Bokin'i Jeremia

Toko faha-9

¹ Iza no mba hampahita ahy, fialofan'ny mpandeha any an'efitra, handaozako ny fireneko, hihatahako amin'izy ireo; satria izy ireo mpijangajanga avokoa, fiangonan'ny mpivadika.

² Manenjan-dela, toy ny tsipìka, handefasan-dainga; tsy amin'ny marina no mampahery azy ao amin'ny tany, fa mivarilavo amin'ny fahotana ihany izy ireo, ary izaho tsy mba fantany, -teny marin'ny Tompo.

³ Samia miaro tena amin'ny sakaizany avy hianareo, ary aza matoky izay rahalahy, na dia iray aza; fa misongona no hany ataon'ny rahalahy rehetra; ary lasa mitati-bolana fanaratsiana avokoa ny sakaiza.

⁴ Izy rehetra samy mifamitaka; tsy mba milaza ny marina; mampiasa lela mandainga, misahirana hanao ratsy.

⁵ Monina eo afovoan'ny minia tsy marina hianao; fa minia tsy marina izy ireo no mandà tsy hahalala ahy, - teny marin'ny Tompo.

⁶ Koa izao no lazain'ny Tompon'ny tafika: Indro aho handrendrika azy amin'ny memy sy hizaha toetra azy; fa inona indray moa no hatao amin'ny zanakavavin'ny vahoakako?

⁷ Longy mahafaty ny lelan'izy ireo; fa lainga no hany alefany; Fihavanana no lazain'ny vavany amin'ny namana, nefa ao anatin'ny fony dia otrika no heveriny hamelezana azy.

⁸ Ka tsy hosaziko va izy amin'izany heloka izany? - teny marin'ny Tompo, ary izay firenena toy izany va, tsy hovaliako?

⁹ Ny tendrombohitra dia hanaovako fitarainana sy fitomaniana, ny tanim-bilona any an'efitra hanaovako hira fisaonana! Fa may ireny, ka ny olona tsy mandalo ao intsony; ny feom-biby fiompy tsy re ao intsony; ny voromanidina amam-biby fiompy nandositra tsy misy intsony.

¹⁰ Ary Jerosalema hataoko korontam-bato, sy fieren'amboadia; ny tanànan'i Jodà koa hataoko lao, tsy misy mponina.

¹¹ Iza no olon-kendry izay mba hahafantatra izao, izay efa nitenenan'ny vavan'ny Tompo, mba hampahalala izao? Nahoana no rava ny tany sy kila tahaka ny efitra, tsy misy olo-mandalo akory?

¹² Dia hoy Iaveh: Satria izy ireo nahafoy ny lalàko, izay nataoko teo anoloany; tsy nihaino ny feoko, sy tsy nanaraka izany.

¹³ Fa nizotra izy ireo araka ny ditran'ny fony, sy nanaraka an'i Baala, izay natoron'ny razany azy.

¹⁴ Noho izany, izao no lazain'ny Tompo Andriamanitr'Israely: Indro ity firenena ity ho fahanako zava-mangidy, hampisotroiko rano misy poizina.

¹⁵ Haeliko any amin'ny firenen-tsamihafa, izay tsy fantatr'izy ireo na ny razany akory, ary halefako hamely azy ny sabatra mandra-pandringako azy.

¹⁶ Izao no lazain'ny Tompon'ny tafika: Mihevera ny hiantsoana izay hiati-dranomaso ka aoka ho tonga izy ireo! Maniraha ho any amin'ireo mahay indrindra, ka aoka ho tonga ireny!

¹⁷ Aoka ho tonga faingana izy, aoka hiventy fidradradradrana amintsika; aoka hijoy ny ranomasontsika, sy hivarina ny ranomaso avy amin'ny hodi-masontsika.

¹⁸ Fa misy feo fidradradradrana re avy ao Siona manao hoe: Indrisy ity isika dia rava, safo-kenatra, tsy maintsy mandao ny tany, satria efa nazera ny tranontsika!

¹⁹ Hianareo vehivavy, mihainoa ny tenin'ny Tompo, ary aoka horaisin'ny sofinareo ny tenin'ny vavany! Ampianaro hira fitomaniana anankiray ny zanakavavinareo, ary samia mampianatra hira fisaonana anankiray ny namany avy.

²⁰ Fa tafanika tamin'ny varavarankelintsika ny fahafatesana, tafiditra ny lapantsika izy, handringana ny zaza eny an-dalambe, sy ny zatovo eny an-kianjam-bahoaka:

²¹ Ataovy hoe: Izao... - teny marin'ny Tompo: Hifitsaka hoatra ny zezika eny an-tsaha, ny fatin'ny olona, sy hoatra ny andalam-bary eo aorian'ny mpijinja, ka tsy misy mpanangona.

²² Izao no lazain'ny Tompo: Aoka ny hendry tsy hirehareha amin'ny fahendreny; ny mahery, tsy hirehareha amin'ny heriny; ny manan-karena, tsy hirehareha amin'ny hareny.

²³ Fa izao no aoka hireharehan'ny mirehareha: Ny ananany saina sy ahalalany ahy. Fa izaho no Iaveh izay manao ny famindram-po, sy ny hitsiny ary ny rariny ety ambonin'ny tany, fa izany no ankasitrahako, - teny marin'ny Tompo.

²⁴ Indro avy ny andro, - teny marin'ny Tompo, izay hamaizako ny voafora rehetra, miaraka amin'ny tsy voafora,

²⁵ dia Ejipta, Jodà, Edoma, ny taranak'i Ammona, Moada, mbamin'izay rehetra miharatra fihirifana, izay monina any an'efitra; satria ny firenena rehetra dia tsy voafora, ary ny taranak'Israely koa, tsy voafora fo.