Evanjely Masin'i Jesoa-kristy Nosoratan'i Md. Marka

Toko faha-11

¹ Nony mby akaiky an'i Jerosalema sy tonga tao Betania anilan'ny tendrombohitra Oliva izy, dia naniraka roalahy tamin'ny mpianany,

² ary nilaza taminy hoe: Mankanesa amin'itsy vohitra tandrifinareo itsy; raha vao tonga any hianareo, dia hahita zanak'ampondra anankiray mifatotra, izay tsy mbola nitaingenan'olona; vahao izy ka ento mankaty amiko. ³ Ary raha misy manao aminareo hoe: Ahoana no anaovanareo izao? valio hoe: Misy ilàn'ny Tompo azy; dia halefany hoentina atý miaraka amin'izay izy. ⁴ Dia nandeha izy ireo ka nahita zanak'ampondra mifatotra teo alatrano anilan'ny varavarana, teo an-tsampanan-dàlana, dia novahany. ⁵ Ary ny sasany tamin'ny olona teo nanao taminy hoe: Ahoana no amahanareo io zanak'ampondra io? ⁶ Fa novaliany araka ny nandidian'ny Tompo azy izy ireo, ka namela azy hoentiny. ⁷ Dia nentiny tany amin'i Jesoa ny zanak'ampondra, ka nataony teo amboniny ny fitafiany, ary nitaingina teo izy. ⁸ Maro no namelatra ny fitafiany teny amin'ny làlan-kalehany, ary ny sasany nanapaka rantsan-kazo dia namafy izany teny amin'ny làlana koa. ⁹ Ary na izay nandeha teo alohany, na izay nanaraka teo aoriany dia samy niantso hoe: Hosana! ¹⁰ Hohasoavina anie ilay avy amin'ny anaran'ny Tompo; hohasoavina anie ny fanjakan'i Davida raintsika izay efa tonga izao; hosana any amin'ny avo indrindra. ¹¹ Dia niditra tao Jerosalema izy namantana tao amin'ny tempoly, ka nony avy nijerijery ny zavatra rehetra dia nankany Betania nomban'ny roa ambin'ny folo lahy, fa efa hariva rahateo ny andro. ¹² Nony ampitso, raha niala tany Betania izy, dia noana,

¹³ ary nahatazan-davitra aviavy iray mandravina izy, dia nankao hizaha raha sendra misy voany; fa nony mby teo izy, dia tsy nahita na inona na inona afa-tsy ravina, satria tsy taom-pamoazan'ny aviavy tamin'izay. ¹⁴ Dia hoy izy tamin'ny aviavy: Aoka tsy hisy olona hihinana voa aminao intsony mandrakizay; ary ren'ny mpianany izany. ¹⁵ Dia tonga tany Jerosalema izy ireo, ka nony niditra tao amin'ny tempoly Jesoa, dia nandroaka izay nivarotra sy nividy tao, ary nanjera ny latabatry ny mpampisambo-bola sy ny fipetrahan'ny mpivaro-boromailala,

¹⁶ ary tsy navelany hisy olona mitondra entana hamaky ny tempoly, ¹⁷ sady nampianatra izy, nanao hoe: Moa tsy voasoratra hoe: Ny tranoko dia hatao trano fivavahana ho an'ny firenena rehetra? fa hianareo kosa efa nanao azy ho zohy fieren'ny jiolahy. ¹⁸ Nony nahare izany ny lohandohan'ny mpisorona sy ny mpanora-dalàna dia nitady izay hahafaty azy; saingy natahotra azy izy ireo satria nigagan'ny vahoaka rehetra ny fampianarany. ¹⁹ Nony hariva ny andro dia niala tao an-tanàna izy. ²⁰ Ary ny ampitso maraina raha nandalo izy ireo, dia hitan'ny mpianany fa maina hatramin'ny fakany ilay aviavy.

²¹ Dia nahatsiahy Piera ka nanao taminy hoe: Raby ô, he! maina ilay aviavy nozoninao. ²² Ary hoy ny navalin'i Jesoa azy: Manàna finoana an'Andriamanitra. ²³ Fa lazaiko marina aminareo fa na zovy na zovy hilaza amin'ity tendrombohitra ity hoe: Mialà hianao eo, ka mianjerà any an-dranomasina, raha mino tsy amim-pisalasalana ao an-pony izy, fa ho tanteraka izay lazainy, dia ho hitany ny fahatanterahan'izany. ²⁴ Koa amin'izany lazaiko marina aminareo, fa na inona na inona angatahinareo amin'ny fivavahana, minoa fa ho azonareo izany, dia ho tanteraka tokoa izany. ²⁵ Ary raha mitsangana hivavaka hianareo ka sendra manana alahelo amin'olona, dia mamelà azy, mba hamelan'ny Rainareo any an-danitra ny helokareo koa. ²⁶ Fa raha tsy mamela hianareo, dia tsy havelan'ny Rainareo any an-danitra koa ny helokareo. ²⁷ Dia tonga tany Jerosalema indray izy ireo. Ary raha niasa dia teo anatin'ny tempoly Jesoa, dia nanatona azy ny lohandohan'ny mpisorona sy mpanora-dalàna ary ny loholona,

²⁸ ka nilaza taminy hoe: Fahefana avy aiza no anaovanao izao zavatra izao? Ary iza no nanome fahefana anao hanao izany? ²⁹ Dia hoy Jesoa taminy: Mba hanontaniako zavatra iray loha koa àry hianareo, ka raha voavalinareo, dia holazaiko aminareo izay fahefana anaovako izao. ³⁰ Avy aiza ny batemin'i Joany, avy any an-danitra sa avy amin'ny olona? Valio aho. ³¹ Dia nieritreritra izy ireo, ka nanao hoe: Raha valiantsika hoe avy any an-danitra mantsy, dia hataony hoe: Nahoana àry no tsy ninoanareo? ³² Ary raha ataontsika hoe avy amin'ny olona kosa, ny vahoaka indray no atahorantsika; fa ataon'izy rehetra ho mpaminany marina tokoa Joany. ³³ Dia izao no navaliny an'i Jesoa: Tsy fantatray. Ary izaho kosa, hoy Jesoa taminy, tsy hilaza aminareo izay fahefana anaovako izao.