Evanjely Masin'i Jesoa-kristy Nosoratan'i Md. Lioka

Toko faha-19

¹⁰ fa ny hitady sy hamonjy ny very no nahatongavan'ny Zanak'olona. ¹¹ Raha mbola nihaino izany ny olona dia nanao ity fanoharana ity koa Jesoa, fa efa akaikin'i Jerosalema izy, ary nataon'ny olona fa ny fanjakan'Andriamanitra hiseho miaraka amin'izay,

¹² ka hoy izy: Nisy andriandahy anankiray nankany an-tany lavitra mba handray fanjakana, dia mbola hiverina. ¹³ Dia niantso folo lahy tamin'ny mpanompony izy ka nanome azy mina folo ary nanao taminy hoe: Ampitomboy ireny mandra-piveriko. ¹⁴ Fa nankahala azy kosa ny vahoaka iray tanin-drazana aminy ka nampitondra teny nanaraka azy nanao hoe: Tsy tianay hanjaka aminay iny lehilahy iny. ¹⁵ Nony nahazo fanjakana izy ka tafaverina, dia nampaka ny mpanompo nomeny vola mba hahitany izay tombony azony avy. ¹⁶ Dia tonga ny voalohany ka nanao hoe: Tompoko, nahazoana mina folo ny mina iray.

¹⁷ Ary hoy izy taminy: Tsara izany, ry mpanompo tsara, noho hianao nahatoky tamin'ny kely, dia hanapaka tanàna folo hianao. ¹⁸ Dia tonga koa ny faharoa ka nanao hoe: Tompoko, nahazoana mina dimy ny mina iray. ¹⁹ Ary hoy izy taminy: Hanapaka tanàna dimy koa hianao. ²⁰ Fa tonga kosa ny anankiray ka nanao hoe: Tompoko, indro ny minanao, fa notahiriziko tao anaty lamba; ²¹ satria natahotra anao aho, noho hianao lehilahy sarotiny ka maka izay tsy napetrakao, sy mijinja izay tsy nafafinao. ²² Dia hoy ilay mpanjaka taminy: Azoko amin'ny vavanao hianao, ry mpanompo ratsy fanahy; fantatrao fa olona sarotiny aho ka maka izay tsy napetrako ary mijinja izay tsy nafafiko; ²³ koa nahoana àry no tsy napetrakao tany amin'ny banky ny volako mba handraisako azy mban-janany rahefa tafaverina aho? ²⁴ Dia izao no nataony tamin'izay teo: Alao ny minany eny aminy ka omeo ilay manana folo. ²⁵ Fa hoy ireo taminy: Tompoko, efa manana mina folo izy. ²⁶ Lazaiko aminareo fa izay manana no homena; fa izay tsy manana kosa dia halaina mbamin'izay ananany aza. ²⁷ Ary ireo fahavaloko tsy nety hanjakako ireo kosa dia ento atý, ka vonoy eto anatrehako. ²⁸ Rahefa niteny izany Jesoa, dia nandeha nialoha hiakatra any Jerosalema,

²⁹ ka nony mby akaikin'i Betfage sy Betania anilan'ny tendrombohitra Oliva izy, dia naniraka ny mpianany roa lahy, ³⁰ nanao hoe: Mankanesa amin'itsy vohitra aloha itsy, fa rahefa miditra ao hianareo dia hahita zanak'ampondra mifatotra tsy mbola nitaingenan'olona, ka vahao izy, dia ento atý. ³¹ Ary raha misy manontany anareo hoe: Nahoana io no vahanareo? valio hoe: Misy ilàn'ny Tompo azy. ³² Dia lasa ireo iraka ka nahita ny zavatra araka ny voalazan'i Jesoa taminy. ³³ Teo am-pamahana ny zanak'ampondra dia hoy ny tompony tamin'izy ireo: Nahoana no vahanareo ity zanak'ampondra? ³⁴ Ka novaliany hoe: Misy ilàn'ny Tompo azy. ³⁵ Dia nentiny tany amin'i Jesoa ny zanak'ampondra, ka nataony teo amboniny ny fitafiany, dia natainginy teo Jesoa. ³⁶ Nony nandroso izy, dia novelaran'ny olona ny fitafiany ny làlana. ³⁷ Ary rahefa mby akaikin'ny fidinana amin'ny tendrombohitra Oliva izy, dia nientan-kafaliana ny mpianany maro be ka nankalaza an'Andriamanitra tamin'ny feo mahery, noho ny fahagagana rehetra hitany. ³⁸ Hankalazaina anie, hoy izy ireo, ny Mpanjaka avy amin'ny anaran'ny Tompo! Fiadanana anie any an-danitra, ary voninahitra anie amin'ny avo indrindra! ³⁹ Ary ny Farisiana sasany izay teo amin'ny vahoaka nanao taminy hoe: Ry Mpampianatra ô, rarao re ny mpianatrao! ⁴⁰ Fa novaliany hoe: Lazaiko aminareo fa raha mangina ireo, dia hiantsoantso ny vato. ⁴¹ Ary nony mby akaiky izy ka nahita an'i Jerosalema dia nitomany azy nanao hoe:

⁴² Raha izay kosa mantsy hianao no mba nahalala izay hampiadana anao, na dia amin'ity andro nomena anao ity ihany aza! Fa takona ny masonao izany ankehitriny. ⁴³ Ka ho avy aminao ny andro hanaovan'ny fahavalonao hady manodidina anao; hosaronany hianao sy hotereny hatraiza hatraiza, ⁴⁴ ary hofongorany hatramin'ny tany mbamin'ny zanakao eo anatinao ka tsy havelany hisy vato mifanongoa eo aminao, satria tsy nahalala ny andro namangiana anao hianao. ⁴⁵ Nony niditra tao an-tempoly izy, dia nandroaka ny mpivarotra sy ny mpividy tao,

⁴⁶ ka nanao taminy hoe: Efa voasoratra, fa ny tranoko dia trano fivavahana, nefa hianareo kosa nanao azy ho zohin'ny mpangalatra. ⁴⁷ Dia nampianatra isan'andro tao an-tempoly izy; fa ny lehiben'ny mpisorona sy mpanora-dalàna ary ny loholona kosa nitady hahafaty azy; ⁴⁸ nefa tsy hitan'izy ireo izay hevitra hoenti-manao izany, satria faly sy ravo nihaino azy ny vahoaka rehetra.

Toko faha-20

¹ Ary indray andro tamin'izany, nampianatra ny vahoaka tao an-tempoly izy ka nitory ny Evanjely, dia tonga ny lehiben'ny mpisorona sy mpanora-dalàna mbamin'ny loholona,

² ka nanao taminy hoe: Lazao anay: Inona moa no fahefana anaovanao izao zavatra izao, ary iza no nanome anao izany fahefana izany? ³ Ary namaly Jesoa ka nanao tamin'izy ireo hoe: Mba hanontany zavatra anankiray aminareo koa àry aho ka valio: ⁴ Avy aiza moa ny batemin'i Joany, avy amin'Andriamanitra sa avy amin'ny olona? ⁵ Dia niara-nisaina izy ireo nanao hoe: Raha izao mantsy no lazaintsika hoe, avy amin'Andriamanitra, dia hovaliany hoe: nahoana àry hianareo no tsy nino azy? ⁶ Ary raha hataontsika hoe, avy amin'ny olona indray, dia hitora-bato antsika ny vahoaka, satria inoany ho mpaminany Joany. ⁷ Koa namaly izy ireo, fa tsy fantany izay nihaviany. ⁸ Dia hoy Jesoa taminy: Izaho koa tsy hilaza aminareo izay fahefana anaovako izao zavatra izao. ⁹ Dia nilaza ity fanoharana ity tamin'ny vahoaka izy nanao hoe: Nisy lehilahy anankiray namboly tanimboaloboka ka nahofany tamin'ny mpiasa, dia lasa izy ka nitoetra ela tany an-tany hafa.

¹⁰ Nony tonga ny taom-pahavokarana dia naniraka mpanompo anankiray tany amin'ny mpiasa izy, mba haka amin'ny vokatry ny tanimboalobony; nefa nokapohin'izy ireo sy nampodiny maina. ¹¹ Dia naniraka mpanompo anankiray hafa indray izy, fa nokapohin'ireo ihany koa sady notevatevainy sy nampodiny maina.