Ny Salamo

Toko faha-75

1 Ho an'ny mpampianatra hira. Aza mandrava. Salamon'i Asafa. Fihirana.

2 Midera anao izahay, ry Andriamanitra, midera anao izahay; akaiky ny anaranao, mitory ny zava-mahagaga ataonao ny olona.

3 Rehefa tonga ny fotoana, hitsara marina aho,

4 mihozongozona ny tany mbamin'ny mponina rehetra eo aminy; izaho kosa dia mampiorina ny andriny. - SelĂ .

5 Hoy aho amin'ny mpirehareha: Aza mirehareha! ary amin'ny ratsy fanahy: Aza manangan-doha!

6 Aza avo fanangan-doha loatra, aza miteny an'avonavona be loatra!

7 Fa tsy avy any atsinanana, na avy any andrefana, na avy any an'efitry ny tendrombohitra!...

8 Tsia fa Andriamanitra no manao ny fitsarana: ny iray aetriny, ny iray asandrany.

9 Satria eo an-tanan'ny Tompo misy kapoaka, ka divay mandroatra miharo zava-manitra no ao. Dia aidiny izany: eny, hotsentsefiny ny faikan'izany, hisotro avokoa ny ratsy fanahy amin'ny tany.

10 Fa izaho kosa hitory izany mandrakizay, hihira fiderana ny Andriamanitr'i Jakoba aho.

11 Ary ny tandroky ny ratsy fanahy rehetra hotapahiko; fa ny tandroky ny marina kosa hasandratro.

© Eugene Heriniaina - serasera.org 1999 - 2024 - page load 0.1119