Bokin'i Jodita

Toko faha-9

¹ Nony lasa izy ireo dia niditra tao an'efitrano fivavahany Jodita, niakanjo malailay, nanisy lavenona ny lohany, nihohoka teo anatrehan'ny Tompo, ary niantso azy, nanao hoe:

² Ry Tompo Andriamanitr'i Simeona raiko ô, izay nanome sabatra azy hamaliany ny olona hafa firenena, nanao an-keriny tamin'ny virjiny anankiray sy nandoto azy ho afa-baraka,

³ hianao izay nanolotra ny vadin'ireny, ho an'ny mpisavika, sy ny zanany vavy ho amin'ny fahandevozana, ary ny fananany rehetra ho anjara babon'ireo mpanomponao, izay nirehi-pahazotoana hiaro ny voninahitrao, mihanta aminao aho, mba ampio ity mpitondra-tena, ry Tompo Andriamanitro ô. ⁴ Hianao no nanao ireo asa mahagaga tamin'ny andro teo aloha, sy namorona ny fikasan'ireo izay nanaraka taty aoriana, ka tanteraka izany noho ny sitraponao. ⁵ Ny làlanao rehetra, voasoritra rahateo; ny fitsaranao koa voalaminao sahady, noho ny fahitanao mialoha. ⁶ Ankehitriny, jereo ity tobin'ny Asiriana, toraky ny nijerenao fahizay ny tobin'ny Ejipsiana izay nitoky tamin'ny kalesiny amam-pitaingin-tsoavaliny, sy tamin'ny habetsahan'ny miaramilany mpiady, fony izy nitam-piadiana nanenjika ny mpanomponao. ⁷ Kanjo nijery ny tobiny hianao ka nesorin'ny aizina ny heriny. ⁸ Ny hantsana nampihitsoka ny tongony, ary ny rano nanafotra azy. ⁹ Ho toy izany koa anie ireto, ry Tompo, fa mitoky amin'ny hamaroany izy ireo, sy amin'ny kalesiny aman-donginy, amin'ny ampingany aman-jana-tsipìkany, ary mitohatoha amin'ny lefony izy. ¹⁰ Tsy fantany fa hianao no Andriamanitray, dia hianao izay manamongomongo ny tafika hatramin'ny voalohany, sy manana anarana hoe Tompo. ¹¹ Aingao, toy ny fahizany taona izany, ny sandrinao, ka montsany amin'ny herinao ny heriny, azerao eo anoloan'ny hatezeranao ny tanjany, fa manampò hiditra an-keriny amin'ny fitoeranao masina ireo, sy handoto ny tabernaklan'ny anaranao, ary hikapa ny tandroky ny otelinao amin'ny sabany. ¹² Ka ny sabany ihany kosa no ataovy mamolona ny avonavon'izany lehilahy izany. ¹³ Aoka hahavoafandrika azy ny fijereny ahy, ary asio amin'ny teny malefaka aloaky ny vavako izy. ¹⁴ Ataovy ampy hery ny foko hanazimbako azy ary ampy tanjaka hamonoako azy. ¹⁵ Fa voninahitra tsy very tadidy ho an'ny anaranao, ny hanjeran'ny tanam-behivavy azy. ¹⁶ Fa ny herinao, ry Tompo, dia tsy mba amin'ny hamaroan'isa, ny sitra-ponao tsy mba miankina amin'izay tanjaky ny soavaly, ary hatramin'ny voalohany dia tsy mba nankasitraka ny mpiavonavona hianao, fa nankamamy mandrakizay ny olona manetry tena sy malemy fanahy kosa. ¹⁷ Ry Andriamanitry ny lanitra ô, Mpahary ny rano sy Tompon'ny zava-boahary rehetra, henoy ity vehivavy mahantra mihanta aminao, sy manankina ny fitokiany amin'ny indrafonao. ¹⁸ Tsarovy ny fanekenao, ry Tompo, ka omeo teny ny vavako, omeo hery ny hevitra voakasako ato am-poko, mba hahatahiry ny fahamasinana natafinao azy ny tranonao, ary mba ho fantatry ny firenena rehetra fa hianao no Andriamanitra ka tsy misy hafa afa-tsy hianao ihany.