Ny Fanisana

Toko faha-14

¹ Dia nanandra-peo nikiakiaka ny fiangonana rehetra, ka nitomany ny vahoaka nandritra iny alina iny.

² Nimonomonona tamin'i Moizy sy Aarona ny zanak'Israely rehetra, ka hoy ny fiangonana rehetra tamin'izy ireo: Inay anie izahay maty tany an-tany Ejipta, na inay anie izahay maty aty amin'ity efitra ity. ³ Nahoana no dia nentin'ny Tompo amin'ity tany ity isika, ka ho lavon-tsabatra? Ary ny vady aman-janatsika holasan-ko babo. Tsy aleontsika va miverina ho any Ejipta? ⁴ Dia nifampilaza hoe izy: Andeha hifidy mpitarika isika, ka hiverina any Ejipta. ⁵ Nidaboka niankohoka teo anatrehan'ny fiangonan'ny zanak'Israely rehetra tafavory Moizy sy Aarona.

⁶ Nandritra ny fitafiany Josoe, zanak'i Nòna, sy Kaleba, zanak'i Jefone, anisan'ireo nisafo ny tany, ⁷ ary niteny toy izao tamin'ny fiangonan'ny zanak'Israely rehetra izy ireo: Tany tsara indrindra ny tany notetezinay nosafoina. ⁸ Raha ankasitrahan'ny Tompo isika, dia hampiditra antsika amin'izany tany izany izany izy sy hanome azy antsika; tany tondra-dronono aman-tantely izany. ⁹ Fa aza miodina amin'ny Tompo kosa hianareo, ary aza matahotra ny olona amin'izany tany izany, fa ho fihinana ho antsika izy ireo; ny fialofan'izy ireo efa niala taminy, ary isika omban'ny Tompo, ka aza matahotra azy ireo. ¹⁰ Raha ilay niteniteny ny hitora-bato an'ireo iny ny fiangonana rehetra dia indro ny voninahitry ny Tompo niseho teo amin'ny trano lay fihaonana, teo imason'ny zanak'Israely rehetra. ¹¹ Ary hoy Iaveh tamin'i Moizy: Mandra-pahoviana no haniratsiran'ity vahoaka ity ahy? Ary mandra-pahoviana no tsy hinoany ahy, na dia eo aza ny fahagagana rehetra nataoko teo afovoany?

¹² Hasiako amin'ny pesta sy hofongorako izy, ary hianao, dia hataoko firenena lehibe sy mahery lavitra noho izy. ¹³ Fa hoy Moizy tamin'ny Tompo: Efa ren'ny Ejipsianina, fa ny herinao no nitondranao ity vahoaka ity niakatra avy tany afovoany; ary efa nolazainy tamin'ny mponina amin'ity tany ity izany.

¹⁴ Efa ren'izy ireo, fa hianao Iaveh no eo afovoan'ity vahoaka ity, hianao Iaveh no miseho mifanatrika ao; ary ny rahonao no mijanona eo amboniny. Hianao no mandeha eo alohany, amin'ny andry rahona, ny antoandro, ary amin'ny andry afo, ny alina. ¹⁵ Koa raha vonoinao toy ny singan'olona ity vahoaka ity, ny firenena izay nandre filazana momba anao dia hanao hoe: ¹⁶ Tsy zakan'ny Tompo ny nampiditra iny vahoaka iny amin'ny tany efa nianianany homena azy, ka izany no namonoany azy tany an'efitra. ¹⁷ Koa ankehitriny, aoka hiseho ho lehibe ny fahefan'ny Tompo, araka ilay voalazanao hoe: ¹⁸ Ela vao mitezitra Iaveh, ary sesehena ny hatsaram-pony: mamela ny heloka sy ny fahotana izy, nefa tsy ataony ho tsy manan-tsiny ny meloka, fa mamaly ny heloky ny ray amin'ny zanaka, hatramin'ny taranaka fahatelo sy fahefatra. ¹⁹ Avelao ny helok'ity vahoaka ity, araka ny halehiben'ny famindramponao toy ny efa namelanao an'ity vahoaka ity, hatrany Ejipta ka hatr'eto! ²⁰ Ary hoy Iaveh: Mamela araka ny hatakao aho;

²¹ kanefa velona aho, ary ho feno ny voninahitry ny Tompo ny tany rehetra! ²² Ka ireo olona rehetra nahita ny voninahitro amam-pahagagana nataoko tany Ejipta sy tany an'efitra; ireo izay efa naka fanahy ahy impolo sahady, sady tsy nihaino ny feoko, ²³ dia tsy hahita mihitsy ny tany nampanantenaiko ny razany tamim-pianianana. Tsy misy hahita izany ireo naniratsira ahy ireo. ²⁴ Fa i Kaleba mpanompoko kosa, izay nanana hevitra hafa, ary niraikitra tsy nivadika tamiko, dia hampidiriko any amin'ny tany efa nalehany, ary hanana izany ny taranany. ²⁵ Ny Amalesita sy ny Kananeana no monina amin'ny lohasaha; koa rahampitso mihodìna hianareo ary miaingà ho any an'efitra amin'ny làlan'ny ranomasina Mena. ²⁶ Niteny tamin'i Moizy sy Aarona Iaveh ka nanao hoe:

²⁷ Mandra-pahoviana no handeferako ity fiangonana ratsy mimonomonona amiko ity? Reko ny fimonomononana ataon'ny zanak'Israely amiko. ²⁸ Lazao amin'izy ireo hoe: Velona aho, hoy Iaveh; hataoko aminareo izay noteneninareo tamin'ny sofiko. ²⁹ Hiampatrampatra amin'ity efitra ity ny fatinareo. Hianareo rehetra izay efa nanaovana fanisana ka voaisa, ny efa roapolo taona no ho miakatra, izay efa nimonomonona tamiko, ³⁰ dia tsy hisy hiditra amin'ny tany izay nianianako fa hamponenana anareo, afa-tsy Kaleba, zanak'i Jefone, sy Josoe zanak'i Nòna. ³¹ Fa ny zanakareo, izay nolazainareo hoe ho lasan-ko babo, no hampidiriko any; dia izy ireo no hahalala ny tany izay nataonareo tsinontsinona. ³² Ny anareo kosa, dia ny fatinareo no hiampatrampatra any an'efitra, ³³ ary ny zanakareo hiroaka ny biby fiompy any an'efitra, mandritra ny efapolo taona, fa hivesatra ny valin'ny fivadihanareo izy mandra-pahalevona ny fatinareo rehetra aty an'efitra. ³⁴ Araka ny efapolo andro nisafoanareo ny tany - fa soloana taona iray ny andro iray, - no hivesaranareo efapolo taona ny hadisoanareo, ka dia ho hitanareo izany hoe fihatahako aminareo. ³⁵ Izany no teniko, izaho Iaveh. Izany no ataoko amin'ity fiangonana ratsy izay niodina tamiko. Ho levona aty an'efitra aty izy, ho faty aty. ³⁶ Ireo lehilahy nirahin'i Moizy hisafo ny tany, ka nampimonomonona ny fiangonana rehetra taminy nony tafaverina, fa nanao laza ratsy ny tany,

³⁷ ireo lehilahy ireo izay nanao laza ratsy ny tany dia maty voan'ny loza teo anatrehan'ny Tompo. ³⁸ Josoe zanak'i Nòna sy Kaleba zanak'i Jefone ihany no velona tamin'ireo lehilahy nisafo ny tany. ³⁹ Dia nolazain'i Moizy tamin'ny zanak'Israely rehetra izany teny izany, ka safotr'alahelo mafy ny vahoaka.

⁴⁰ Nifoha maraina koa izy ireo, ka niakatra tany an-tampon'ny tendrombohitra, ka nanao hoe: Indreto izahay hiakatra any amin'ny fitoerana voalazan'ny Tompo, fa efa nanota izahay. ⁴¹ Hoy Moizy: Nahoana hianareo no mandika ny didin'ny Tompo? Tsy hahomby hianareo amin'izany. ⁴² Aza miakatra, fa tsy eo afovoanareo Iaveh, ka aza mitolo-batana ho resin'ny fahavalonareo. ⁴³ Eo anoloanareo eo ny Amalesita sy ny Kananeana, ka ho lavon'ny sabatra hianareo, satria nivily tsy hanaraka an'ny Tompo hianareo, ka tsy homba anareo Iaveh. ⁴⁴ Nanao ditra niakatra teo an-tampon'ny tendrombohitra ihany izy ireo, nefa ny fiaran'ny faneken'ny Tompo ary Moizy tsy niala teo afovoan'ny toby; ⁴⁵ ka nirotsahan'ny Amalesita sy ny Kananeana izay nonina tamin'izany tendrombohitra izany izy, dia nasiany sy nataony lambam-bary hatrany Hormà.