Boky Voalohan'ny Tantara

Toko faha-26

¹ Izao avy no antokon'ny mpiandry varavarana: Tamin'ny Koreita: Meselemia, zanak'i K-re, avy amin'ny zanak'i Asafa.

² Zanakalahin'i Meselemià: Zakariasa lahimatoa; Jadihela faharoa; Zabadiasa fahatelo; Jatanaela fahefatra; ³ Elama fahadimy; Johanàna fahenina; Elioenaì fahafito. ⁴ Zanakalahin'i Obededoma: Semeiasa lahimatoa, Jozabada faharoa, Joahà fahatelo, Sakara fahefatra, Natanaela fahadimy, ⁵ Ammiela fahenina, Isakara fahafito, Folatì fahavalo: fa nohasoavin'Andriamanitra Obededoma. ⁶ Semeiasa zanany lahy niteraka zazalahy, izay samy tonga filohany tamin'ny fianakavian-drainy, fa lehilahy nahery fo izy ireo.

⁷ Zanakalahin'i Semeiasa: Otnì, Rafaela, Obeda, Elzabada, mbamin'ireo rahalahiny, samy lehilahy mahery fo, ary Eliò sy Samakiasa. ⁸ Ireo rehetra ireo, dia samy zanak'i Obededoma; roa amby enimpolo izy mbamin'ny zanany aman-drahalahiny no avy amin'i Obededoma, samy lehilahy matanjaka sy be herim-po amin'ny fanompoana. ⁹ Nanan-janaka aman-drahalahy Meselemià, izay samy lehilahy mahery fo; valo ambin'ny folo izy. ¹⁰ Amin'ny taranak'i Merarì, Hosà nanan-janaka, dia Semrì filohany; tsy mba lahimatoa izy nefa natsangan-drainy ho lohany, ¹¹ Helkiasa faharoa, Tabeliasa fahatelo, Zakariasa fahefatra. Telo ambin'ny folo izy no tontalin'ny zanaka aman-drahalahin'i Hosa. ¹² Ireo antokon'ny mpiandry varavarana ireo, ny filohan'izany lehilahy izany, dia samy nanan-draharaha tamin'ny fanompoana tao an-tranon'ny Tompo, teo anilan'ireo rahalahiny. ¹³ Nanao filokàna ny amin'ny isam-baravarana avy izy, na ny kely na ny lehibe, araka ny fianakaviany avy.

¹⁴ Ka azon'i Selemiasa ny loka ny amin'ny lafiny atsinanana. Dia natao ny loka ho an'i Zakariasa zanany izay mpanolo-tsaina hendry, ka ny amin'ny lafiny avaratra no azony. ¹⁵ Ny amin'ny lafiny atsimo, azon'i Obededoma, ary ny trano fitehirizana, an'ny zanany. ¹⁶ Ny amin'ny lafiny andrefana, akaikin'ny vavahady Sikaleketa amin'ny làlana miakatra, azon'i Sefima sy Hosà: nifanandrify ny antokom-piambina. ¹⁷ Nisy Levita enina any atsinanana, efatra isan'andro any avaratra, efatra isan'andro any atsimo, efatra tamin'ny trano fitehirizana, tsiroaroa; ¹⁸ amin'ny lafin'ny trano fanampiny, any andrefana: efatra tamin'ny làlana, roa tamin'ny trano fanampiny. ¹⁹ Toy izany no nanokotokoana ny mpiandry varavarana, amin'ny taranaky ny Koreita sy taranak'i Merarì. ²⁰ Ny Levita rahalahin'ireo, no tonian'ny rakitry ny tranon'Andriamanitra, sy ny rakitr'ireo zavatra voahasina.

²¹ Amin'ny taranak'i Ledàna, izany hoe: ny taranaky ny Gersonita avy amin'i Ledàna loham-pianakavian'i Ledàna Gersonita, dia Jehiela; ²² ny zanak'i Jehiela, Zatàna sy Joela rahalahiny, no tonian'ny rakitry ny tranon'ny Tompo. ²³ Tamin'ny Amramita, ny Isaarita, ny Hebronita ary ny Ozihelita, ²⁴ dia Soboela zanak'i Gersona, zanak'i Moizy, no toniany ambony indrindra amin'ny rakitra. ²⁵ Tamin'ireo rahalahiny avy amin'i Eliezera, izay nanan-janaka an'i Rahabià, izay nanan-janaka an'i Isaiasa, izay nanan-janaka an'i Jorama, izay nanan-janaka an'i Zekrì, izay nanan-janaka an'i Selemita, ²⁶ dia Selemita mbamin'ireo rahalahiny no tonian'ny rakitr'ireo zavatra masina rehetra, izay natokan'i Davida mpanjaka sy ny loham-pianakaviana mbamin'ny tompon'arivo sy tompon-jato, ary ny filohan'ny tafika. ²⁷ Ny babo azo tamin'ny ady no nanokanan'izy ireo izany hoenti-miahy ny tranon'ny Tompo. ²⁸ Ny zavatra rehetra natokan'i Samoela mpahita, Saola zanak'i Kisa, Abnera zanak'i Nera, Joaba zanak'i Sarvià sy ny olon-kafa na iza na iza dia teo am-pelatànan'i Selemita mbamin'ireo rahalahiny avokoa. ²⁹ Tamin'ny Isaarita, dia Koneniasa mbamin'ireo zanany no voatendry ho amin'ny raharaha ivelany amin'Israely, ho mpanoratra sy mpitsara.

³⁰ Tamin'ny Hebronita, dia Hasabiasa mbamin'ireo rahalahiny samy lehilahy mahery fo, fiton-jato amby arivo no isany, no nifehy an'Israely teny an-dafin'i Jordany any andrefana, amin'ny raharaha rehetra momba an'ny Tompo sy ny fanompoana ny mpanjaka. ³¹ Tamin'ny Hebronita dia Jerià no lohany. Ny amin'ny Hebronita araka ny tetiarana isam-pianakaviana dia nisy fikarohana natao tamin'ny taona fahefapolo nanjakan'i Davida ka nahitana lehilahy mahery teo amin'izy ireo tao Jazera any Galaada, ³² mbamin'ny rahalahiny, lehilahy mahery fiton-jato amby arivo, samy loham-pianakaviana. Ary notendren'i Davida mpanjaka izy ireo hifehy ny Robenita sy ny Gadita ary ny antsasa-pokon'i Manase, amin'ny raharahan'Andriamanitra rehetra sy ny raharahan'ny mpanjaka.