Evanjely Masin'i Jesoa-kristy Nosoratan'i Md. Marka

Toko faha-8

¹ Tamin'izany andro izany, nony betsaka indray ny vahoaka teo sady tsy nanan-kohanina, dia niantso ny mpianany izy ka nanao taminy hoe:

² Mampalahelo ahy ity vahoaka, fa efa hateloana izay tsy nisaraka tamiko ka tsy manan-kohanina; ³ ary raha hampodiko ho any an-tranony izy tsy mihinana dia ho reraka eny an-dàlana, fa avy lavitra ny sasany. ⁴ Dia hoy ny mpianany namaly azy: Aiza no hahitana mofo hahavoky ireo aty an'efitra? ⁵ Ary izy nanontany azy hoe: Manana mofo firy hianareo? Fito, hoy izy ireo. ⁶ Dia nasainy hipetraka tamin'ny tany ny vahoaka ary noraisiny ny mofo fito, ka nony vita ny fisaorana dia novakiny, sy nomeny hozarain'ny mpianany, ary nozarainy tamin'ny vahoaka. ⁷ Ary nanana hazandrano madinika vitsivitsy koa izy, ka notsofiny rano dia nasainy hozaraina. ⁸ Ary nihinana ny olona ka voky, ary ny sombintsombiny sisa tsy lany nentiny dia nisy fito sobika. ⁹ Tokony ho efatra arivo anefa no nihinana; dia nampodiny. ¹⁰ Dia niondrana an-tsambo kely niaraka tamin'izay izy sy ny mpianany, ka tonga tany amin'ny faritanin'i Dalmanotà.

¹¹ Ary nanatona azy ny Farisiana, ka niady hevitra taminy sy nangataka famantarana avy any an-danitra taminy, mba hakany fanahy azy. ¹² Dia nisento mafy izy ka nanao hoe: Ahoana no itadiavan'ity taranaka ity famantarana? Lazaiko aminareo marina tokoa fa tsy homena famantarana ity taranaka ity. ¹³ Dia nilaozany izy ireo ka niondrana an-tsambo kely indray izy nankeny am-pita. ¹⁴ Ary nanadino tsy nitondra mofo ny mpianatra, ka tsy nisy afa-tsy mofo iray monja teo an-tsambo kely.

¹⁵ Jesoa kosa nananatra azy nanao hoe: Mitandrema tsara hianareo fandrao azon'ny lalivain'ny Farisiana sy lalivain'i Heroda. ¹⁶ Dia niara-nihevitra izy ireo ka nifampilaza hoe: Noho isika tsy manana mofo izay. ¹⁷ Fantatr'i Jesoa ny heviny ka hoy izy taminy: Ahoana no iheveranareo izay tsy fanananareo mofo? Mbola tsy misy hevitra sy tsy mahazo saina ihany va hianareo? Donto ny fonareo? ¹⁸ Mana-maso fa tsy mahita va hianareo? ary manan-tsofina fa tsy mahare? Ary mahatadidy va hianareo? ¹⁹ Raha nizara ny mofo dimy tamin'ny olona dimy arivo aho, firy no sobiky feno ny sombintsombiny sisa tsy lany nangoninareo? Roa ambin'ny folo, hoy ireo taminy. ²⁰ Ary raha nizara ny mofo fito tamin'ny olona efatra arivo, firy no sobika feno ny sombintsombiny sisa tsy lany nangoninareo? Fito, hoy ireo taminy. ²¹ Ka nahoana ary, hoy izy taminy, no mbola tsy mahalala ihany hianareo? ²² Dia tonga tany Betsaida izy ireo, ary nisy nitondra lehilahy jamba anankiray teo aminy, sy nangataka taminy mba hanendry azy.

²³ Dia noraisin'i Jesoa ny tànan'ilay jamba, ka nentiny nivoaka ny tanàna izy; nasiany rora ny masony, nametrahany tànana izy, ary nanontaniany raha mahita zavatra. ²⁴ Dia niandrandra ilay jamba ka nanao hoe: Ny fahitako ny olona mamindra dia sahalahala amin'ny hazo. ²⁵ Dia nametrahany tànana indray ny masony, ka nasainy nijery izy, izay vao sitrana tsara sy nahita mazava ny zavatra rehetra. ²⁶ Ary nasain'i Jesoa nody any an-tranony izy sy nilazany hoe: Modia any an-tranonao, fa aza miakatra ao an-tanàna na milaza izany amin'ny olona ao an-tanàna. ²⁷ Avy ao Jesoa sy ny mpianany, dia nankany amin'ny vohitra manodidina an'i Sezarean'i Filipo, ary teny an-dàlana dia nanontany ny mpianany izy nanao hoe: Ataon'ny olona ho iza moa aho?

²⁸ Ary namaly azy ireo, nanao hoe: Joany Batista, hoy ny sasany; Elia, hoy ny sasany; ary anankiray amin'ny mpaminany, hoy kosa ny sasany. ²⁹ Fa hianareo kosa, manao ahy ho iza? hoy izy tamin'izy ireo. Dia namaly Piera ka nanao taminy hoe: Hianao no Kristy. ³⁰ Ary norarany mafy izy ireo mba tsy hilazalaza azy na amin'iza na amin'iza. ³¹ Tamin'izay nambarany tamin'izy ireo fa ny Zanak'olona dia tsy maintsy hijaly mafy sy hatosiky ny loholona mbamin'ny lohandohan'ny mpisorona sy mpanora-dalàna, ary hovonoina, fa hitsangana indray raha afaka hateloana,

³² sady nataony mazava tsara no filaza izany. Dia nentin'i Piera nitanila izy ka noteneniny mafy. ³³ Fa nihodina nijery ny mpianany izy, ary niteny mafy an'i Piera hoe: Mialà amiko, ry Satana, satria tsy mihevitra araka an'Andriamanitra hianao, fa araka ny olombelona. ³⁴ Dia nantsoiny ny vahoaka mbamin'ny mpianany ka nilazany hoe: Raha misy ta-hanaraka ahy, aoka izy handà ny tenany sy hitondra ny hazo fijaliana ka hanaraka ahy. ³⁵ Fa izay te-hamonjy ny ainy no hahavery azy, ary izay hahafoy azy noho ny fitiavany ahy sy ny Evanjely no hamonjy azy. ³⁶ Inona no soa azon'ny olona raha mahazo izao tontolo izao izy, nefa very ny fanahiny? ³⁷ Sa inona no azon'ny olona omena ho takalon'ny fanahiny? ³⁸ Izay ho menatra ahy sy ny teniko amin'ity taranaka mpijangajanga sy mpanota ity, dia ho menatra azy koa ny Zanak'olona rahefa avy amin'ny voninahitry ny Rainy izy otronin'ny anjely masina. ³⁹ Dia hoy koa izy: Lazaiko marina aminareo fa ny sasany aminareo eto dia tsy hanandra-pahafatesana raha tsy efa mahita ny fanjakan'Andriamanitra tonga amin'ny voninahitra.