Ny Fanisana
Toko faha-34
1 Niteny tamin'i Moizy Iaveh nanao hoe:2 Mandidia ny zanak'Israely ka lazao aminy hoe: Rahefa tafiditra any amin'ny tany Kanaana hianareo, izao no tany ho tonga zara taninareo: ny tany Kanaana araka ny mamaritra azy. 3 Ny lafiny atsimo amin'ny taninareo dia ny efitra Sina, hatrany Edoma, ka ny faritrareo atsimo dia hatramin'ny faran'ny ranomasin-Tsira any atsinanana,
4 dia miolaka mianatsimo amin'ny fiakarana Akrabima ny faritrareo, dia mandalo any Sina, mandroso hatrany atsimon'i Kadesy-Barne, mitohy amin'ny Hatsar-Adar, mihazo any Asemona, 5 ary hatreo Asemona, dia mipaka hatrany amin'ny riakan'i Ejipta, sy mihatra amin'ny ranomasina. 6 Ny faritra andrefana kosa, dia ny ranomasina Lehibe no ho faritrareo; io no hamaritra anareo amin'ny andrefana.
7 Izao no sisin-taninareo amin'ny avaratra. Avy ao amin'ny ranomasina Lehibe, dia hofaritanareo mihazo any an-tendrombohitra Hora;
8 avy ao an-tendrombohitra Hora, dia hofaritanareo mankao amin'ny vavahadin'i Hamata ka tonga hatrany sedada io faritra io; 9 dia hitohy amin'ny Jofrona sy ho tafapaka any Hatsar-Enàna: izany no ho faritrareo amin'ny avaratra. 10 Ny sisin-taninareo any atsinanana dia hatreo Hatsar-Enàna ka hatrany Sefama;
11 ary ny faritra dia midina avy eo Sefama mankany Reblà, atsinanan'i Aïna; dia mbola midina mitohy manaraka ny havoana eo an-tsisin'ny ranomasina Kenereta any atsinanana, 12 ary midina ny faritra manaraka ny moron'i Jordany ka tafapaka hatramin'ny ranomasin-Tsira. Izany no ho taninareo araka ny faritra manodidina azy. 13 Izao no nandidian'i Moizy ny zanak'Israely nataony hoe: Izany no tany hozarainareo amin'ny filokana sy nodidian'ny Tompo homena ny foko sivy sy ny antsasa-poko.
14 Fa ny fokon'ny zana-dRobena araka ny fokom-pianakaviny avy, sy ny fokon'ny zanak'i Gada, araka ny fokom-pianakaviany avy, dia efa samy nandray ny azy, ny antsasaky ny fokon'i Manase efa nandray ny lovany. 15 Samy efa naka ny anjara lovany aty an-dafin'i Jordany hitsin'i Jerikao amin'ny lafiny any atsinanana, amin'izay iposahan'ny masoandro, ny foko roa sy ny antsasa-poko. 16 Ary niteny tamin'i Moizy Iaveh nanao hoe:
17 Izao no anaran'ny lehilahy hizara ny tany aminareo: Eleazara, mpisorona, sy Josoe, zanak'i Nòna. 18 Ary lehilahy iray isam-poko no halainareo hizara ny tany, 19 ka izao no anaran'ireo lahilahy ireo: Kaleba zanak'i Jefone, amin'ny fokon'i Jodà, 20 Samoela, zanak'i Amioda amin'ny fokon'i Simeona, 21 Elidada, zanak'i Kaslona amin'ny fokon'i Benjamina. 22 Baoksy izay filohany, zanak'i Jogly amin'ny fokon'ny zanak'i Dana. 23 Ny amin'ny zanak'i Josefa: Haniela izay filohany, zanak'i Efoda, amin'ny fokon 'ny zanak'i Manase; 24 ary Kamoela izay filohany, zanak'i Seftàna amin'ny fokon 'ny zanak'i Efraima; 25 Elisafàna, izay filohany, zanak'i Farnàka, amin'ny fokon'ny zanak'i Zabolona; 26 Faltiela izay filohany, zanak'i Azana, amin'ny fokon'ny zanak'Isakara; 27 Ahioda izay filohany, zanak'i Salomy, amin'ny fokon'ny zanak'i Asera; 28 Fedaela izay filohany, zanak'i Amioda, amin'ny fokon'ny zanak'i Neftalì. 29 Ireo no nodidian'ny Tompo hizara ny tany Kanaana amin'ny zanak'Israely.