Ny Fanisana

Toko faha-2

¹ Ary niteny tamin'i Moizy Iaveh nanao hoe:

² Ny zanak'Israely dia samy hitoby eo akaikin'ny fanevany, sy ho eo ampototry ny sainan'ny fokom-pianakaviany avy. Manandrify sy manodidina ny trano lay fihaonana no hitobian'izy ireo. ³ Ny fanevan'ny tobin'i Jodà no hiorin-dasy eo anoloany eo amin'ny lafiny atsinanana mbamin'ny antokony avy. Ny filohan'ny taranak'i Jodà dia Nahasona zanak'i Aminadaba

⁴ ary enin-jato amby efatra arivo sy fito alina ny antoko-miaramilany araka ny lehilahy voaisa. ⁵ Ny fokon'Isakara no hitoby eo anilany. Ny filohan'ny taranak'Isakara dia Natanaela zanak'i Soara, ⁶ ary efa-jato amby efatra arivo sy dimy alina ny antoko-miaramilany, araka ny lehilahy voaisa. ⁷ Manaraka nizany dia ny fokon'i Zabolona. Ny filohan'ny taranak'i Zabolona dia Eliaba zanak'i Helona, ⁸ ary efa-jato amby fito arivo sy dimy alina ny antoko-miaramilany araka ny lehilahy voaisa. ⁹ Araka ny lehilahy voaisa dia efa-jato amby enina arivo sy valo alina sy iray hetsy no totalin'ny eo amin'ny tobin'i Jodà, araka ny antokony avy. Ireo no ho lohalàlana rahefa hiainga. ¹⁰ Ny fanevan'ny tobin-dRobena no ho eo amin'ny lafiny atsimo; mbamin'ny antokony avy. Ny filohan'ny tarana-dRobena dia Elizora zanak'i Sedeora.

¹¹ Ary diman-jato amby enina arivo sy efatra alina ny antoko-miaramilany, araka ny lehilahy voaisa. ¹² Ny fokon'i Simeona no hitoby eo anilany. Ny filohan'ny taranak'i Simeona, dia Salamiela zanak'i Sorisadaia; ¹³ ary telon-jato amby sivy arivo sy dimy alina ny antoko-miaramilany, araka ny lehilahy voaisa. ¹⁴ Manaraka izany dia ny fokon'i Gada. Ny filohan'ny taranak'i Gada dia Eliazafa zanak'i Doela, ¹⁵ ary dimam-polo amby enin-jato sy dimy arivo sy efatra alina ny antoko-miaramilany, araka ny lehilahy voaisa. ¹⁶ Ka dia dimam-polo amby efa-jato sy arivo sy dimy alina sy iray hetsy no totalin'ny eo amin'ny tobin-dRobena, araka ny lehilahy voaisa manaraka ny antokony avy. Ireo no ho laharana faharoa eny an-dàlana. ¹⁷ Izay vao handroso ny trano lay fihaonana, ny antokon'ny Levita eo afovoan'ny toby rehetra. Ary araka ny filaharany eo an-dasy ihany no ho fandehany eny an-dàlana koa, samy eo an-daharany manaraka ny fanevany avy.

¹⁸ Ny fanevan'i Efraima no ho eo andrefana, mbamin'ny antokony. Ny filohan'ny taranak'i Efraima, dia Elisamà zanak'i Amioda;

¹⁹ ary diman-jato amby efatra alina ny antoko-miaramilany, araka ny lehilahy voaisa. ²⁰ Ny fokon'i Manase no hitoby eo anilany. Ny filohan'ny taranak'i Manase dia Gamaliela zanak'i Fadasora, ²¹ ary roan-jato amby roa arivo sy telo alina ny antoko-miaramilany, araka ny lehilahy voaisa. ²² Manaraka izany, dia ny fokon'i Benjamina. Ny filohan'ny taranak'i Benjamina dia Abidàna zanak'i Jedeona, ²³ ary efa-jato amby dimy arivo sy telo alina ny antoko-miaramilany, araka ny lehilahy voaisa. ²⁴ Ka dia zato amby valo arivo sy iray hetsy no totalin'ny eo amin'ny tobin'i Efraima, araka ny lehilahy voaisa, manaraka ny antokony avy. Ireo no laharana fahatelo eny an-dàlana. ²⁵ Ny fanevan'ny tobin'i Dana no ho eo avaratra, mbamin'ny antokony. Ny filohan'ny taranak'i Dana dia Ahiesera zanak'i Amisadaìa;

²⁶ ary fiton-jato amby roa arivo sy enina alina ny antoko-miaramilany, araka ny lehilahy voaisa. ²⁷ Ny fokon'i Asera no hitoby eo anilany. Ny filohan'ny taranak'i Asera dia Fegiela zanak'i Okrana, ²⁸ ary diman-jato amby arivo sy efatra alina ny antoko-miaramilany, araka ny lehilahy voaisa. ²⁹ Manaraka izany dia ny fokon'i Neftalì. Ny filohan'ny taranak'i Neftalì dia Ahira zanak'i Enàna, ³⁰ ary efa-jato amby telo arivo sy dimy alina ny antoko-miaramilany, araka ny lehilahy voaisa. ³¹ Ka dia enin-jato amby fito arivo sy dimy alina sy iray hetsy no tontalin'ny eo amin'ny tobin'i Dana, araka ny lehilahy voaisa. Ireo kosa no ho vody làlana manaraka ny fanevany avy. ³² Ireo no isan'ny zanak'Israely voasoratra tamin'ny fanisana azy, araka ny fokom-pianakaviany avy. Dimam-polo amby diman-jato sy telo arivo sy enina hetsy no tontalin'ny lehilahy voaisa, voatokotoko isan-tobiny araka ny antoko-miaramilany avy.

³³ Tsy anisan'ny voaisa niaraka tamin'ny zanak'Israely ny levita, araka ny nandidian'ny Tompo an'i Moizy. ³⁴ Notanterahin'ny zanak'Israely avokoa izay rehetra nandidian'ny Tompo an'i Moizy. Toy izany no nitobiany samy araka ny fanevany avy. Toy izany no nilaharany teo am-pandehanana araka ny fianakaviany avy sy ny fokom-pianakaviany avy.