Bokin'i Jeremia

Toko faha-49

¹ Teny mamely ny taranak'i Ammona. Izao no lazain'ny Tompo: Tsy manan-taranaka va Israely? Tsy manan-kandova va izy? Ahoana no nangalan'i Melkoma an'i Gada ho azy, sy nakan'ny vahoakany fonenana eo amin'ny tanànany?

² Noho izany, indro avy ny andro, - teny marin'ny Tompo, hampikotrokotrohako ao Raban'ny taranak'i Ammona ny akoran'ady. Dia hanjary antontan-java-drava izy, ary ny zanany hodorana amin'ny afo; ary Israely kosa handova ny an'ireo efa nandova ny azy, - teny marin'ny Tompo.

³ Migogogogoa, ry Hesebona, fa voaroba Hai; Midradradradrà, ry zanakavavin'i Rabah, misikina lasàka, migogogogoa; mivoivoiza manaraka ny fefy; fa nentin-ko sesi-tany Melkoma, mbamin'ny mpisorony amam-panapaka miaraka aminy koa.

⁴ Ahoana no ireharehanao amin'izay lohasahanao, - mahavokatra be hoe ny lohasahanao. - ry zanakavavy mpiodina, izay mitoky amin'ny harenanao, manao hoe: Zovy moa no sahy handroso hamely ahy?

⁵ Indro aho mitondra ny tahotra hamely anao; - tenin'ny Tompo, Iavehn'ny tafika, avy amin'izay rehetra manodidina anao; ka samy horoahina hizotra amin'izay hitsiny avy hianareo, sady tsy hisy hamory izay mandositra akory.

⁶ Rahefa afaka anefa izany mbola hampodiko ny voababo amin'ny taranak'i Ammona, - teny marin'ny Tompo.

⁷ Teny mamely an'i Edoma. Izao no lazain'ny Tompon'ny tafika: Efa tsy misy fahendrena intsony va ao Temana? Lany hevitra va ireo mahira-tsaina? Efa levona va ny fahendren'izy ireo?

⁸ Mandosira, miverena ilàlana, mifitsaha hianareo, ry mponina any Dedana, fa hahatonga fandravana amin'i Esao aho, amin'ny andro amangiako azy.

⁹ Raha mpioty voaloboka no tonga aminao, tsy mamela hotsimponina izy, na dia kely aza, raha mpangalatra tonga alina kosa, mandroba izy, mandra-pahafa-pony.

¹⁰ Fa izaho no nampiboridana an'i Esao, sy nampiharihary ny fiereny, ka tsy afa-miery intsony izy. Ringana avokoa ny taranany, ny rahalahiny, ny mifanakaiky aminy, ka tsy misy intsony izy.

¹¹ Ilaozy ny kambotinao, fa izaho no hamelona azy, ary izaho no aoka hitokian'ny mpitondra-tena ao aminao.

¹² Satria izao no lazain'ny Tompo: Indro, fa izay tsy tokony hisotro amin'ity kapoaka ity dia hisotro marina tokoa; ka hianao kosa ve ho afa-potsiny? Tsia, tsy ho afa-potsiny hianao, fa hisotro azy marina tokoa!

¹³ Satria, izao no efa nianianako tamin'ny tenako, teny marin'ny Tompo: Bosrà dia ho fitalanjonana sy fandatsa, ho tany efitra sady voaozona; ary ny tanànany rehetra ho rava mandrakizay.

¹⁴ Nahazo filazana avy amin'ny Tompo aho, sady nisy iraka nalefa ho any amin'ny firenena hanao hoe: Mivoria hianareo, ary mandehana mamely azy, mitsangàna hianareo mba hiady!

¹⁵ Fa efa nataoko kely bitika hianao eo amin'ny firenena, ataon'ny olona tsy ho zavatra.

¹⁶ Nahasodoka anao ny tahotra nampihorohoroanao ny olona sy ny hambom-ponao, hianao izay monina eny an-tsefatsefa-bato, sady mitoetra eny an-tampon-kavoana. Nefa na hataonao avo toy ny an'ny voromahery aza ny akaninao, dia havariko avy eny hianao, - teny marin'ny Tompo.

¹⁷ Ho zary fitalanjonana Edoma: Ho talanjona avokoa ny mpandalo, sady hisitrisitra, mahita ny feriny rehetra.

¹⁸ Hanahaka ny nandravana an'i Sodoma sy Gomora mbamin'ireo tanàna nanodidina azy izy, hoy Iaveh; ka tsy hisy olona monina ao, na hisy zanak'olombelona hipetraka ao.

¹⁹ Indro izy, miakatra sahala amin'ny liona, avy ao an-kirihitralan'i Jordany izay misy vilona mandrakariva; ka hampandosiriko tampoka hiala ao Edoma, dia ilay voafidiko no hapetrako ao. Fa iza moa no tahaka ahy? Zovy no hihantsy ahy? ary iza moa no mpiandry ondry hifanandrina amiko?

²⁰ Ka henoy ary ny fikasana naraikitry ny Tompo hamelezana an'i Edoma, sy ny hevitra nosaininy hamelezana ny mponina any Temàna: Eny, hotaritarihana hoatra ny ondry malemy izy; eny, hitanàka mihitsy ny taniny fiandrasana biby fiompy.

²¹ Mihorohoro ny tany, azon'ny fiezinezin'ny fianjerany, re hatrany amin'ny ranomasina Mena ny feony miantsoantso.

²² Indro izy misondrotra, miezaka manodidina toy ny voromahery; mamelatra ny elany eny ambonin'i Bosrà; ary ny fon'ireo mpiady maherin'i Edoma, amin'izany andro izany, dia tahaka ny fon'ny vehivavy mihetsi-jaza.

²³ Teny mamely an'i Damasa. Very hevitra Hamata sy Arfada, fa nandre filazan-doza izy, ka nivarahontsan'ny tahotra, mova tsy ny ranomasina misamboaravoara tsy mety mitony.

²⁴ Ketraka i Damasa ka nihodina handositra; azon'ny vadi-po izy; ny fangirifiriana amam-panaintainana manindry azy, tahaka ny vehivavy raha miteraka.

²⁵ Zary haolo manao ahoana re ilay tanàna be voninahitra, i lay tanànam-pahafinaretana sy fifaliana.

²⁶ Koa ho lavo eny amin'ny kianjany ny zatovony, mbamin'ny miaramilany rehetra, ho faty amin'izany andro izany izy ireo, - teny marin'ny Tompon'ny tafika.

²⁷ Handrehitra afo ao anatin'ny mandan'i Damasa aho, ka handevona ny lapan'i Bena-Hadada izany.

²⁸ Teny mamely an'i Sedara sy ireo fanjakan'i Hasora, izay nasian'i Nabokodonozora, mpanjakan'i Babilona. Izao no lazain'ny Tompo: Mitsangàna, mandehana mamely an'i Sedara, aringano ny taranaky ny Atsinanana!

²⁹ Aoka halaina ny lainy sy ny biby fiompiny! hoesorina aminy ny ambain-dainy, mbamin'ny entany rehetra sy ny ramevany! ary aoka hisy hiantsoantso aminy hoe: Misy fangorohoroana hatraiza hatraiza!

³⁰ Manavota aina hianareo, mandosira araka izay tratry ny ainareo, mamitsaha, ry mponina any Hasora! - teny marin'ny Tompo. Fa Nabokodonozora, mpanjakan'i Babilona, namoron-kevitra hamelezana anareo, nanao fikasana hamelezana anareo,

³¹ Mitsangàna, mandehana mamely firenena tsy manana ahiahy, mandry fahizay eo amin'ny fonenany, - teny marin'ny Tompo, dia izay tsy manam-bavahady, na hidy, izay mitoka-monina.

³² Ny ramevany ho babonareo, ny biby fiompiny iray dia marenina, ho remby. Haeliko any amin'ny rivotra rehetra ireo olona mihety fihirifana ireo, ary hahatonga fandravana azy avy hatraiza hatraiza aho, - teny marin'ny Tompo.

³³ Ka dia ho zary fieren'amboadia Hasora, sy ho tany lao mandrakizay; tsy hisy olona monina ao, tsy hisy zanak'olombelona hipetrakao ao akory.

³⁴ Ny tenin'ny Tompo izay natao tamin'i Jeremia mpaminany, ny amin'i Elama, tamin'ny niandohan'ny nanjakan'i Sedesiasa mpanjakan'i Jodà, nanao hoe:

³⁵ Izao no lazain'ny Tompon'ny tafika: Indro fa andeha hotapahako ny tsipìkan'i Elama, izay fototry ny heriny.

³⁶ Hitondra rivotra efatra ho amin'i Elama aho, avy amin'ny lafiny efatry ny lanitra, dia haeliko amin'ireo rivotra rehetra ireo izy; ka tsy hisy firenena tsy ho tongan'ny mpandositra avy ao Elama.

³⁷ Hampangovitra an'i Elama eo anoloan'ny fahavalony aho, sy eo anoloan'izay mitady ny ainy. Hahatonga loza aminy aho, dia ny afon'ny fahatezerako mirehitra, - teny marin'ny Tompo. Ary handefa sabatra eo aorian'izy ireo aho, mandra-pandringako azy.

³⁸ Hapetrako ao Elama ny seza fiandrianako, ka haripako avokoa, na mpanjaka na mpanapaka ao, - teny marin'ny Tompo.

³⁹ Nefa any amin'ny farandro any, hampodiko ny voababo tamin'i Elama, - teny marin'ny Tompo.