Bokin'i Ezekiela
Toko faha-36
1 Ary hianao, ry zanak'olona, maminania amin'ny tendrombohitr'Israely ka ataovy hoe: Ry tendrombohitr'Israely, mihainoa ny tenin'ny Tompo:2 Izao no lazain'ny Tompo Iaveh: Noho ny fahavalo nilaza ny aminareo hoe: Hia! Hia! lasanay ho fanananay ny havoana fahagola!
3 Noho izany dia maminania, ka ataovy hoe: Izao no lazain'ny Tompo Iaveh: Noho ny nandravan'ny olona sy nanitsakitsahan'ny tongony anareo, hatraiza hatraiza, mba hahatongavanareo fananan'izay sisa amin'ny firenena, ary noho hianareo tonga fitenenan'ny vava mitsaontsaona, sy firesaka ratsin'ny olona;
4 noho izany, ry tendrombohitr'Israely, dia mihainoa ny tenin'ny Tompo Iaveh: Izao no lazain'ny Tompo Iaveh amin'ny tendrombohitra sy havoana, amin'ny hantsan-driaka sy ny lohasaha, amin'ny toeran-dravarava mahalao monina sy amin'ny tanàna haolo, izay efa natolotra horobaina sy hihomehezan' ny sisa amin'ny firenena manodidina;
5 noho izany, izao no lazain'ny Tompo Iaveh: Eny, noho ny firehitry ny fahasarota-piaroko, no nitenenako namely izay sisa amin'ny firenena sy namely an'i Idomea manontolo izay nisazoka ny taniko ho fananany tamin'ny hafalian'ny fony rehetra sy tamin'ny fanesoan'ny fanahiny, hataony fandroba foana;
6 koa noho izany maminania hianao ny amin'ny tanin'Israely, ary lazao amin'ny tendrombohitra sy ny havoana, amin'ny hantsan-driaka sy ny lohasaha hoe: Izao no lazain'ny Tompo : Indro aho miteny amin'ny fahasarota-piaroko amam-pahatezerako, satria hianareo nitondra ny latsa avy tamin'ny firenena.
7 Koa noho izany, izao no lazain'ny Tompo Iaveh: Efa nanangan-tànana aho! Ireo firenena manodidina anareo, dia hitondra latsa koa izy ireo.
8 Ary hianareo kosa, ry tendrombohitr'Israely, haniry ny rantsanareo, sy hahavokatra ny voanareo ho an'Israely vahoakako; fa efa akaiky ny hihaviany.
9 Indro aho ho avy eo aminareo, sy hitodika ny tavako ho aminareo, ka dia hasaina sy hofafazana hianareo.
10 Hohamaroiko ny olona eo aminareo, dia ny taranak'Israely rehetra rehetra; ny tanàna, honenana; ary ny efa rava, haorina indray.
11 Hampitomboiko ny olona sy ny biby fiompy eo aminareo; ka ho maro sy hitombo ireny; hataoko honenan'olona toy ny taloha hianareo. Hanao soa aminareo, mihoatra noho ny tamin'ny niandohanareo aho; ka ho fantatrareo fa Iaveh aho.
12 Hitondra olona ho eo aminareo aho dia Israely vahoakako, ka izy hanana anao; ho lovany hianao, ary tsy hahalany fara azy intsony.
13 Izao no lazain'ny Tompo Iaveh: Noho ny anaovany aminareo hoe: Nandany olona hianao, sady nahalany fara ny firenenao;
14 noho izany dia tsy handany olona intsony hianao, na hahalany fara ny firenenao, - teny marin'ny Tompo Iaveh.
15 Tsy avelako handre latsa avy amin'ny firenena intsony hianao, na hitondra fanaratsiana avy amin'ny firenena, sady tsy hahatafintohina ny firenenao koa, - teny marin'ny Tompo Iaveh.
16 Tonga tamiko ny tenin'ny Tompo nanao hoe:
17 Ry zanak'olona, ry zareo taranak'Israely, fony izy nitoetra teo amin'ny taniny, dia nandoto azy, tamin'ny fitondran-tenany aman'asany; fa ny fitondran-tenan'izy ireo dia toy ny fahalotoan'ny vehivavy teo anatrehako.
18 Ka naidiko tamin'izy ireo ny fahatezerako, noho ny ra nalatsany tamin'ny tany, sy noho ny nandotoany azy tamin'ny sampiny vetaveta.
19 Naeliko ho any amin'ny firenena izy ireo, ka nahahaka tany amin'ny tany samihafa. Notsaraiko araka ny fitondran-tenany aman'asa nataony izy.
20 Nony mby tany amin'ny firenena nalehany izy ireo, dia nanala baraka ny anarako masina, fa izao no filazan'ny olona azy: Ireo no olon'ny Tompo, avy any amin'ny taniny no nialany.
21 Ka nangoraka ny anarako masina aho, izay nalain'ny taranak'Israely baraka, tamin'izay firenena nalehany any.
22 Noho izany, lazao amin'ny taranak'Israely hoe: Izao no lazain'ny Tompo Iaveh: Tsy noho ny aminareo, no anaovako an'izao, ry taranak'Israely, fa noho ny anarako masina izay nalainareo baraka, tany amin'ny firenena nalehanareo.
23 Hohamasiniko ny anarako lehibe izay voala baraka, eny amin'ny firenena nanalanareo baraka azy, dia ho fantatry ny firenena fa Tompo Iaveh aho - teny marin'ny Tompo Iaveh, rahefa manamasin-tena ao aminareo, eo imasony aho.
24 Halaiko avy any amin'ny firenena hianareo, hangoniko avy any amin'ny tany rehetra ka hampodiko eo amin'ny taninareo.
25 Hofafazako rano madio hianareo, dia hadio; ny fahalotoanareo rehetra mbamin'ny fahavetavetanareo rehetra, hataoko afaka aminareo.
26 Homeko fo vaovao hianareo, ary hasiako fanahy vaovao ao anatinareo; hesoriko amin'ny nofonareo ny fo vato, ka homeko fo nofo hianareo.
27 Hataoko ao anatinareo ny Fanahiko ary hataoko manaraka ny fitsipiko hianareo, ka hitandrina ny didiko, sy hanaraka izany.
28 Honina eo amin'ny tany nomeko ny razanareo hianareo, dia ho vahoakako hianareo, ary izaho ho Andriamanitrareo.
29 Hovonjeko hianareo ho afaka amin'ny lotonareo rehetra; hantsoiko ny vary, ary hataoko ho be dia be, ary tsy haniraka mosary aminareo intsony aho.
30 Hampitomboiko ny voankazo, mbamin'ny vokatry ny saha, mba tsy hitondranareo intsony latsa ama-mosary eo amin'ny firenena.
31 Hahatsiaro ny lalan-dratsinareo hianareo mbamin'ny asa tsy mety nataonareo, ka haharikoriko anareo ny tenanareo, noho ny hadisoanareo amam-pahavetavetanareo.
32 Tsy noho ny aminareo no anaovako izany, - teny marin'ny Tompo Iaveh, - ka aoka ho azonareo izany; aoka ho menatra sy hivoaramena hianareo, noho ny nataonareo, ry taranak'Israely.
33 Izao no lazain'ny Tompo Iaveh: Amin'ny andro hanadiovako anareo ho afaka amin'ny helokareo rehetra, dia haveriko ho amin'ny tanànany ny mponina ao aminy, ary ny efa rava haorina indray.
34 Ny tany voarava, hasaina, izy izay efa tany lao teo imason'ny mpandalo rehetra.
35 Holazaina hoe: io tany io efa foana teo, nanjary hoatra ny sahan'i Edena, ary ny tanàna efa rava, lao, nirodana, efa misy mponina hoatra ny tanàna mimanda.
36 Ary ho fantatry ny firenena sisa tavela manodidina anareo, fa izaho Iaveh dia nanorina indray ny efa rava, namboly ny efa fongotra. Izaho Iaveh sady nilaza no manatanteraka!
37 Izao no lazain'ny Tompo Iaveh: Amin'izao koa aho no mba hety hotadiavin'ny taranak'Israely, mba hanaovako izany ho fanasoavana azy: hohamaroiko toy ny biby fiompy ny olona.
38 Toy ny andian'ondry masina, toy ny andian'ondry any Jerosalema, amin'ny fetiny lehibe, ny olona hanao andiany, hameno ny tanàna rava; dia ho fantatry ny olona fa Iaveh aho.