatramin'ny takarivan'izay ka hatramin'ny ampitso hariva, tsy nisy afa-nandositra afa-tsy zatovo efa-jato lahy izay nitaingin-drameva, dia nitsoaka. ¹⁸ Ka azon'i Davida indray izay rehetra voababon'ny Amalesita, ny vadiny roa voavonjy. ¹⁹ Ny olony, tsy nisy tsy azon'izyz ireo, na kely na lehibe, na azanay lahy na zanany vavy, na ny zavatra, na inona na inona nalaina taminy: dia nentin'i Davida nody avokoa izany. ²⁰ Koa nalain'i Davida ny biby fiompy na ny madinika na ny vaventy; dia nandeha teo alohan'izany andiam-biby fiompy izany izy ireo nanao hoe: Itony no babon'i Davida. ²¹ Niverina Davida nankany amin'izy roan-jato lahy izay reraka loatra ka tsy afa-nanaraka an'i Davida ka najanona tao amin'ny ranon-driaka Besora, dia nitsena an'i Davida sy ny vahoaka izay niaraka taminy izy ireo. Nanatona azy ireo Davida dia niarahaba azy tamim-pitiavana.

²² Fa rehefa mety ho lehilahy sompatra sy faikany tamin'ny olona niaraka tamin'i Davida dia niteny kosa nanao hoe: Satria tsy mba tafaraka tamintsika ireo dia tsy mba omentsika amin'ny babo azontsika afa-tsy ny vady aman-janany isany avy ihany; ka aoka ho entiny izany ary handeha any izy. ²³ Nefa hoy kosa Davida: Aza manao toy izany, ry rahalahy, amin'ny zavatra nomen'ny Tompo antsika, satria niaro antsika izy sy nanolotra eo an-tànantsika ny jirika tonga hamely antsika. ²⁴ Ka iza no hanaiky anareo amin'izany raharaha izany? Tsy maintsy atao sahala ny anjaran'izay nidina hiady, sy ny an'izany nijanona tamin'ny entana: hiara-mizara daholo. ²⁵ Dia natao araka izany hatramin'izay andro izay ka aty aoriana, dia nataon'i Davida lalàna sy fitsipika izany mandrak'androany. ²⁶ Nony tafaverina tany Sikelega Davida dia nampanaterany ho an'ny loholon'i Jodà, sakaizany, ny babo azony, nataony hoe: Iny fanatitra ho anareo, avy amin'ny babo azo tamin'ny fahavalon'ny Tompo;

²⁷ dia ho an'ny ao Betela, an'ny ao Ramotan'ny Negeba, an'ny ao Jetera, ²⁸ an'ny ao Aroera, an'ny ao Sefamota, an'ny ao Estamao, ²⁹ an'ny ao Rakola, an'ireo ao amin'ny tanànan'ny Jerameelita, an'ireo ao amin'ny tanànan'ny Kineana, ³⁰ an'ny ao Arama, an'ny ao Kora-Asana, an'ny ao Ataka, ³¹ an'ny ao Hebrona, ary ho an'ny any amin'ny tany rehetra nalehan'i Davida sy ny olony.