Boky Voalohan'ny Tantara

Toko faha-16

¹ Nony efa voampiditra ny fiaran'Andriamanitra sy efa napetraka tao afovoan'ny lay naorin'i Davida ho azy, dia nanatitra sorona dorana sy sorom-pihavanana teo anatrehan'Andriamanitra ny olona.

² Nony vitan'i Davida ny fanolorana ny sorona dorana sy ny sorom-pihavanana, dia nitso-drano ny vahoaka tamin'ny anaran'ny Tompo izy. ³ Ary ny olona rehetra tamin'Israely na lahy na vavy, dia nizarany mofo iray avy, sy hena iray didy ary ampempam-boaloboka iray. ⁴ Nisy Levita sasany notendren'i Davida hitoetra eo anatrehan'ny fiaran'ny Tompo mba hanao ny fanompoana amin'ny fangatahana, fankalazana sy fiderana an'ny Tompo Andriamanitr'Israely;

⁵ dia Asafa filohany, Zakaria faharoa, dia Jahiela, Semiramota, Jehiela, Matatiasa, Eliaba, Banaiasa, Obededoma ary Jehiela, izay nanan-java-maneno, lokanga, harpa, ary Asà nampaneno ny kipantsona, ⁶ Banaiasa sy Jaziela mpisorona nitsoka anjomara lalandava, teo anoloan'ny fiaran'ny faneken'Andriamanitra. ⁷ Tamin'izay andro izay no voalohany nanapahan'i Davida, fa ny feon'i Asafa sy ny rahalahiny no hankalazana an'ny Tompo:

⁸ Midera an'ny Tompo; miantsoa ny anarany; ampahafantaro ny firenena ny zava-dehibe nataony.

⁹ Manaova hira fanajana azy, mihira salamo fanajana azy. Torio ny fahagagana rehetra nataony.

¹⁰ Ataovy reharehanareo ny anarany masina; a Aoka ho faly ny fon'izay mitady an'ny Tompo.

¹¹ Katsaho Iaveh sy ny heriny, tadiavo lalandava ny tavany.

¹² Tsarovy ny zava-mahatalanjona nataony, ny fahagagany sy ny fitsaran'ny vavany,

¹³ ry taranak'Israely mpanompony, ry terak'i Jakoba, hianareo olom-boafidiny.

¹⁴ Izay Iaveh no Andriamanitsika, mahazo ny tany rehetra ny fitsarany.

¹⁵ Tsahivo mandrakariva ny fanekeny, ny teny nataony ho an'ny taranaka arivo mandimby.

¹⁶ Ny fanekena nifanaovany tamin'i Abrahama, ny fianianana nataony tamin'Isaaka,

¹⁷ izay naraikiny ho lalàna ho an'i Jakoba, ary ho fanekem-pihavanana mandrakizay ho an'Israely,

¹⁸ nataony hoe: Homeko anao ny tany Kanaana, ho anjara lovanao.

¹⁹ Fony mbola mora isaina hianareo, vitsy isa, sady vahiny tamin'ny tany,

²⁰ nivezivezy nifindra firenena izy ireo, avy amin'ny fanjakana iray ho amin'ny vahoaka hafa,

²¹ tsy navelany hisy hampahory azy, fa izy ireo aza namaizany mpanjaka:

²² aza mitendry ireo voahosotro, aza manisy ratsy ny mpaminaniko.

²³ Mihira ho an'ny Tompo, ry mponina amin'ny tany rehetra; torio isan'andro ny famonjeny.

²⁴ Ambarao amin'ny firenena ny voninahiny ary amin'ny vahoaka rehetra ny fahagagany.

²⁵ Fa lehibe Iaveh ka mendrika hoderaina indrindra, ary mahatahotra mihoatra ireo andriamanitra rehetra izy;

²⁶ fa ny andriamanitry ny firenena rehetra dia sampy. Ary Iaveh no nanao ny lanitra;

²⁷ fiandrianana amam-pamirapiratana no eo anatrehan'ny tavany, ary hery aman-kafaliana no eo amin'ny fonenany.

²⁸ Omeo an'ny Tompo, ry fianakaviam-pirenena, omeo an'ny Tompo ny voninahitra sy ny fahefana;

²⁹ omeo an'ny Tompo ny voninahitra ho an'ny anarany. Mitondra fanatitra ka mankanesa eo anatrehany; mitsaoha an'ny Tompo amin'ny fanamiana masina.

³⁰ Mangovìta eo anatrehany, ry mponina amin'ny tany rehetra, ary izao tontolo izao, voaorina, tsy mba hivembena.

³¹ Aoka hifaly ny lanitra, ary aoka hiravo ny tany! Aoka holazaina eram-pirenena ny hoe: Mpanjaka Iaveh!

³² Aoka hirohondrohona ny ranomasina, mbamin'izay rehetra ao aminy! Aoka hisomebiseby ny saha, mbamin'izay rehetra ao aminy!

³³ Ary aoka hanandra-peo fifaliana ny hazo an'ala, eo anatrehan'ny Tompo fa avy hitsara ny tany izy.

³⁴ Midera an'ny Tompo fa tsara izy, fa maharitra mandrakizay ny famindram-pony.

³⁵ Lazao hoe: Vonjeo izahay, ry Andriamanitry ny famonjena anay! angony izahay ary tsoahy avy eo amin'ny firenena, mba hankalazanay ny anaranao masina sy hanaovanay ho reharehanay ny fiderana anao.

³⁶ Isaorana anie Iaveh Andriamanitr'Israely, Hatramin'ny mandrakizay, ka ho mandrakizay. Ary ny vahoaka rehetra nanao hoe: Amena! sy hoe: Midera an'ny Tompo!

³⁷ Dia navelan'i Davida teo anoloan'ny fiaran'ny faneken'ny Tompo Asafa mbamin'ireo rahalahiny, mba hanao tsy tapaka ny fanompoana eo anoloan'ny fiara, araka ny anjara raharahany isan'andro.

³⁸ Toy izany koa Obededoma mbamin'ireo rahalahiny valo amby enimpolo, Obededoma zanak'Iditona ary Hosa, ho mpiandry varavarana. ³⁹ Toy izany koa Sadaoka mpisorona, mbamin'ireo mpisorona rahalahiny, teo anoloan'ny Fonenan'ny Tompo teo amin'ny fitoerana avo tao Gabaona, ⁴⁰ mba hanolotra sorona dorana tsy tapaka, maraina sy hariva, amin'ny Tompo, eo anoloan'ny otely fanaovan-tsorona dorana, sy hanao izay rehetra voasoratra ao amin'ny lalàn'ny Tompo izay nandidiany an'Israely. ⁴¹ Teo akaikin'ireo Hemàna sy Iditona mbamin'ny sisan'ireo voafidy sy voatonona anarana, hidera an'ny Tompo, fa maharitra mandrakizay ny famindram-pony. ⁴² Niaraka tamin'ireo, dia niaraka tamin'i Hemàna sy Iditona, dia nisy anjomara aman-kipantsona ho an'ireo tsy maintsy mampaneno azy, mbamin'ny zava-maneno hampiarahina amin'ny hiran'Andriamanitra. Ny zanak'Iditona niadidy ny varavarana. ⁴³ Samy nody tany an-tranony avy ny vahoaka rehetra, ary Davida koa nody hitso-drano ny ankohonany.