Bokin'i Tobia

Toko faha-8

¹ Nony vita ny sakafo, dia nentin'izy ireo ho ao amin'i Sarà razazalahy.

² Tsaroan'i Tobia ny tenin'ny anjely, ka nangalany ny ati-kazandrano tao an-kitapony, nataony teo ambony vain'afo. ³ Tamin'izay dia nosamborin'ny anjely Rafaela ilay demony ka nafatony tany an-efitr'i Ejipta ambony. ⁴ Ary Tobia kosa namporisika an-drazazavavy nanao taminy hoe: Mitsangàna, ry Sarà, aoka hivavaka amin'Andriamanitra isika anio sy ampitso ary rahafak'ampitso; Andriamanitra no hiraisantsika mandritra ireo andro telo ireo; rahefa afaka ny alina fahatelo dia ho velona ao amin'ny fanambadiantsika isika. ⁵ Fa zanaky ny olo-masina, ka tsy mahazo miray araka ny fanaon'ireo firenena tsy mahalala an'Andriamanitra. ⁶ Dia nitsangana izy ireo ka niara-nivavaka tamin-kafanam-po mba hanomezany azy ny fahasalamana. ⁷ Hoy Tobia: Ry Tompo Andriamanitry ny razanay, hisaotra anao anie ny tany aman-danitra, ny ranomasina, ny loharano sy ny ony, mbamin'ny zava-boahary rehetra ao aminy. ⁸ Hianao no nanao an'i Adama, tamin'ny fota-tany sy nanome an'i Eva ho vadiny. ⁹ Ary ankehitriny, ry Tompo, fantatrao fa tsy mba ny hanarana ny filan'ny nofoko no angalako an'ity anabaviko ity ho vadiko, fa noho ny faniriako ta-hamela taranaka izay hidera ny anaranao amin'ny taona rehetra ihany. ¹⁰ Ary hoy Sarà: Mamindrà fo aminay, Tompo ô, mamindra fo aminay, enga anie ka ho tratra antitra ho salama tsy marofy izahay roroa. ¹¹ Vao maneno akoho dia nasain-dRagoela tonga ny mpanompony ka niara-nandeha taminy hihady fasana ireo,

¹² fa hoy izy: mety hanjo an'io koa ny nanjo an'ireo fitolahy vadiny izay nandeha hanatona azy. ¹³ Nony vita ny fasana, niverina nankao amin'ny vavy Ragoela, nilaza taminy hoe: ¹⁴ Iraho ny iray amin'ny ankizivavinao, hizaha raha maty izy, mba handevenako azy alohan'ny vaky masoandro. ¹⁵ Dia naniraka ny iray amin'ny ankizivaviny Anna. Nony niditra tao amin'ilay efi-trano io, indreo ry zareo tsy maninon-tsy maninona samy matory avy. ¹⁶ Dia niverina izy, nilaza izany vaovao mahafaly izany. Dia nisaotra ny Tompo Ragoela sy Anna vadiny nanao hoe: ¹⁷ Misaotra anao izahay, ry Tompo Andriamanitr'Israely, fa tsy nihatra ny loza natahoranay. ¹⁸ Namindra fo taminay hianao, fa nampanalavirinao anay ny fahavalo manenjika anay. ¹⁹ Efa niantra ireo zanaka samy tokana hianao, ka ataovy mitombo fisaorana anao hatrany izy ireo, sy hanolotra sorom-piderana aminao noho ny niarovana azy, ary hahafantaran'ny firenena rehetra fa hianao irery no Andriamanitra amin'ny tany rehetra. ²⁰ Niaraka tamin'izay dia nasain-dRagoela nototofan'ny mpanompony alohan'ny vaky masoandro ilay fasana nataony.

²¹ Ary nilaza tamin'ny vavy izy hanomana fihinanam-be, sy hanomana ny zavatra rehetra ilain'ny mpivahiny, momba ny vatsiny. ²² Nampamono ombivavy roa matavy koa izy sy ondralahy efatra, hanaovana sakafo ho an'ny manodidina azy rehetra, mbamin'ny sakaizany rehetra. ²³ Ary niangavy mafy tamin'i Tobia Ragoela, mba hijanona eo aminy tapa-bolana. ²⁴ Nomen-dRagoela ho an'i Tobia ny antsasaky ny fananany rehetra, sady nandahatra an-tsoratra koa izy, fa rahefa maty izy ireo, ny antsasany sisa dia tsy maintsy ho lasan-ko fananan'i Tobia ihany koa.