Bokin'i Nehemia

Toko faha-10

¹ Noho izany rehetra izany, dia manao fanekena masina izahay ka nalatsaka an-tsoratra, ary ny lehibenay, ny levitanay sy ny mpisoronay nanisy ny tombo-kaseny eo avy.

² Ireto izy no nanisy ny tombo-kaseny avy: Nehemia, governora zanak'i Helkiasa,

³ Sedekiasa, Saraiasa, Azariasa, Jeremia, ⁴ Fasora, Amariasa, Melkiasa, ⁵ Hatosa, Sebeniasa, Melòka, ⁶ Harema, Merimota, Abdiasa, Daniela, ⁷ Gentona, Baròka, Mosolama, Abiasa, ⁸ Miamina, Maaziasa, ⁹ Belgaì, Semeiasa, samy mpisorona ireo. ¹⁰ Ary ny levita: Josoe zanak'i Azaniasa, Benaì, isan-janak'i Henadada, ¹¹ Kedmiela, mbamin'ireo rahalahiny, Sebeniasa, Odaiasa, Kelità, Falaiasa, ¹² Hanàna, Mikà, Rohoba, Hasebiasa, ¹³ Zakora, Serebiasa, Sabaniasa, ¹⁴ Odaiasa, Bani, Banino. ¹⁵ Filohan'ny vahoaka: Farosa, Fahat-Moaba, Elama, Zetò, Banì, ¹⁶ Bonì, Azgada, Bebaì, ¹⁷ Adoniasa, Begoaì, Adìna, ¹⁸ Atera, Ezekiasa, Azora, ¹⁹ Odaiasa, Hasoma, Besaì, ²⁰ Harefa, Anatota, Nebaì, ²¹ Megfiasa, Mosolama, Hazira, ²² Mesezabela, Sadaoka, Jedoà, ²³ Feltiasa, Hanàna, Anaiasa, ²⁴ Osea, Anania, Hasoba, ²⁵ Alohesa, Faleà, Sobeka, ²⁶ Rehoma, Hasebnà, ²⁷ Maasiasa, Ekiasa, Hanana, ²⁸ Anana, Melòka, Harima, Baanà. ²⁹ Ny vahoaka sisa, ny mpisorona, ny levita, ny mpiandry varavarana, ny mpihira, ny Natineana, ary izay rehetra nisaraka tamin'ny vahoakan'ny tany, hanaraka ny lalàn'Andriamanitra, mbamin'ny vadin'ireo, ny zanany lahy aman-janany vavy,

³⁰ izay afa-nahalala sy manan-tsaina rehetra, dia samy nikambana tamin'ireo rahalahiny, dia ny andriandahiny, avokoa, nanome toky tamim-piozonana amam-pianianana fa hanaraka ny lalàn'Andriamanitra, izay nomena tamin'ny alalan'i Moizy, mpanompon'Andriamanitra, hitandrina sy hankatò ny didin'ny Tompo Tompontsika, mbamin'ny fitsipiny aman-dalàny. ³¹ Indrindra fa nanome toky izahay fa tsy hanome ny zanakay vavy ho vadin'ny vahoakan'ny tany, na haka ny zanany vavy ho vadin'ny zanakay lahy; ³² tsy hividy na inona na inona amin'ny andro sabata sy ny andro fety amin'ny entam-barotra na zava-pihinana, na inona na inona, raha sendra misy entin'ny vahoakan'ny tany hamidy amin'ny andro sabata; hamela ny tany hijanona tsy ambolena amin'ny taona fahafito, sady hamoy ny trosa rehetra. ³³ Nataonay didy ho anay ny handoa ampahatelon-tsikla isan-taona, amin'ny momba ny fanompoana ao an-tranon'Andriamanitra,

³⁴ ny mofo alahatra, ny fanatitra tsy tapaka, ny sorona dorana tsy tapaka, ny sorona amin'ny sabata, ny voaloham-bolana ary ny fety, ny zavatra masina, ny sorona noho ny ota, hanaovana ny fanonerana ho an'ny zanak'Israely, mbamin'izay rehetra fanao ao an-tranon'Andriamanitsika. ³⁵ Nanao filokana izahay mpisorona, levita, vahoaka, ny amin'ny hanaterana ny kitay hazo, mba samy hitondra izany ao an-tranon'Andriamanitsika, isam-pianakaviana araka ny anjara fotoany avy, amin'ny fotoana voaraikitra, isan-taona, mba harehitra eo ambonin'ny otelin'ny Tompo Andriamanitsika, araka ny voasoratra ao amin'ny lalàna.

³⁶ Nametra-teny izahay fa hanatitra ao an-tranon'ny Tompo isan-taona ny voaloham-bokatry ny taninay sy ny santatry ny voankazo rehetra avy amin'ny hazo mamoa rehetra, ³⁷ hitondra ho ao an-tranon'Andriamanitsika, amin'ny mpisorona manao ny fanompoana ao an-tranon'Andriamanitsika, ny lahimatoanay sy ny voalohan-teraky ny biby fiompinay, araka ny voasoratra ao amin'ny lalàna, ary ny voalohan-teraky ny omby aman'ondrinay. ³⁸ Toraka izany koa hanatitra ho an'ny mpisorona ao amin'ny efitrano, ao an-tranon'Andriamanitsika, ny santatry ny kobanay amam-panatitray voaavaka mbamin'ny voankazo avy amin'ny hazo rehetra, ny divay vaovao ary ny diloilo, ary hanolotra amin'ny levita ny ampahafolon'ny vokatry ny taninay; ary ny tenan'ny levita no haka ny ampahafolony any amin'ny tanàna rehetra fambolenay. ³⁹ Ny mpisorona taranak'i Aarona, hiaraka amin'ny levita, rahefa mandray ny fahafolony ny levita, ary ny ampahafolon'ny fahafolony dia haterin'ny levita ao an-tranon'Andriamanitra ao amin'ny efitrano fitehirizan-drakitra. ⁴⁰ Fa ao amin'ny efitrano no hanateran'ny zanak'Israely sy ny taranak'i Levì ny fanatitra avy amin'ny vary sy ny divay aman-diloilo; ao no misy ny fanaky ny fitoerana masina, sy itoeran'ny mpisorona manao ny fanompoana, mbamin'ny mpiandry varavarana sy ny mpihira, ka amin'izany tsy hataonay mosalahy ny amin'ny tranon'Andriamanitra.