Levitika

Toko faha-20

¹ Ary niteny tamin'i Moizy Iaveh nanao hoe:

² Izao no lazao amin'ny zanak'Israely: Na zovy na zovy amin'ny zanak'Israely, na amin'ny vahiny mitoetra eo amin'Israely, manolotra ny iray amin'ny zanany ho an'i Moloka, dia hohelohin-ko faty, ka hotorahan'ny vahoaka tompon-tany vato. ³ Ary hanandrina izany olona izany ny tavako, ka hofongorako amin'ny fireneny izy, fa nanolotra ny iray amin'ny zanany ho an'i Moloka, handoto ny fitoerako masina, sy hanevateva ny anarako. ⁴ Na mody tsy mahita izany olona izany aza ny vahoaka, amin'ny anolorany ny zanany ho an'i Moloka, ka tsy mamono azy, ⁵ dia hanandrina izany olona izany mbamin'ny fianakaviany ny tavako, ka hofongorako amin'ny fireneny izy mbamin'izay rehetra mivadika amiko toa azy ka mitolo-tena hanompo an'i Moloka. ⁶ Raha misy olona manatona izay mpamoha angatra na mpisikidy, ka mivadika amiko hanaraka ireny, dia hanandrina izany olona izany ny tavako, ka hofongorako amin'ny fireneny izy.

⁷ Hamasino ny tenanareo, ary aoka ho masina hianareo, fa izaho no Iaveh Andriamanitrareo. ⁸ Tandremo ny didiko ka araho izany. Izaho no Iaveh ilay manamasina anareo. ⁹ Na zovy nba zovy manozona ny rainy na reniny, dia hohelohin-ko faty; fa efa nanozona an-drainy na an-dreniny izy, ka dia aminy ny rany.

¹⁰ Raha misy lehilahy maka vadin'olona, ka mandry amin'ny vadin'ny namany, dia hatao maty izy ireo ho valin'izany, na ralehilahy naka vadin'olona na ravehivavy nalainy. ¹¹ Raha misy lehilahy mandry amin'ny vadin-drainy, ka manokatra fitanjahan-drainy dia hohelohin-ko faty izy roroa, ka dia amin'izy ireo ny rany. ¹² Raha misy lehilahy mandry amin'ny vinantovaviny, dia hohelohin-ko faty izy roroa, fa nanao zava-mahamenatra; ka dia amin'izy ireo ny rany. ¹³ Raha misy lehilahy mandry amin-dehilahy toy ny fandry amim-behivavy, dia nanao zava-betaveta izy roroa, ka dia hohelohin-ko faty; ka dia amin'izy ireo ny rany. ¹⁴ Raha misy lehilahy mampirafy vehivavy mianaka, dia heloka bevava izany, ka samy hodorana amin'ny afo izy sy iretsy vehivavy, mba tsy hisian'izany heloka izany eo aminareo. ¹⁵ Raha misy lehilahy miray amin'ny biby, izy hohelohin-ko faty ary ilay biby koa hovonoinareo. ¹⁶ Raha misy vehivavy manatona hijangajanga amin'ny biby, dia hovonoina na ravehivavy na ilay biby, dia atao maty izy ireo, ka dia amin'izy ireo ny rany. ¹⁷ Raha misy lehilahy maka ny anabaviny zanakavavin-drainy, na zanakavavin-dreniny ka izy nahita ny fitanjahany, dia haratsiana lozan-tany izany, ka hofongorana eo imason'ny taranaky ny fireneny izy, fa nanokatra ny fitanjahan'ny anabaviny, ka hilonjy ny helony. ¹⁸ Raha misy lehilahy mandry amim-behivavy mararin'ny fadim-bolany ka manokatra ny fitanjahany, dia nanokatra ny fandehanan'ny rany izy, ary hofongorana amin'ny fireneny izy roroa. ¹⁹ Aza manokatra ny fitanjahan'ny rahavavin-dreninao, na ny anabavin-drainao, fa manokatra ny fitanjahan'ny tenany izay manao izany, ka hilonjy ny helony izy ireo.

²⁰ Raha misy lehilahy mandry amin'ny vadin-drahalahin-drainy, dia nanokatra ny fitanjahan-drahalahin-drainy izy, ka hilonjy ny helony izy roroa. ²¹ Raha misy lehilahy maka ny vadin-drahalahiny, dia fahalotoana izany, fa manokatra ny fitanjahan-drahalahiny izy, ka ho momba izy roroa. ²² Tandremo avokoa ny lalàna, amam-pitsipiko, ka araho izany, mba tsy haloan'ny tany hitondrako anareo honenanareo hianareo.

²³ Aza manaraka ny fanaon'ny firenena izay horoahiko eo anoloanareo, fa nanao izany rehetra izany izy, ka maharikoriko ahy izy.

²⁴ Efa voalazako taminareo fa hianareo no handova ny tanin'ireny; homeko anareo hanananareo azy, ary tany tondra-dronono aman-tantely izany. Izaho no Iaveh Andriamanitrareo izay nanavaka anareo tamin'ny firenena hafa. ²⁵ Hanavaka ny biby madio amin'izay maloto hianareo, sy ny vorona madio amin'izay maloto, ka tsy hametaveta ny tenanareo amin'izay biby, na vorona, na izay zava-mihetsiketsika rehetra ambonin'ny tany, nasaiko navahanareo ho zava-maloto. ²⁶ Ho masina ho ahy hianareo, fa izaho Iaveh dia masina sy efa nanavaka anareo tamin'ny firenen-kafa mba ho ahy. ²⁷ Hatao maty avokoa izay lehilahy na vehivavy mamoha angatra na manao hatsaràna, hotoraham-bato izy, ka dia amin'izy ireo ny rany.