Bokin'i Daniely

Toko faha-13

¹ Nisy lehilahy anankiray, atao hoe Joakima, nonina tao Babilona;

² nanambady vehivavy anankiray, atao hoe Sozana, zanakavavin'i Helkiasa, sady tsara tarehy tokoa, no natahotra an'Andriamanitra, ³ satria olo-marina rainy aman-dreniny, ka nampianatra ireo zanany, araka ny lalàn'i Moizy. ⁴ Mpanankarem-be io Joakima io, ary nanana zaridaina teo akaikin'ny tranony izy, ary be ny Jody mankao aminy, satria izy no manan-kaja indrindra tamin'izy rehetra ireo. ⁵ Tamin'izay taona izay, dia notendrena ho mpitsara ny loholona roa lahy tamin'ny vahoaka; ireo no nitenenan'ny Mpampianatra nataony hoe: Ireo anti-dahy, izay mpitsara ka toa mitondra ny vahoaka, no nivoahan'ny faharatsiana avy ao Babilona.

⁶ Ao an-tranon'i Joakima no falehan'izy ireo, ary ny olona rehetra manan'ady dia manatona azy. ⁷ Tokony ho amin'ny misasak'andro, rahefa lasa ny vahoaka, Sozana kosa niditra tao anatin'ny zaridain'ny lahy ka nitsangatsangana tao. ⁸ Hitan'ireto anti-dahy roa lahy izy, niditra sy nitsangatsangana ao isan'andro, ka velom-panirian-dratsy azy mafy izy ireo: ⁹ nosimbany ny sainy ary naviliny tsy hahita ny lanitra ny masony sy tsy hahatsiaro izay fitsarana marin'Andriamanitra. ¹⁵ Eo am-pikendrena izay fotoana mety indrindra izy ireo indro Sozana niditra tao anaty zaridaina toy ny nataony omaly sy afakomaly, tsy narahan'ny olona hafa-tsy ankizivavy roa, fa te-handro tao anaty zaridaina izy, satria nafana ny andro.

¹⁶ Tsy nisy olona tao, hafa-tsy iretsy anti-dahy niery sy nikendry azy. ¹⁷ Dia hoy razazavavy tamin'ireo ankizivavy: Itondray diloilo manitra sy menaka fanosorana aho; ary hidio ny vavahadin'ny zaridaina fa handro aho. ¹⁹ Vao lasa ireo ankizivavy, dia nitsangana izy roa lahy, nidodododo nankeo amin'i Sozana, ka nanao taminy hoe: ²⁰ Hitanao fa mihidy ny vavahadin'ny zaridaina, tsy misy mahita antsika, ary izahay mirehi-pitiavana anao; koe ekeo ny fanirianay, meteza mba ho anay. ²¹ Fa raha mandà kosa hianao dia hitsangan-ko vavolombelona miampanga anao izahay, hilaza fa nisy tovolahy anankiray nomba anao ka izany no namerenanao an'ireo ankizivavy. ²² Nisento Sozana ka nanao hoe: Latsaka an-katerena mafy aho avy hatraiza hatraiza: hanao izany moa aho, fahafatesana ho ahy izany; tsy hanao izany indray, tsy afa-mandositra ny tànanareo. ²³ Aleoko anefa tsy nanao ratsy azon'ny tànanareo; toy izay hanota eo anatrehan'ny Tompo. ²⁴ Dia niantso mafy izy; fa mba niantsoantso hamely azy koa, ireto anti-dahy; ²⁵ sady nihazakazaka namoha ny vavahadin'ny zaridaina ny iray amin'izy ireo. ²⁶ Vao nandre ny antsoantso avy any anaty saha ireo mpanompo tao an-trano, dia nidodododo niditra ny vavahady tao ivoho hizaha izay inona ao. ²⁷ Nony nilazalaza ny toe-draharaha ireto anti-dahy dia menatra mafy ireto mpanompo, fa tsy mbola nisy nilaza zavatra toy izany, ny amin'i Sozana, na iza na iza. ²⁸ Ny ampitson'iny, rahefa tafavory tao amin'i Joakima vadin'i Sozana ny vahoaka, dia tonga tao koa ireto anti-dahy roa lahy, efa feno hevi-dratsy hamelezana an-drazazavavy mba hahafaty azy.

²⁹ Hoy izy ireo teo anatrehan'ny vahoaka: Ampanalao Sozana, zanak'i Helkiasa sy vadin'i Joakima. Dia naniraka haka azy niaraka tamin'izay ny olona. ³⁰ Dia tonga razazavavy nomban'ny ray aman-dreniny sy ireo zanany lahy, ary ny havany rehetra. ³³ Fa ny fianakaviany rehetra mbamin'izay nahalala azy kosa, nandatsa-dranomaso avokoa. ³⁴ Dia nitsangana teo afovoan'ny vahoaka ireto anti-dahy roa lahy, nametra-tànana tamin'ny lohan-drazazavavy; ³⁵ izy kosa, sady nitomany no niandrandra ny lanitra, satria natoky ny Tompo izy. ³⁶ Ary hoy ireto anti-dahy: Raha nitsangatsangana tao anaty zaridaina izahay dia honjohonjonay ihany, indro izy niditra, narahin'ankizivavy roa; ka nasainy nohidiana ny vavahadin'ny zaridaina dia naveriny ireo ankizivavy roa ireo. ³⁷ Ary nisy tovolahy anankiray efa namitsaka tao, nanatona azy, dia nanao ratsy taminy. ³⁸ Tao anjoron'ny zaridaina izahay, fa rahefa nahita izany heloka izany dia niroatra nankeo amin'izy ireo, ka tratranay tamin'izany fahavetavetana izany izy. ³⁹ Tsy azonay nosamborina ilay tovolahy, fa matanjaka noho izahay, ka novohany ny vavahady dia nitsoaka izy. ⁴⁰ Razazavavy kosa, nony azonay, nanontanianay hoe: iza iny tovolahy iny, nefa tsy nety nilaza taminay izy. Izany no filazanay marina. ⁴¹ Nino izany ny be sy ny maro, satria anti-dahy ireo sady mpitsara ny vahoaka, ka dia noheloin'izy ireo ho faty razazavavy. ⁴² Tamin'izay Sozana niantso tamin'ny feo mahery nanao hoe: Ry Andriamanitra mandrakizay ô, hianao no mahalala ny miafina sy mahafantatra ny zavatra rehetra alohan'ny ahatongavany aza,

⁴³ fantatrao fa lainga no niampangan'izy ireo ahy, ary indro aho fa maty, nefa izay noforoniny an-kasomparana hamelezana ahy, tsy misy nataoko akory. ⁴⁴ Nohenoin'ny Tompo ny feony. ⁴⁵ Ary raha ilay nitondra azy hovonoina iny ny olona, Andriamanitra kosa nanaitra ny fanahy masin'ny zazalahy anankiray, atao hoe Daniely. ⁴⁶ Niantso tamin'ny feo avo io nanao hoe: Raha izaho dia afa-tsiny amin'ny ran'io vehivavy io. ⁴⁷ Niherika nankany aminy avokoa ny vahoaka, sady nanao taminy hoe: Inona no hevitr'izany teny lazainao izany? ⁴⁸ Dia nijoro tao afovoan'ny vahoaka Daniely, nilaza hoe: Hay va re adala toy izany hianareo, ry zanak'Israely, ka hampamono ny zanakavavin'Israely, nefa tsy mbola namototra na nikaroka izay marina hianareo? ⁴⁹ Miverena ho any amin'ny trano fitsarana, fa lainga no niampangana azy io. ⁵⁰ Dia niverina faingana ny vahoaka ary hoy ny loholona tamin'i Daniely: Avia, hiara-mipetraka aminay hianao, ary aposahy ny hevitra, fa efa nomen'Andriamanitra anao ny voninahitry ny fahanterana.

⁵¹ Ka hoy Daniely tamin'ny vahoaka: Saraho hifanalavitra izy roa lahy, fa hotsaraiko izy. ⁵² Nony tafasaraka izy ireo, nantsoin'i Daniely ny anankiray, dia hoy izy taminy: Ry olona nihantitra tamin'ny fanaovan-dratsy ô, indreo hifototra aminao ny fahotana nataonao izay ela izay; ⁵³ hianao efa namoaka fitsarana tsy marina, nanameloka ny tsy manan-tsiny, ary nandefa ny meloka; nefa hoy ny Tompo hoe: Aza mampamono ny tsy manan-tsiny sy ny marina. ⁵⁴ Ka raha nahita an-drazazavavy ary hianao, dia lazao hoe: teo ambany hazo inona no niresaka izy ireo? Hoy ny navaliny hoe: Teo ambany lentisika. ⁵⁵ Dia hoy Daniely: Izany tokoa fa lainga lazainao izany hahafaty anao, fa vonon-kanataka anao hisasaka ny anjelin'Andriamanitra, izay efa nahazo teny tamin'Andriamanitra sahady. ⁵⁶ Nony nampihataka an'io izy, nasainy hampidirina indray ilay anankiray, ka hoy izy taminy: Ry taranak'i Kanaana, fa tsy mba taranak'i Jodà ô, sodokan'ny hatsaran-tarehim-behivavy hianao; ary voasimban'ny filan-dratsy ny fonao. ⁵⁷ Izany no nataonareo tamin'ny zanakavavin'Israely; ary izy ireo, noho ny tahony anareo, dia niresaka taminareo; fa ity zanakavavin'i Jodà kosa tsy mba nety nandefitra izay faharatsianareo akory. ⁵⁸ Koa mba lazao amiko ankehitriny hoe: teo ambany hazo inona moa no tratranao niresaka izy ireo? Hoy izy: Teo ambany oaka.