Evanjely Masin'i Jesoa-kristy Nosoratan'i Md. Lioka

Toko faha-5

¹ Ary indray andro raha nijoro teo amoron'ny farihin'i Genezareta izy, dia nifanesika taminy ny vahoaka mba hihaino ny tenin'Andriamanitra.

² Nahita sambo kely roa niantsona teo amoron-drano izy (fa niala hanasa ny haratony ny mpanarato), ³ dia niditra tamin'ny sambo kely anankiray izay an'i Simona ka nangataka taminy mba hihataka kely amin'ny tany, vao nipetraka teo an-tsambo kely nampianatra ny vahoaka. ⁴ Rahefa nitsahatra niteny izy, dia nanao tamin'i Simona hoe: Mandrosoa eny amin'ny lalina, dia alatsaho ny haratonareo hahazoana hazandrano; ⁵ fa hoy ny navalin'i Simona azy: Tompoko, efa niasa mafy nandritra ny alina izahay, fa tsy nahazo na inona na inona; nefa noho ny teninao dia halatsako ihany ny harato. ⁶ Nony nanao izany izy, dia nahazo hazandrano be dia be ka nisy triatra ny haratony. ⁷ Ary nanàtsika ny namany izay teny amin'ny sambo kely hafa izy ireo mba ho avy hanampy azy; dia tonga ireo, nofenoiny ny sambo kely roa ka efa saika nilentika ny sambo. ⁸ Nony nahita izany Simona Piera dia niankohoka tamin'ny tongotr'i Jesoa ka nanao hoe: Mialà amiko, Tompoko, fa mpanota aho; ⁹ fa talanjona izy sy izay rehetra teo aminy, noho ny habetsahan'ny hazandrano azony; ¹⁰ ary toy izany koa Jakoba sy Joany zanak'i Zebede izay iray raharaha tamin'i Simona. Dia hoy Jesoa tamin'i Simona: Aza matahotra, fa hatramin'izao dia hanarato olona hianao. ¹¹ Dia nampiantsona ny sambo kely tamin'ny tany niaraka tamin'izay izy ireo, ka namoy ny zavatra rehetra ary nanaraka azy. ¹² Raha tao amin'ny tanàna anankiray izy, dia indro nisy lehilahy rakotry ny habokana nahita azy, niankohoka nitaraina taminy nanao hoe: Tompoko, raha mety hianao, mahay manadio ahy.

¹³ Dia naninjitra ny tànany izy nanendry azy, sy nanao hoe: Mety aho, madiova hianao, ka afaka niaraka tamin'izay ny habokany. ¹⁴ Noraran'i Jesoa tsy hilaza izany na amin'iza na amin'iza izy; fa mandehana misehoa amin'ny mpisorona, hoy izy, ary manatera ny fanatitra noho ny fahasitrananao, araka ny voadidin'i Moizy, mba ho vavolombelona amin'ny olona. ¹⁵ Fa mainka niely ny lazany, ka nirohotra be dia be ny vahoaka mba hihaino azy sy mba hositraniny amin'ny aretiny; ¹⁶ izy kosa nefa amin'izany dia mihataka mankany an'efitra ka mivavaka ao. ¹⁷ Indray andro raha nampianatra izy, dia nipetraka manodidina azy teo koa ny Farisiana sy ny mpampiana-dalàna sasany avy tamin'ny tanàna rehetra tany Galilea sy Jodea mbamin'i Jerosalema, ary tao aminy hanasitranany ny marary ny herin'ny Tompo.

¹⁸ Dia indro nisy olona nitondra lehilahy malemy anankiray tamin'ny fandriany ka nitady hampiditra sy hametraka azy teo anatrehany; ¹⁹ fa tsy nahita izay hampidirany azy izy ireo noho ny habetsahan'ny olona, ka niakatra teo ambonin'ny tafon-trano izy, ary nanesorany ny tafo, dia nampidininy teo afovoan'ny olona teo anatrehan'i Jesoa ralehilahy mbamin'ny fandriany. ²⁰ Nony nahita ny finoan'izy ireo Jesoa, dia nanao hoe: Ralehilahy, voavela ny helokao. ²¹ Tamin'izany ny mpanora-dalàna sy ny Farisiana dia nisaintsaina anakampo nanao hoe: Iza moa ity miteny ratsy toy izao ity? Iza no mahavela heloka afa-tsy Andriamanitra irery? ²² Fa fantatr'i Jesoa ny heviny, ka hoy izy taminy: Nahoana hianareo no mieritreritra ao am-ponareo? ²³ Inona no mora holazaina kokoa, ny hoe: Voavela ny helokao, sa ny hoe: Mitsangàna ka mandehana? ²⁴ Ary mba ho fantatrareo fa manam-pahefana hamela heloka ety an-tany ny Zanak'olona, dia izao no lazaiko aminao, hoy izy tamin'ilay malemy: mitsangàna, ento ny fandrianao, ary modia any an-tranonao. ²⁵ Niaraka tamin'izay dia nitsangana teo imason'ny olona izy, ary nitondra ny farafara nandriany, ka lasa nody any an-tranony nankalaza an'Andriamanitra. ²⁶ Nitolagaga avokoa izy rehetra, ka sady nankalaza an'Andriamanitra no raiki-tahotra nanao hoe: Nahita zava-mahagaga isika androany. ²⁷ Taorian'izany, dia nandeha izy ka nahita poblikàna anankiray atao hoe Levì nipetraka teo amim-pamorian-ketra, ary hoy izy taminy: Manaraha ahy.

²⁸ Dia nafoiny ny zavatra rehetra, ka nitsangana nanaraka azy izy. ²⁹ Nanao fanasana lehibe ho azy tao an-tranony Levì, ary nisy poblikàna sy olon-kafa betsaka koa niara-nihinana taminy teo. ³⁰ Nimonjomonjo ny Farisiana sy ny mpanora-dalàna ka nanao tamin'ny mpianany hoe: Nahoana no miara-mihinana sy misotro amin'ny poblikàna sy ny mpanota hianareo? ³¹ Fa novalian'i Jesoa hoe: Tsy ny finaritra no mila dokotera, fa ny marary. ³² Tsy tonga hiantso ny marina aho, fa ny mpanota hibebaka. ³³ Dia hoy indray ry zareo taminy: Nahoana no ny mpianatr'i Joany sy ny an'ny Farisiana mifady hanina matetika sy mivavaka lalandava, fa ny anao kosa mihinana sy misotro ihany?

³⁴ Ary hoy izy tamin'ireo: Moa hianareo mahazo mampifady hanina ny zatovon'ny mpampakatra, raha mbola eo aminy koa ny mpampakatra? ³⁵ Fa ho avy ny andro hanesorana ny mpampakatra aminy, ka amin'izany vao hifady hanina izy ireo. ³⁶ Dia nanao fanoharana taminy indray izy nanao hoe: Tsy misy olona manampina lamba tonta amin'ny tapa-damba notriarina tamin'ny vaovao, fa raha izany, ny vaovao moa triatra, ny tonta koa tsy hifanendrika amin'ny tapa-damba vaovao.

³⁷ Tsy misy manisy divay vaovao amin'ny hoditra tonta koa, fa raha izany dia hotriarin'ny divay vaovao ny siny hoditra ka ny divay moa raraka, ny siny hoditra koa very maina; ³⁸ fa siny hoditra vaovao no tokony hasiana ny divay vaovao, dia samy haharitra izy roroa. ³⁹ Ary tsy misy olona vao avy nisotro divay tranainy ka hangataka ny vaovao, satria hoy izy hoe: Ny tranainy no tsaratsara kokoa.