Epistolan'i Md. Paoly Ho An'ny Hebrio

Toko faha-10

¹ Ny Lalàna moa dia tsy misy afa-tsy aloky ny soa ho avy, fa tsy ny tena endri-javatra, ka ireny sorona tsy niova sy fanatitra isan-taona ireny dia tsy nahalavorariany izay olona nanatona velively akory.

² Raha tsy izany, tsy ho nitsahatra nanatitra va ny olona: satria rahefa voadio indray mandeha ny mpanatitra, dia tsy ho nahare intsony hoe nanota izy tamin'ny fieritreretany. ³ Nefa isan-taona dia nahatsiaro ny fahotany ihany ny olona tamin'ireny sorona ireny, ⁴ satria aiza izay ran-janak'omby sy ran'osilahy no hahafaka ny fahotana? ⁵ Noho izany indrindra, nony niditra tamin'izao tontolo izao ny Kristy dia nanao hoe: Tsy nilainao ny sorona sy ny fanatitra, fa namboatra vatana ho ahy hianao; ⁶ tsy sitrakao ny sorona dorana sy ny sorona noho ny ota, ⁷ ka hoy aho hoe: Inty aho tonga - fa izaho no voalaza ao amin'ny horonam-boky - hanao ny sitra-ponao, Andriamanitra ô! ⁸ Voalohany aloha lazainy hoe: Samy tsy nilainao sy tsy sitrakao na ny fanatitra na ny sorona dorana, na ny sorona noho ny ota, - dia zavatra natolotra araka ny Lalàna avokoa ireny; - ⁹ manaraka izany tohiziny hoe: Inty aho tonga hanao ny sitra-ponao; ka manafoana ny voalohany izy amin'izany mba hanorenany ny faharoa, ¹⁰ ary ny herin'izany sitra-po izany no nanamasinana antsika, tamin'ny nanoloran'i Jesoa-Kristy ny vatany indray mandeha monja. ¹¹ Ary ny mpisorona rehetra dia mijoro isan'andro hanao ny raharahany, sy manolotra matetika ireny sorona tsy nahafa-pahotana akory ireny;

¹² fa izy kosa indray mandeha monja no nanolotra sorona noho ny ota, dia mipetraka mandrakizay eo an-kavanan'Andriamanitra; ¹³ ka hatramin'izao izy dia miandry ny hanaovana ny fahavalony ho fitoeran-tongony rahatrizay. ¹⁴ Fanatitra iray monja dia ampy handavorariany mandrakizay izay nohamasininy. ¹⁵ Ary asehon'ny Fanahy Masina amintsika koa izany; fa rahefa voalazany hoe: ¹⁶ Fanekena toy izao no hataoko amin'ny finakavian'Israely rahefa afaka izany andro izany, dia hoy indray ny Tompo: Halatsako ao an-tsainy ny lalàko, ary hosoratako ao am-pony, ¹⁷ ka havelako ny hadisoany, ary tsy hotsaroako ny fahotany; ¹⁸ ka rahefa voavela ny fahotana, dia tsy ilaina intsony ny sorona noho ny ota. ¹⁹ Koa amin'izany, ry rahalahy, noho ny ran'i Jesoa, izay nahafaka malalaka antsika hiditra amin'ny fitoerana masina,

²⁰ mihazo ny làlam-baovao sy velona nosantarany ho antsika mamaky ny efitra lamba, izany hoe ny nofony, ²¹ sy noho isika manana Mpisorombe mitandrina ny tranon'Andriamanitra, ²² dia aoka isika hanatona amin'ny fo mahitsy sy amim-pinoana feno, ary amin'ny fo voafafy ho afaka amin'ny fieritreretana mipentina ota, sy amin'ny vatana voasasa tamin'ny rano madio. ²³ Aoka isika hitoetra tsy azo hozongozonina amin'ny fanarahana ny fanantenantsika, fa mahatoky ilay nanao ny fampanantenana. ²⁴ Ary aoka hifandinika isika mba hampandroso ny fitiavana sy ny asa soa. ²⁵ Aza manary ny fiangonantsika, toy ny fanaon'ny sasany; fa mifamporisiha tsara, indrindra izao hitanareo fa efa antomotra ny andro. ²⁶ Satria rahefa mahalala ny marina isika no minia manota indray, dia tsy misy sorona hafa noho ny ota intsony;

²⁷ fa dia fiandrasana mahatsiravina ny fitsarana sy hatezeran'ny afo handevona ny mpikomy no sisa. ²⁸ novonoina tsy nasiana famindram-po akory izay nandika ny Lalàn'i Moizy, notondroin'ny vavolombelona roa na telo/ ²⁹ mba toy inona kosa àry no hamafin'ny fampijaliana heverinareo ho tandrifin'izay nanitsakitsaka ny Zanak'Andriamanitra, sy nanao ho zavatra tsy masina ny ran'ny fanekena nanamasinana azy, ary nanevateva ny Fanahin'ny fahasoavana? ³⁰ Fa fantatsika ilay nilaza hoe: Ahy ny famaliana, izaho no hamaly. Ary koa: Ny Tompo hitsara ny vahoakany. ³¹ Zavatra mahatsiravina re izany ho azon'ny tànan'Andriamanitra velona! ³² Tsarovy ny andro fahiny, niaretanareo ady mafy tamim-pijaliana, nony efa nohazavaina hianareo;

³³ fa mbetika nalam-baràka sy nampahoriana hianareo sady naseho ho fizàhan'ny olona; mbetika kosa niaraka ory tamin'izay nampijalina toy izany. ³⁴ Fa sady nangoraka izay nifatotra hianareo no nanaiky an-kafaliana ny fandrobana ny fanananareo, satria fantatrareo fa manam-pananana tsara lavitra sy maharitra mandrakizay hianareo. ³⁵ Koa aza miala amin'ny fahasahianareo, fa misy valiny lehibe izany. ³⁶ Ilainareo tokoa ny faharetana, mba hahazoanareo izay nampanantenaina anareo, rahefa nanao ny sitra-pon'Andriamanitra hianareo. ³⁷ Raha afaka kelikely foana, dia ho tonga ilay ho avy, fa tsy hiatoato izy. ³⁸ Ary ny oloko marina ho velona amin'ny finoana, fa izay mihataka kosa tsy mba ankasitrahan'ny foko. ³⁹ Raha isika, dia tsy mba anisan'izay mihataka ho very isika, fa naman'ireo mino mba hamonjy fanahy.