Evanjely Masin'i Jesoa-kristy Nosoratan'i Md. Marka

Toko faha-9

¹ Henemana taorian'izany dia nalain'i Jesoa Piera sy Jakoba ary Joany ka nentiny nitokana tany an-tampon'ny tendrombohitra avo anankiray, dia niova tarehy teo anatrehany izy.

² Tonga nanjelanjelatra sady fotsy hoatra ny oram-panala ny fitafiany, ka tsy misy mpamotsy lamba mahafotsy toy izany etý an-tany. ³ Ary niseho tamin'izy ireo Elia sy Moizy, sady niresaka tamin'i Jesoa. ⁴ Dia niteny Piera ka nanao tamin'i Jesoa hoe: Raby ô, mahafinaritra ny mitoetra atý; aoka hanao lay telo izahay, ny iray ho anao, ny iray ho an'i Moizy, ary ny iray ho an'i Elia. ⁵ Fa tsy fantany izay nolazainy, satria raiki-tahotra loatra izy ireo. ⁶ Tamin'izay dia nisy rahona nanarona azy; ary nisy feo avy tao amin'io rahona io nanao hoe: Ity no Zanako malalako indrindra, henoy izy. ⁷ Niaraka tamin'izay dia nijerijery manodidina izy ireo, nefa tsy nahita olona intsony, fa Jesoa irery sisa teo aminy. ⁸ Nony nidina avy tany an-tendrombohitra izy ireo, dia norarany tsy hilazalaza amin'olona ny zavatra vao hitany, mandrapitsangan'ny Zanak'olona amin'ny maty. ⁹ Dia notanany tao am-pony izany zavatra izany, sady nifampaka saina izy ny amin'izay hevitr'izany hoe, mitsangana amin'ny maty. ¹⁰ Ary nanontany azy izy ireo nanao hoe: Ahoana ary no ilazan'ny Farisiana sy ny mpanora-dalàna fa tsy maintsy ho avy aloha Elia?

¹¹ Dia hoy Jesoa hoe: Tsy maintsy ho avy aloha Elia sy hanavao ny zavatra rehetra; fa ahoana kosa no nanoratana ny amin'ny Zanak'olona fa tokony hijaly mafy izy sy hotevatevaina izaitsizy? ¹² Ary lazaiko aminareo fa efa tonga sahady Elia, sady nataon'ny olona taminy izay sitraky ny fony, araka ny nanoratana azy. ¹³ Nony tafaverina teo amin'ny mpianany izy dia nahita vahoaka betsaka nanodidina azy, sy mpanora-dalàna niady hevitra taminy.

¹⁴ Gaga ny olona rehetra nony nahita an'i Jesoa, ka nidodododo hiarahaba azy niaraka tamin'izay. ¹⁵ Dia nanontany azy ireo izy nanao hoe: Ny amin'ny inona no iadianareo hevitra amin'ireto? ¹⁶ ka novalian'ny anankiray tamin'ny vahoaka hoe: Ry Mpampianatra ô, nitondra ny zanako lahy azon'ny demony moana nankaty aminao aho; ¹⁷ fa na aiza na aiza ahazoany azy dia sady akapokapony izy no mandoa vory sy mikitronify, ka efa mihamalazolazo erý; ary efa nangataka ny mpianatrao handroaka azy aho, fa tsy nahomby izy ireo. ¹⁸ Dia niteny Jesoa nanao hoe: Ry taranaka tsy mino, mandra-pahoviana no hitoerako aminareo? mandra-pahoviana no handeferako aminareo? Ento atý amiko izy. ¹⁹ Dia nentiny nankeo aminy izy, ary vantany vao nahita azy ny demony, dia nampifanintotsintona ny zaza ka lavo nitsinkasina sady nandoa vory. ²⁰ Dia nanontany ny rain-drazazalahy Jesoa nanao hoe: Hoatrinona izay no nahatongavan'izao taminy? Ka novaliany hoe: Hatry ny fony izy mbola kely; ²¹ ary matetika izy no nazeran'ny demony tamin'ny afo sy tany anaty rano mba hahafaty azy; ka raha mba misy hainao re, mamindra fo aminay, ary vonjeo izahay! ²² Dia hoy Jesoa taminy: Raha hainao ny mino, tsy misy tsy azo atao ho an'izay mino. ²³ Niaraka tamin'izay, dia sady niantso mafy ny rain-drazazalahy no nanao an-dranomaso hoe: Mino aho, Tompoko, fa vonjeo re ity tsy finoako. ²⁴ Ary nony nahita ny vahoaka nidodododo nanatona azy Jesoa, dia niteny mafy ny fanahy maloto izy nanao hoe: Ry fanahy marenina sy moana, izaho mandidy anao, mivoaha amin'io zaza io, ka aza miditra ao aminy intsony. ²⁵ Dia sady ninananana ny demony no nampifanintontsintona azy mafy vao niala taminy, ka efa toy ny maty ilay zazalahy, ary efa nataon'ny maro hoe maty aza. ²⁶ Fa noraisin'i Jesoa tamin'ny tànany izy, dia nareniny, ka nitsangana. ²⁷ Nony tonga tany an-trano izy, dia nanontanian'ny mpianany mangingina hoe: Nahoana no tsy naharoaka azy izahay?

²⁸ Ka hoy izy taminy: Tsy azo roahina afa-tsy amin'ny fivavahana sy ny fifadian-kanina izany karazan-demony izany. ²⁹ Nony niala teo izy ireo, dia namaky an'i Galilea, ary tsy tian'i Jesoa ho fantatr'olona izany,

³⁰ fa nampianatra ny mpianany izy ary nanao taminy hoe: Hatolotra eo an-tanan'ny olombelona ny Zanak'olona, dia hovonoiny, fa hitsangana amin'ny maty izy raha afaka hateloana aorian'ny hahafatesany. ³¹ Tsy fantatr'izy ireo anefa izany teny izany, sady tsy sahiny nanontaniana azy koa. ³² Dia tonga tany Kafarnaoma izy ireo, ary nony mby tao an-trano, dia nanontany ny mpianany Jesoa nanao hoe: Inona izany niadianareo hevitra tany an-dàlana izany?

³³ Fa tsy niteny tsy nivolana izy, satria ny amin'izay ho lehibe indrindra amin'izy rehetra no niadiany hevitra teny an-dàlana. ³⁴ Dia nipetraka izy ary niantso ny roa ambin'ny folo lahy ka nanao taminy hoe: Izay te-ho voalohany no ho farany indrindra sy ho mpanompon'ny olona rehetra. ³⁵ Ary nandray zaza anankiray izy, napetrany teo afovoany, sy nofihininy, ary hoy izy tamin'ny mpianany hoe: ³⁶ Na iza na iza handray anankiray amin'ny zazakely toy itony amin'ny anarako, dia handray ahy, ary izay mandray ahy dia tsy mandray ahy, fa izay naniraka ahy. ³⁷ Ary niteny Joany ka nanao taminy hoe: Mpampianatra ô, nahita olona anankiray nandroaka demony amin'ny anaranao izahay; nefa tsy namantsika ka noraranay. ³⁸ Fa hoy Jesoa: Aza raranareo izy; fa tsy misy olona hanao fahagagana amin'ny anarako ka hanaratsy ahy vetivety foana. ³⁹ Fa izay tsy manohitra antsika dia momba antsika. ⁴⁰ Na iza na iza hanome rano eran'ny kapoaka anareo amin'ny anarako, satria an'ny Kristy hianareo, dia lazaiko marina aminareo fa tsy ho very valisoa izy. ⁴¹ Ary na iza na iza hanafintohina ny anankiray amin'ireny madinika mino ahy ireny, dia tsaratsara kokoa ho azy ny hanantonana vato fikosohan-dafarina amin'ny vozony, ka havarina any anaty ranomasina izy.

⁴² Raha ny tànanao no manafintohina anao, tapaho izy; fa aleo kilemaina miditra any amin'ny fiainana hianao, toy izay manan-tanan-droa havarina any amin'ny gehena, dia any amin'ny afo tsy azo vonoina, ⁴³ izay misy olitra tsy mety maty sy afo tsy maty mandrakizay. ⁴⁴ Ary raha ny tongotrao no manafintohina anao, tapaho izy, fa aleo tapa-tongotra an'ila miditra any amin'ny fiainana hianao toy izay manana tongotra roa havarina any amin'ny gehen'afo tsy azo vonoina, ⁴⁵ izay misy olitra tsy mety maty sy afo tsy maty mandrakizay. ⁴⁶ Raha ny masonao no manafintohina anao, esory izy, fa aleo toka-maso miditra any amin'ny fanjakan'Andriamanitra hianao, toy izay mana-maso roa havarina any amin'ny gehen'afo, ⁴⁷ izay tsy mety maty ny olitr'izy ireo ary tsy azo vonoina ny afo. ⁴⁸ Fa izy rehetra any hosiraina amin'ny afo, toy ny sorona rehetra siraina amin'ny sira. ⁴⁹ Tsara ny fanasina: fa rahefa lefy izy, inona no hampodianareo ny tsirony? Tano tsara ny sira aminareo, ka mihavàna hianareo.