Bokin'ny Ohabolana

Toko faha-11

1 Ny mizana mandainga, dia hankahalain'ny Tompo, fa ny lanja marina no ankasitrahany.

2 Raha tonga ny fiavonavonana, ho tonga koa ny fahafaham-baraka; fa ny fahendrena kosa miaraka amin'ny manetry tena.

3 Ny fahatsoran'ny olo-mahitsy fo mitari-dalana azy, fa ny fiolikoliky ny mpamadika kosa, mandringana azy.

4 Ny harena tsy mahasoa amin'ny andron'ny fahatezerana; fa ny fahamarinana no manafaka amin'ny fahafatesana.

5 Ny fahamarinan'ny marina, manitsy ny lalany, fa ny ratsy fanahy kosa lavo noho ny faharatsiany.

6 Ny fahamarinan'ny olo-mahitsy fo mamonjy azy; fa ny olona mpivadika kosa, voafandriky ny haratsiany.

7 Rahefa maty ny ratsy, foana ny fanantenany; ary levona ny fanantenan'ny mpanao ratsy.

8 Ny marina vonjena ho afa-pahoriana; fa ny ratsy fanahy no hilatsaka hisolo azy ao.

9 Ny tsy mivavaka manomana ny fandringanana ny namany, amin'ny vavany; fa ny marina dia hovonjena amin'ny fahaizana.

10 Mifaly ny tanana, raha sambatra ny marina; mihoby hafaliana ny olona, raha ringana ny ratsy fanahy.

11 Ny tso-dranon'ny olo-mahitsy fo no androsoan'ny tanana, fa ny vavan'ny ratsy fanahy mandrava azy.

12 Tsy ampy saina izay manamavo ny namany, fa ny manan-tsaina mangina.

13 Ny mpifosa manambara ny zavatra afenina; fa ny olona mahatoky kosa, mitana izany tsy hiseho.

14 Rava ny vahoaka tsy misy mpitondra; fa ny hamaroan'ny mpanolo-tsaina foto-pamonjena.

15 Izay miantoka olon-tsy fantany, ho tratry ny nenina; fa izay malain-kiantoka, dia handry fahizay.

16 Ny vehivavy mahafinaritra, mahazo voninahitra; ny lehilahy mahery fo, mahazo harena.

17 Ny olona antra namana, manao soa amin'ny fanahiny; fa ny olona loza be, mampahory ny nofony.

18 Ny ratsy fanahy manao lahasa manodoka, fa izay mamafy fahamarinana kosa dia efa azo antoka ny valiny.

19 Ny fahamarinana mahatonga amin'ny fiainana; fa izay manenjika ny haratsiana iharam-pahafatesana.

20 Halan'ny Tompo ny olona ratsy fo, fa izay tsy manan-tsiny amin'ny lalany dia ankasitrahany.

21 Eny tokoa tsy ho afa-tsazy ny ratsy fanahy, ary ny taranaky ny marina ho voavonjy.

22 Toy ny kavim-bolamena eo amin'ny oron-kisoa, ny vehivavy tsara tarehy tsy ampy saina.

23 Ny soa ihany no hany irin'ny marina; fa ny hotezerana kosa no andrasan'ny ratsy fanahy.

24 Ity mahafoy an-kazavam-po moa, mitombo harena; fa itsy fatra-pitsitsy kosa, vao mainka mahantra.

25 Ny fanahy manao soa, hohatavezina; ary izay manondraka dia hotondrahana koa.

26 Izay tsy mamoaka ny variny ozonin'ny vahoaka, fa ny lohan'izay mivarotra azy no idinan'ny tsodrano.

27 Izay mikatsaka ny tsara mahazo fanambinana, fa izay mitaky ny ratsy, ho tratry ny ratsy.

28 Ho lavo izay mitoky amin'ny harena, fa hitsimoka toy ny ravina kosa ny marina.

29 Izay manakorontana ny tranony, handova rivotra, ary izay adala, ho tonga mpanompon'ny olon-kendry.

30 Hazon'aina no vokatry ny marina; ary hendry izay mahazo ny fanahin'olona.

31 Raha ny marina aza, valiana sazy aty an-tany; mainka ny ratsy fanahy sy ny mpanota.

© Eugene Heriniaina - serasera.org 1999 - 2024 - page load 0.0515