Bokin'i Ezekiela

Toko faha-37

¹ Tonga tamiko ny tànan'ny Tompo ka nentin'ny Tompo nivoaka am-panahy aho, dia napetrany teo amin'ny tany lemaka feno taolana.

² Nentiny nandeha teo akaikin'ireo manodidina azy aho. Be dia be izy ireo teo an-tampon'ity tany lemaka, sady maina dia maina. ³ Ary hoy izy tamiko: Ry zanak'olona, mbola ho velona va ireo taolana ireo? Ka hoy ny navaliko azy: Iaveh Tompo ô, hianao no mahalala! ⁴ Dia hoy izy tamiko: Aminanio ireo taolana ireo, ka ataovy aminy hoe: Ry taola-maina, mihainoa ny tenin'ny Tompo!

⁵ Izao no lazain'ny Tompo Iaveh amin'ireto taolana ireto: Indro hampiditra fanahy ao aminareo aho, dia ho velona hianareo. ⁶ Hasiako hozatra eo aminareo, hampaniriako nofo eo aminareo, hovelarako hoditra eo amboninareo, ary hasiako fanahy ao aminareo, dia ho velona hianareo; ka ho fantatrareo fa Iaveh aho. ⁷ Dia naminany araka ny teny azoko aho; ka nony naminany, dia nisy feo re, dia injany zavatra mitatatata; dia nifanatona ireo taolana.

⁸ Nojereko ka indro fa nisy hozatra ama-nofo naniry teo ambonin'ireo ary nisy hoditra nivelatra teo ambonin'ireo ary nisy hoditra nivelatra teo ambonin'ireo; saingy tsy mbola nisy fanahy teo aminy. ⁹ Ary hoy izy tamiko: Maminania amin'ny fanahy; maminania, ry zanak'olona, ka lazao amin'ny fanahy hoe: Izao no lazain'ny Tompo Iaveh: Avia, ry fanahy avy any amin'ny vazan-tany efatra; tsotsofy ireto olona voavono ireto, ary aoka ho velona izy. ¹⁰ Dia naminany araka ny nandidiany ahy aho, ka niditra tamin'ireo ny fanahy, dia velona izy, sady nitsangana tamin'ny tongony: tafika lehibe, tena lehibe indrindra. ¹¹ Hoy izy tamiko: Ry zanak'olona, ireo taolana ireo, dia ny taranak'Israely rehetra. Indreo izy ireo manao hoe: Maina ny taolanay; levona ny fanantenanay, very izahay!

¹² Koa maminania, ary lazao aminy hoe: Izao no lazain'ny Tompo Iaveh: Indro aho hanokatra ny fasanareo, hampiakatra anareo avy ao am-pasanareo, ry vahoakako ô, ary hitondra anareo ho eo amin'ny tanin'Israely. ¹³ Ary dia ho fantatrareo fa Iaveh aho, rahefa voasokatro ny fasanareo, ary tafakatra avy ao am-pasanareo hianareo, ry vahoakako. ¹⁴ Hataoko ao anatinareo ny fanahiko, dia ho velona hianareo, sady homeko fitsaharana eo amin'ny taninareo ka dia ho fantatrareo fa izaho Iaveh dia milaza sy manatanteraka koa, - teny marin'ny Tompo. ¹⁵ Tonga tamiko ny tenin'ny Tompo, nanao hoe:

¹⁶ Ary hianao, ry zanak'olona, maka hazo iray, asio soratra hoe: Ho an'i Jodà sy ho an'ny zanak'Israely tafakambana aminy. Dia makà hazo iray hafa koa, asio soratra hoe: Ho an'i Josefa; ka ho hazon'i Efraima sy ny taranak'Israely rehetra tafakambana aminy izany. ¹⁷ Ampifanatony izy roa, mba ho hazo iray ihany, ka ho iray ihany izy eny an-tànanao. ¹⁸ Ary raha hiteny aminao ny zanaky ny firenenao, hanao hoe: Tsy ho voasanao aminay va, izay ambaran'izany araka ny hevitrao? ¹⁹ lazao aminy hoe: Izao no lazain'ny Tompo Iaveh: Indro fa alaiko ny hazon'i Josefa, eny an-tànan'i Efraima sy ny firenen'Israely izay tafakambana aminy, ka hakambako amin'ny hazon'i Jodà izy, dia hataoko hazo iray ihany, sy ho iray tokoa eo an-tànako izy ireo. ²⁰ Ho eny an-tànanao, eo imasony, ireo hazo hosoratanao.

²¹ Ary lazao aminy hoe: Izao no lazain'ny Tompo Iaveh: Indro halaiko any amin'ny firenena nalehany, ny zanak'Israely; hangoniko avy any rehetra any izy, dia hoentiko miverina eo amin'ny taniny. ²² Hataoko firenena iray ihany eo amin'ny tany, eo ambonin'ny tendrombohitr'Israely, izy; mpanjaka iray ihany no hanjaka amin'izy rehetra; tsy ho firenena roa intsony izy, na tafasaraka ho fanjakana roa. ²³ Tsy handoto tena intsony izy, na amin'ny sampiny vetaveta, na amin'ny fahavetavetany, na amin'ny hadisoany rehetra; hovonjeko ho afaka amin'ny fiodinany rehetra nanotany izy, ary hodioviko; izy ireo ho vahoakako, ary izaho ho Andriamaniny. ²⁴ Davida mpanompoko no ho mpanjakany; ary izy rehetra hiray mpiandry, hanaraka ny fitsipiko, hitandrina ny didiko, ary hanaraka izany. ²⁵ Honina eo amin'ny tany nomeko an'i Jakoba mpanompoko sy nonenan'ny razany, izy ireo; dia honina eo izy mbamin'ny zanany sy ny zanaky ny zanany mandrakizay, ary Davida mpanompoko no ho mpanapaka azy mandrakizay. ²⁶ Sady hanao fanekem-pihavanana amin'izy ireo aho, ka ho fanekena aminy mandrakizay izany; ary izaho hanorina azy, hampitombo azy, ary hanangana ny fitoerako masina eo aminy mandrakizay. ²⁷ Ny fonenako, ho eo ambonin'izy ireo; izaho ho Andriamaniny; ary izy ho vahoakako. ²⁸ Dia ho fantatry ny firenena fa Iaveh aho manamasina an'Israely, rahefa ho eo aminy mandrakizay ny fitoerako masina.