Levitika

Toko faha-11

¹ Ary niteny tamin'i Moizy sy Aarona Iaveh nanao tamin'izy ireo hoe:

² Mitenena amin'ny zanak'Israely ka lazao hoe: Izao no ho biby fihinanareo amin'ny biby rehetra eto ambonin'ny tany: ³ Ny biby rehetra mivaky kitro sy misampan-tongotra ary mandinika no hohaninareo; ⁴ fa ny mandinika fotsiny na mivaky kitro fotsiny tsy hohaninareo. Ohatra ny rameva, izay mandinika nefa tsy mivaky kitro, dia ho maloto aminareo. ⁵ Ohatra ny zerboaza, izay mandinika fa tsy mivaky kitro, dia ho maloto aminareo. ⁶ Ohatra ny bitro, izay mandinika fa tsy misampan-tongotra, dia ho maloto aminareo. ⁷ Ohatra ny kisoa, izay mivaky kitro sy misampan-tongotra nefa tsy mandinika, dia ho maloto aminareo. ⁸ Koa aza mihinana ny henany, na mikasika izay fatiny akory, fa maloto aminareo ireny. ⁹ Izao kosa no ho biby fihinanareo, amin'ny biby rehetra ao anaty rano: Izay rehetra misy vombony sy misy kirany ao anaty rano, na ao an-dranomasina, na ao an-drenirano, no hohaninareo.

¹⁰ Fa ho fahavetavetana ho anareo kosa izay tsy misy vombony na kirany, na ny ao an-dranomasina, na ny ao an-drenirano, amin'ny biby rehetra mihetsiketsika ao anaty rano, sy amin'ny zava-manan'aina rehetra misy ao. ¹¹ Ho fahavetavetana aminareo ireny, ka aza mihinana ny henany, ary ataovy ho zava-betaveta ny fatiny. ¹² Izay tsy misy vombony na kirany ao anaty rano, dia ho zava-betaveta avokoa aminareo. ¹³ Amin'ny vorona kosa, dia ireto no ho zava-betaveta ho anareo ka tsy hohanina, fa zava-betaveta:

¹⁴ ny egla, ny arofiray, ny papango, ny fanindry, ny voromahery isan-karazany, ¹⁵ ny goaika isan-karazany; ¹⁶ ny aostritsa, ny tararaka, ny vorondriaka, ny hitsikitsika isan-karazany; ¹⁷ ny vorondolo, ny manarana, ny vorondolobe, ¹⁸ ny gisabe, ny pelikano, ny zipaety, ¹⁹ ny vanobe, ny vano isan-karazany; ny lavasanga, ny ramanavy. ²⁰ Ny biby madinika rehetra manan'elatra, mandia tongotr'efatra, ho zava-betaveta aminareo.

²¹ Amin'ny biby madinika manan'elatra mandia tongotr'efatra anefa, hano ihany izay manam-pingotra ambony faladiany, hitsipihany eo amin'ny tany. ²² Ireto no ho fihinanareo amin'ireny: ny valala isan-karazany, ny solama isan-karazany, ny hargola isan-karazany, ny hagaba isan-karazany. ²³ Fa ny biby hafa manan'elatra mandia tongotr'efatra, dia ho zava-betaveta aminareo avokoa. ²⁴ Izao koa no hahaloto anareo, ka na zovy na zovy hikasika ny fatiny, dia haloto mandra-paharivan'ny andro;

²⁵ ary na zovy na zovy hitondra tapaky ny fatiny dia hanasa ny fitafiany sy haloto mandra-paharivan'ny andro. ²⁶ Ny biby rehetra mivaky kitro, nefa tsy misampan-tongotra sy tsy mandinika, dia haloto aminareo, ka haloto izay rehetra mikasika azy. ²⁷ Amin'ny biby mandia tongotr'efatra, izay mandeha amin'ny faladiany dia haloto aminareo, ka haloto mandra-paharivan'ny andro izay rehetra mikasika ny fatiny; ²⁸ ary izay rehetra nitondra ny fatiny dia hanasa ny fitafiany sy haloto mandra-paharivan'ny andro. Ho zava-maloto aminareo ireo biby ireo. ²⁹ Amin'ny biby madinika mandady amin'ny tany, ireto no ho maloto aminareo: ny kionkiona, ny totozy, ny androngo isan-karazany;

³⁰ ny mosaraina, ny tanalahy, ny salamandry, ny tsatsaka, ary ny taopy. ³¹ Ireo no ho maloto aminareo amin'ny biby mandady; ka haloto mandra-paharivan'ny andro izay rehetra mikasika ny fatin'ireo. ³² Haloto avokoa ny zavatra ilatsahan'ny fatin'ireo, na fanaka hazo, na fitafiana, na hoditra, na lasaka, na inona na inona zavatra ampiasaina, ka hapetraka ao anaty rano izany ary haloto mandra-paharivan'ny andro, vao hadio. ³³ Ary raha misy zavatra avy amin'ireny sendra tafalatsaka ao anatin'ny vilany tany, dia haloto avokoa izay rehetra ao anatin'ny vilany, ka homontsaninareo ny vilany. ³⁴ Haloto ny zava-pihinana rehetra nandrahoina tamin'ny rano, haloto ny zava-pisotro izay isotroana na inona tavy misy azy. ³⁵ Haloto avokoa ny fanaka ilatsahan-javatra avy amin'ny fatin'ireny, ka ravàna ny lafaoro mbamin'ny vilany aman-tsarony, fa haloto izy, ka hataonareo ho zava-maloto. ³⁶ Ny loharano anefa mbamin'ny lavaka fantsakana izay fiangonan-drano, dia hitoetra ho madio ihany, fa izay mikasika ny fatin-javatra no haloto. ³⁷ Raha voa hafafy no ilatsahan-javatra avy amin'ny fatin'ireny, dia hitoetra ho madio ihany; ³⁸ raha nasian-drano anefa ny voa hafafy, no nianjeran-javatra avy amin'ny fatin'ireny, dia hataonareo ho zava-maloto. ³⁹ Raha biby azonareo hanin-kena no maty, izay mikasika ny fatiny haloto mandra-paharivan'ny andro,

⁴⁰ ary izay mihinana ny fatiny, hanasa ny fitafiany sy haloto mandra-paharivan'ny andro; izay hitondra ny fatiny dia hanasa ny fitafiany sy haloto mandra-paharivan'ny andro. ⁴¹ Ny biby rehetra mandady amin'ny tany dia ho zava-betaveta aminareo, ka tsy hohanina.

⁴² Aza misy haninareo rahefa mety ho biby mandady amin'ny tany, na ireo mikisaka amin'ny kibony, na ireo mandia tongotr'efatra, na ireo manana tongotra maro, fa ho zava-betaveta ireny aminareo. ⁴³ Aza mametaveta ny tenanareo amin'ireny biby mandady rehetra ireny; aza mandoto ny tenanareo amin'ireny fa hahazo loto avy amin'ireny hianareo. ⁴⁴ Fa izaho no Iaveh Andriamanitrareo, ka hanamasina ny tenanareo hianareo dia ho masina satria masina aho; aza mandoto ny tenanareo amin'izay biby rehetra mandady amin'ny tany.

⁴⁵ Fa izaho no Iaveh nampiakatra anareo avy any amin'ny tany Ejipta, mba ho Andriamanitrareo. Aoka ho masina hianareo, satria masina aho. ⁴⁶ Izany no lalàna momba ny biby mandia tongotr'efatra, ny vorona, ny zava-miaina rehetra mihetsiketsika ao anaty rano, ary izay rehetra mandady amin'ny tany,

⁴⁷ mba hanavahanareo izay maloto sy izay madio ary ny biby fihinana sy izay tsy fihinana.