Bokin'i Zakaria
Toko faha-7
1 Tamin'ny taona fahefatra nanjakan'i Dariosa, tonga tamin'i Zakaria ny tenin'ny Tompo, tamin'ny andro fahefatry ny volana fahasivy, volana Kasleo.2 Naniraka an'i Sarasara sy Rogommeleky mbamin'ny olony, ny tany Betela hitalaho amin'ny Tompo, 3 hiteny amin'ireo mpisorona ao an-tranon'ny Tompon'ny tafika mbamin'ireo mpaminany hoe: Tokony hitomany va aho, amin'ny volana fahadimy, sy hanao fifadian-kanina, toy ny efa nataoko hatramin'ny taona maro be? 4 Dia tonga tamiko ny tenin'ny Tompon'ny tafika nanao hoe: 5 Mitenena hianao amin'ny vahoaka rehetra amin'ny tany mbamin'ny mpisorona, ka lazao amin'izy ireo hoe: Raha nifady hanina sy nanao fisaonana hianareo, tamin'ny volana fahadimy sy fahafito, efa hatramin'ny fitopolo taona izay, moa ho avy va no nifadianareo hanina? 6 Ary raha mihinana sy misotro hianareo, moa tsy ny tenanareo va no mihinana sy misotro? 7 Moa tsy eo va ireo teny nolazain'ny Tompo tamin'ny vavan'ny mpaminany fahiny, fony mbola nonenana sy nandry fahizay Jerosalema, mbamin'ny zana-bohiny manodidina azy, sady mbola nonenana koa ny negeba sy ny sefelah? 8 Tonga tamin'i Zakaria ny tenin'ny Tompo, nanao hoe:
9 Izao no nolazain'ny Tompon'ny tafika: Manaova fitsarana marina; samia mamindra fo sy miantra ny namany avy, 10 aza mampahory ny mpitondra tena, na ny kamboty, na ny vahiny, na ny mahantra; ary aza misain-dratsy ao am-ponareo, hamelezana ny namanareo. 11 Tsy nety nihaino anefa izy ireo, fa nampiodina ny sorony sy nanamafy ny sofiny tsy hahare. 12 Nataony tonga toy ny diamondra ny fony tsy hihaino ny lalàna sy ny teny nampitondrain'ny Tompon'ny tafika azy ireo, nolazain'ny Fanahiny tamin'ny alàlan'ny mpaminany fahiny. Koa nisy fahatezerana mafy avy amin'ny Tompon'ny tafika. 13 Ka dia nisy toy izao: Toy ny niantsoany, fa tsy nohenoin'izy ireo; no hiantsoin'izy ireo koa, fa tsy hohenoiko izy ireo, hoy Iavehn'ny tafika. 14 Haeliko any amin'ny firenena rehetra tsy fantany izy ireo, ka ny tany eo aorian'izy ireo hipetraka foana, ary tsy hisy olona handalo na hiverina ao. Ilay tany mahafinaritra iny, ka nataony zary efitra.