Bokin'i Osea

Toko voalohany

1 Tenin'ny Tompo, tonga tamin'i Osea, zanak'i Beerì, tamin'ny andron'i Oziasa sy Joatama sy Akaza ary Ezekiasa, mpanjakan'i Jodà, sy tamin'ny andron'i Jeroboama, zanak'i Joasa, mpanjakan'Israely.

2 Tamin'ny niandohan'ny nitenenan'ny Tompo tamin'i Osea, izao no nolazain'ny Tompo tamin'i Osea: Mandehàna hianao, makà vady tena janga, aman-janaky ny fijangajangana, satria tsy misy ataon'ny tany hafa-tsy ny misaraka amam-bady amin'ny fandaozana an'ny Tompo.

3 Dia nandeha izy, naka an'i Gomera, zanakavavin'i Debelaïma, ary nanana anaka ravehivavy, ka nitera-dahy taminy. 4 Ary hoy Iaveh taminy: Ataovy hoe Jezrahely ny anarany, fa andro vitsy sisa, dia hovaliako ny taranak'i Jeho noho ny ra nalatsaka tao Jezrahely, ary hotaperiko ny fanjakan'ny taranak'Israely. 5 Amin'izany andro izany, hotapahiko, eo amin'ny tanilemaka Jezrahely, ny tsipìkan'Israely. 6 Ary nanana anaka indray ravehivavy ka nitera-bavy, dia hoy Iaveh tamin'i Osea: Ataovy hoe Lo-Rokhama no anarany, fa tsy hiantra intsony ny taranak'Israely aho ka hamela heloka azy. 7 Fa ny taranak'i Jodà no hiantrako; ary Iaveh Andriamaniny no hamonjeko azy ireo; fa tsy amin'ny tsipìka, na amin'ny sabatra, na amin'ny ady, na amin'ny soavaly, na amin'ny mpitaingin-tsoavaly no hamonjeko azy. 8 Nony notazany Lo-Rokhama, dia nanana anaka indray ravehivay, ka nitera-dahy. 9 Dia hoy Iaveh tamin'i Osea: Ataovy hoe Lô-Ammì no anarany, fa hianareo tsy vahoakako, ary izaho tsy ho Andriamanitrareo.

© Eugene Heriniaina - serasera.org 1999 - 2024 - page load 0.0802