Ny Jenezy

Toko faha-11

¹ Iray fiteny sy iray fanonona ny tany rehetra.

² Nony nandeha niantsinanana ny olona dia nahita tany lemaka tao amin'ny tany Senaara izy, ka niorim-ponenana teo. ³ Dia nifampilaza izy nanao hoe: Andeha isika hanao biriky, ka handoro azy amin'ny afo. Dia biriky no nataony solom-bato, ary ditin-tany no nataony solon-tsimenitra. ⁴ Hoy koa izy: Andeha isika hanorina tanàna anankiray, ary tilikambo anankiray mahatakatra ny lanitra ny tampony, dia hanangana tsangam-bato ho antsika, fandrao tafaely any ambonin'ny tany rehetra isika. ⁵ Fa nidina kosa Iaveh hizaha ny tanàna aman-tilikambo nataon'ny zanak'olombelona. ⁶ Dia hoy Iaveh: Indro firenena iray izy ireo ary fiteny iray no iraisan'izy rehetra, ary ity asa ity no iandohan'izay tiany hatao; amin'izao dia tsy hisy na inona na inona hisakana azy tsy hanatanteraka izay kasainy hatao. ⁷ Andeha isika hidina ao ihany ka hanorokoro ny fiteniny mba tsy hifankahazo fiteny intsony izy. ⁸ Dia napariak'Iaveh avy eo izy ireo ho any ambonin'ny tany rehetra, ka nitsahatra tsy nanao ilay tanàna intsony. ⁹ Izany no nanaovana ny anarany hoe Babela, satria tao no nanorokoroan'ny Tompo ny fitenin'ny tany rehetra, ary avy ao no nampielezan'ny Tompo azy ireo ho any ambonin'ny tany rehetra. ¹⁰ Izao no tantaran'i Sema: Efa zato taona Sema, vao niteraka an'i Arfaksada, roa taona taorian'ny safo-drano.

¹¹ Mbola velona diman-jato taona Sema taorian'ny niterahany an'i Arfaksada, sady niteraka zazalahy aman-jazavavy izy. ¹² Rahefa dimy amby telo-polo taona ny andro niainan'i Arfaksada, dia niteraka an'i Sale izy. ¹³ Ary mbola velona telo amby efa-jato taona Arfaksada, taorian'ny niterahany an'i Sale, sady niteraka zazalahy aman-jazavavy izy. ¹⁴ Rahefa telo-polo taona ny andro niainan'i Sale dia niteraka an'i Ebera izy. ¹⁵ Ary mbola velona telo amby efa-jato taona Sale taorian'ny niterahany an'i Ebera, sady niteraka zazalahy aman-jazavavy izy. ¹⁶ Rahefa efatra amby telo-polo taona ny andro niainan'i Ebera dia niteraka an'i Falega izy. ¹⁷ Ary mbola velona telo-polo sy efa-jato taona Ebera, taorian'ny niterahany an'i Falega, sady niteraka zazalahy aman-jazavavy izy. ¹⁸ Rahefa telo-polo taona ny andro niainan'i Falega dia niteraka an'i Reo izy. ¹⁹ Ary mbola velona sivy amby roan-jato taona Falega taorian'ny niterahany an-dReo, sady niteraka zazalahy aman-jazavavy izy.

²⁰ Rahefa roa amby telo-polo taona ny andro niainan-dReo, dia niteraka an'i Saroga izy. ²¹ Ary mbola velona fito sy roan-jato taona Reo, taorian'ny niterahany an'i Saroga, sady niteraka zazalahy aman-jazavavy izy. ²² Rahefa telo-polo taona ny andro niainan'i Saroga dia niteraka an'i Nakora izy. ²³ Ary mbola velona roan-jato taona Saroga, taorian'ny niterahany an'i Nakora, sady niteraka zazalahy aman-jazavavy izy. ²⁴ Rahefa sivy amby roa-polo taona ny andro niainan'i Nakora, dia niteraka an'i Tare izy. ²⁵ Ary mbola velona sivy ambin'ny folo amby zato taona Nakora taorian'ny niterahany an'i Tare, sady niteraka zazalahy aman-jazavavy izy. ²⁶ Rahefa fito-polo taona ny andro niainan'i Tare, dia niteraka an'i Abrama sy Nakora ary Aràna izy. ²⁷ Izao no tantaran'i Tare: Tare niteraka an'i Abrama sy Nakora ary Aràna. Aràna niteraka an'i Lota.

²⁸ Ary Aràna maty teo anatrehan'i Tare rainy, tany amin'ny tany nahaterahany, any Ora any Kaldea. ²⁹ Abrama sy Nakora samy naka vady avy; ka ny anaran'ny vadin'i Abrama dia Saray, ary ny anaran'ny vadin'i Nakora dia Meldà, zanak'i Aràna, rain'i Melkà sy rain'i Jeskà. ³⁰ Ary Saray dia momba; tsy niteraka izy. ³¹ Ary nentin'i Tare Abrama zanany mbamin'i Lota zafiny, zanak'i Aràna, ary Saray, vinantovaviny, vadin'i Abrama zanany; ary niara-nandeha izy ireo niala tany Ora any amin'ny Kaldeana, mba ho any amin'ny tany Kanaana. Nony tonga tao Haràna anefa izy ireo dia nonina tao.

³² Dimy amby roan-jato taona no andro niainan'i Tare, dia maty tao Haràna izy.