Boky Faharoan'ny Makabeo

Toko faha-8

¹ Tamin'izany Jodasa Makabeo sy ireo namany, dia niditra an-tsokosoko tamin'ny tanàna, niantso ny havany hiaraka aminy, sy nandray izay tsy nivadika tamin'ny fivavahana Jody, hikambana aminy, ka nahavory miaramila sahabo ho enina arivo.

² Nitalaho tamin'ny Tompo izy ireo hitsinjo ity vahoakany, hosihosen'ny olona rehetra, hangoraka ity tempoliny lotoin'ny mpankahala ny fivavahana, ³ hiantra izato tanàna ravana, efa hitovy tantana amin'ny tany; hihaino ny feon'ny ra nalatsaka, izay mitaraina aminy, ⁴ hahatsiaro ny namonoana tsy an-drariny an'ireo zaza tsy manan-tsiny sy ny faniratsirana nafitsoka ny anarany, ka haneho ny fankahalany an'ireo ratsy fanahy. ⁵ Nony nahazo miaramila betsaka tarihiny i Makabeo, dia tsy azon'ny firenena noresena izy, satria efa niova ho famindram-po ny hatezeran'ny Tompo. ⁶ Nosovohiny tampoka ny tanàna amam-bohitra, dia nodorany, ary notanany ireo fitoerana tsara indrindra, ka nataony resy ny fahavalo betsaka. ⁷ Ny alina indrindra no nofidiny, handreseny moramora kokoa amin'izany karazam-pandresena izany. Niely hatraiza hatraiza ny lazan'ny herim-pony. ⁸ Tsy ela dia hitan'i Filipo, ny fandrosoan'ity lehilahy mbamin'ny fandresena miha-matetika azony, ka nanoratra izy ho any amin'i Ptolemea, komandin'ny miaramilan'i Sele-Siria sy Fenisia, mba hamonjy ny mpanjaka amin'ny raharahany.

⁹ Tsy niandry Ptolemea fa raikitra nanao ny raharaha teo no ho teo, ka naniraka an'i Nikanora zanak'i Patrokla, iray amin'ireo sakaizan'ny mpanjaka voalohandohany nitondra miaramila roa alina, fara-fahakeliny, avy amin'ny firenen-tsamihafa, handringanany ny firenen'ny Jody manontolo; nomeny azy ho mpanampy koa Gorjiasa, jeneraly zatra fatratra amin'ny zavatra momba ny ady. ¹⁰ Natoky mihitsy Nikanora fa hahavonona talenta roa arivo ho an'ny mpanjaka amin'ny vidim-babo halaina ao amin'i Jodea izay tentin'ny hetra haloa amin'ny Romana. ¹¹ Dodona erý izy nandefa fiantsoana amin'ny tanàna amoron-dranomasina, ho tonga hividy andevo Jody, sady nampanantena fa hataony talenta iray amin'izy ireo ny sivy folo aminy, tsy nonofisiny akory izay famaliana avy amin'ny Tsitoha vao hanjò azy. ¹² Vao nandre ny dian'i Nikanora Jodasa dia nampandrenesiny an'ireo namany fa akaiky ny fahavalo. ¹³ Ka ny sasany, raiki-tahotra sy tsy ampy finoana ny fahamarinan'Andriamanitra, dia nitsoaka nandositra any an-tany hafa; ¹⁴ ny sasany nivarotra izay sisa teo an-tànany rehetra, sady nivavaka tamin'ny Tompo koa hanafaka azy amin'i Nikanora mpankahala ny fivavahana, izay efa nivarotra azy sahady, talohan'ny haharaiketan'ny ady; ¹⁵ na dia tsy noho ny amin'izy ireo aza, dia noho ny fiheverana ny fanekena natao tamin'ny razany ahay, ary noho ny anarany masina sy lehibe efa voa-antso tamin'izy ireo. ¹⁶ Novorin'i Makabeo ny sisa tafajanona taminy, nisy enina arivo lahy no isany, dia namporisihiny tsy hatahotra, na hihorohoro amin'izay hamaroan'ny firenena tamy hamely azy tsy an-drariny, fa hiady amin-kerim-po, ¹⁷ ka hany hatrehina, dia ny fandoroana tsy mendrika nafitsok'ireo ny fitoerana masina, ny fanazimbazimbana ny tanàna noravany, mbamin'ny fanafoanana ny fomba nentin-drazana. ¹⁸ Izy ireo, hoy izy, mitoky amin'ny fiadiana sy ny fikatrohana amin-kasahiana; fa isika kosa, mametraka ny fitokiantsika amin'Andriamanitra, Tompon'ny zavatra rehetra, mahay manakorontana ireo tamy hamely antsika sy izao tontolo izao aza, amin'ny baiko iray monja. ¹⁹ Dia novisavisainy teo anatrehan'izy ireo ny ohatry ny fiarovan'Andriamanitra fahataloha; ny naharingana ny miaramila valo alina sy iray hetsy tamin'ny andron'ny Senakeriba; ²⁰ tamin'ny ady tamin'ny Galata, tany Babilonia, valo arivo lahy monja no isan'ny nikatroka, nampiana Masedoniana efatra arivo, voasokera mafy dia mafy izy ireto; nefa nahafaty fahavalo roa alina sy iray hetsy, izy valo arivo lahy; noho ny vonjy azony avy any amin'ny lanitra sady nahazo voka-tsoa be vava. ²¹ Nony avy nanome toky azy ireo, tamin'izany fampahatsiarovana izany izy, sy namonon-ko faty azy ireo ho an'ny lalàna aman-tanindrazana, dia nozarainy ho antokony efatra ny tafiny.

²² Napetrany hitakika isan-tokony avy Simona sy Josefa ary Jonatasa rahalahiny; nomeny miaramila diman-jato amby arivo avy. ²³ Fanampin'izany, nandidy an'i Eleazara izy hanao famakiana ny boky masina; rahefa izany, nomeny ny baiko hoe: Vonjin'Andriamanitra, dia nitarika ny antokony voalohany izy namely an'i Nikanora. ²⁴ Tonga namonjy azy ny Tsitoha ka matiny ny fahavalo mihoatra ny sivy arivo, naratrany sy noboriany ny ankabeazan'ny miaramilan'i Nikanora nataony vaky nandositra avokoa ²⁵ Nalainy koa ny volan'ireo izay tonga hividy azy. Efa lasa lavitra ihany izy nanenjika ny mpandositra, ²⁶ vao niverina, fa voasakan'ny fotoana, satria omalin'ny sabata tamin'izay; izany no tsy nanohizany ny fanenjehana azy. ²⁷ Ka nangoniny ny fiadian'ny fahavalo, nobaboiny izay teny aminy, dia nankalaza ny Tompo, izay namonjy azy tamin'izany andro izany, fa efa nanapa-kevitra haneho taminy ny fiandohan'ny famindram-pony. ²⁸ Nony lasa ny sabata, nizarany tamin'ny babo ireo niharan'ny fanenjehana, ny kamboty sy ny mpitondra-tena, vao nozarainy tamin'ny samy izy mbamin'ny zanany ny sisa. ²⁹ Vita izany dia rafitra niara-nivavaka izy ireo, nitalaho tamin'ny Tompo mpamindra fo, hihavana tanteraka amin'ny mpanompony indray. ³⁰ Mihoatra ny roa alin-dahy no matiny koa, tamin'ny miaramila niady fehin'i Timotea sy Bakidesa ary azony tamin-kerim-po ireo trano mimanda avo. Nozarainy roa mitovy ny babo betsaka azony: ny iray toko azy; ny iray toko an'ireo nenjehina, ny kamboty, ny mpitondra-tena ary ny antitra koa.

³¹ Nangoniny ny fiadiana, dia napetrany tamim-pilaminana tao amin'ny fitoerana mety; ary nentiny ho any Jerosalema ny babo sisa. ³² Novonoiny ho faty Filarka, izay nomba an'i Timoteo; lehilahy ratsy fanahy loatra izy izany, nahavita ratsy be tamin'ny Jody. ³³ Raha mbola nankalaza ny fandreseny tao amin'ny renivohiny izy, ry Kallistena mbamin'ny sasany hafa kosa izay nandoro ny varavarana masin'ny tempoly dia nandositra tao an-trano kely anankiray; ka dia nodorany tao ireo, sy nomeny ny valy tandrifin'ny fametavetany ny zavatra masina. ³⁴ Nikanora ilay jiolahy safatsiroa, izay nampihavy mpandranto arivo, hividy ny Jody aminy,

³⁵ dia voaetrin'ireto nataony ho osa noho izy, noho ny vonjy avy amin'ny Tompo, ka nendahany ny fitafiam-boninahitra teny aminy, dia namakivavky ny saha toy ny mpandositra izy tsy nisy mpanotrona, ary niditra tao Antiokia honjohonjon'izy irery, sady nivarilavo fa namoy ny fatiny. ³⁶ Ilay izy nampanantena hanefa ny sisan'ny hetra haloa amin'ny Romana, amin'ny vidim-babo avy any Jerosalema teo iny indrindra, no nilaza am-pahibemaso fa manana an'Andriamanitra ho mpiaro azy ny Jody, ka tsy mety maratra izy amin'izany; satria mankatò ny lalàna nandidiany azy izy ireo.