Boky Faharoan'ny Tantara
Toko faha-3
1 Dia natombok'i Salomona ny fanaovana ny tranon'ny Tompo tao Jerosalema, amin'ny tendrombohitra Moria, izay efa natoro an'i Davida rainy, dia amin'ny toerana efa voaoman'i Davida teo amin'ny famoloan'i Ornàna, Jeboseana.2 Tamin'ny andro faharoan'ny volana faharoa, taona fahefatra nanjakany, no nanombohany hanao azy. 3 Toy izao no fototra nanorenan'i Salomona ny tranon'Andriamanitra: Enimpolo hakiho, araka ny hakiho fandrefesana taloha ny lavany; ary roapolo hakiho ny sakany.
4 Ny lavarangana fidirana izay eo anoloan'ny halavan'ny trano dia roapolo hakiho ny lavany, araka ny sakan'ny trano, ary roapolo amby zato hakiho ny hahavony; nopetahan'i Salomona volamena madio ny atiny. 5 Ny trano lehibe nopetahany hazo sipresa, dia nopetahany volamena madio, nasainy hasiana sarin-drofia aman-tongàlika nosokirina. 6 Nopetahany vato soa ny trano handravahana azy, ary ny volamena dia ny avy any Parvaima. 7 Nopetahany volamena ny trano, dia ny sakamandimby, ny tolana, ny rindrina, ny varavarana, ary nasiana Kerobima nosokirina ny rindrina. 8 Dia nataony ny efi-trano masina indrindra: roapolo hakiho araka ny sakan'ny trano, ny halavany, ary roapolo hakiho ny sakany. Nopetahany volamena madio io, nahalaniana talenta volamena enin-jato,
9 ary dimampolo sikla ny lanjan'ny hombo volamena. Ny efi-trano ambony nopetahany volamena koa. 10 Nanao kerobima roa, taozavatra voasokitra, tao amin'ny efi-trano masina indrindra, ary nopetahany volamena ireo.
11 Roapolo hakiho no halavan'ny elatr'ireo kerobima ireo. Ny elatra anankiray amin'ny voalohany, dimy hakiho no halavany, dia mipaka amin'ny rindrin-trano, ary ny elany anankiray, dimy hakiho, dia mifanendry amin'ny elatry ny kerobima iray; 12 ny elatra anankiray amin'ny kerobima faharoa dimy hakiho, dia mipaka amin'ny rindrin-trano, ary ny elany anankiray, dimy hakiho, mifanendry amin'ny elatry ny kerobima anankiray. 13 Dia roapolo hakiho no halavan'ny elatr'ireo kerobima ireo, mivelatra. Nijoro tamin'ny tongony izy; ary manatrika ny trano ny tarehiny. 14 Jaky volomparasy, jaky mena, lamba mena antitra ary rongony madinika no nataony salobona, ka nasiany kerobima vita amboradara.
15 Nanao andry roa teo anoloan'ny trano izy, dimy amby telopolo hakiho avy no hahavony, dimy hakiho ny loha andry tao an-tampony. 16 Nanao tongàlika, toy ny ao amin'ny loha andry; ary nanao voan'ampongabendanitra zato izy, nataony teo amin'ny tongàlika. 17 Dia natsangany teo anoloan'ny tempoly ny andry, ny iray teo an-kavanany, ny iray teo an-kaviany. Ilay teo an-kavanana nataony hoe Jakina ary ny eo an-kavia, Booza.