Evanjely Masin'i Jesoa-kristy Nosoratan'i Md. Lioka

Toko faha-21

¹⁵ fa izaho ihany no hanome vava anareo, sy fahendrena tsy ho azon'ny fahavalonareo toherina na lavina velively. ¹⁶ Na ny ray aman-dreny sy ny rahalahinareo aza, mbamin'ny havana aman-tsakaizanareo dia hanolotra anareo koa, ka hovonoiny ny maro aminareo, ¹⁷ ary ho halan'ny olona rehetra hianareo noho ny anarako; ¹⁸ nefa tsy hisy ho very na dia singam-bolo iray amin'ny lohanareo aza. ¹⁹ Ny faharetanareo no hamonjenareo ny tenanareo. ²⁰ Ary rahefa hitanareo voahodidin'ny miaramila Jerosalema, dia fantaro amin'izany fa efa antomotra ny fandravana azy, ²¹ ka amin'izany, izay any Jodea aoka handositra any an-tendrombohitra, izay ao an-tanàna aoka hivoaka any ivelany, ary izay any an-tsaha aoka tsy hiditra ao an-tanàna intsony, ²² satria izany andro izany no ho andro famaizana sy hahatanterahan'izay rehetra voasoratra. ²³ Loza ho an'ny bevohoka sy ny mitaiza kely amin'izany andro izany, fa ho lehibe tokoa ny fahoriana eto an-tany, ary ho mafy ny hatezeran'Andriamanitra amin'ity firenena ity: ²⁴ haringana amin'ny lela sabatra izy, sy ho lasan-ko babo any amin'ny firenena rehetra, ary hohitsakitsahin'ny jentily Jerosalema mandra-pahafenon'ny andron'ny jentily. ²⁵ Hisy famantarana koa eny amin'ny masoandro sy ny volana ary ny kintana, ary etý an-tany dia ho ory sy very hevitra ny firenena noho ny fikotrokotroky ny ranomasina sy ny onjany;

²⁶ ho ankona foana ny olona noho ny fahatahorany sy ny fiandrasany izay loza hanjo an'izao tontolo izao, fa hihozongozona ny herin'ny lanitra. ²⁷ Dia ho hita amin'izay ny Zanak'olona avy any ambonin'ny rahona amim-pahefana sy voninahitra lehibe. ²⁸ Raha vao miantomboka izany zavatra izany, dia miandrandrà ka asandrato ny lohanareo, fa efa akaiky ny fanavotana anareo. ²⁹ Ary izy nanao fanoharana taminy hoe: Jereo ny aviavy sy ny hazo rehetra: ³⁰ raha vao hitanareo fa manaroka izy, dia fantatrareo fa akaiky ny fahavaratra. ³¹ Toy izany koa raha vao hitanareo fa tonga izany zavatra izany, dia fantaro fa akaiky ny fanjakan'Andriamanitra. ³² Lazaiko marina aminareo fa tsy ho lany ity taranaka ity ambara-pahatongan'izany rehetra izany. ³³ Ho levona ny lanitra sy ny tany, fa ny teniko tsy mba ho levona. ³⁴ Tandremo àry fandrao vesaran'ny fihinanan-doatra sy ny fimamoana ary ny fiahiana izao fiainana izao ny fonareo, ka tratrany tonga tampoka aminareo anie izany andro izany e!

³⁵ Fa ho sahala amin'ny fandrika hahavoa ny olona rehetra mitoetra eto ambonin'ny tany izany. ³⁶ Koa miambena àry, ary mivavaha mandrakariva mba ho mendrika ho afaka amin'izany loza rehetra tsy maintsy tonga izany hianareo, ka hitsangana hiseho eo anatrehan'ny Zanak'olona. ³⁷ Tamin'ny antoandro no nampianatra tao an-tempoly Jesoa, fa nony avy ao dia lasa nivoaka nandritra ny alina tany amin'ny tendrombohitra Oliva.

³⁸ Ary vao marainakoa dia nanatona azy tao an-tempoly ny vahoaka rehetra mba hihaino azy.

Toko faha-22

¹ Efa mby akaiky ny fetin'ny Azima atao hoe Paka,

² ary ny lohandohan'ny mpisorona sy ny mpanora-dalàna dia nikaroka izay hevitra hamonoana an'i Jesoa, fa natahotra ny vahoaka izy ireo. ³ Nidiran'i Satana kosa Jodasy, ilay atao hoe Iskariota, anisan'ny roa ambin'ny folo lahy, ⁴ ka lasa izy nankany amin'ny lohandohan'ny mpisorona sy ny manam-pahefana niraharaha ny amin'izay hanolorany azy amin'izy ireo. ⁵ Dia faly izy ireo ka nanaiky hanome vola azy. ⁶ Ary nanaiky izy ka nikendry izay fotoana tsy hisy olona hanolorany azy. ⁷ Dia tonga ny andron'ny Azima izay tsy maintsy hamonoana ny zanak'ondrin'ny Paka,

⁸ ka naniraka an'i Piera sy Joany Jesoa nanao hoe: Mandehana manamboatra ny Paka hohanintsika. ⁹ Aiza no tianao hanamboaranay azy? hoy ireo. ¹⁰ Dia hoy izy taminy: Indro, rahefa miditra ao an-tanàna hianareo, dia hifanena amin'ny lehilahy ananakiray mitondra siny feno rano, ka manaraha azy any amin'izay trano hidirany, ¹¹ dia lazao amin'ny tompon-trano hoe: Izao no asain'ny Mpampianatra lazaina aminao: Aiza ny efi-trano hihinanako ny Paka miaraka amin'ny mpianatro? ¹² Dia hotoroany efi-trano malalaka àry fanaka hianareo, ka ao no amboary izay ilaina. ¹³ Dia nandeha izy ireo ka nahita araka izay nolazainy taminy, ary nanamboatra ny Paka. ¹⁴ Nony tonga ny fotoana, dia nipetraka hihinana izy sy ny Apostoly roa ambin'ny folo lahy. ¹⁵ Ary hoy izy tamin'izy ireo: Naniry dia naniry hiara-mihinana ity Paka ity aminareo aho alohan'ny hijaliako,

¹⁶ fa lazaiko aminareo fa tsy mba hihinana azy intsony aho mandra-pahatanterany any amin'ny fanjakan'Andriamanitra. ¹⁷ Dia nandray kalisy izy ka nisaotra, ary nanao hoe: Raiso ity, ka zarao aminareo; ¹⁸ fa lazaiko aminareo fa hatramin'izao dia tsy hisotro ny vokatry ny voaloboka intsony aho mandra-pahatongan'ny fanjakan'Andriamanitra. ¹⁹ Rahefa izany, dia nandray mofo izy, ka nony efa nisaotra dia namaky azy, sy nanome azy ireo nanao hoe: Ity no vatako, izay atolotra ho anareo; manaova izany ho fahatsiarovana ahy. ²⁰ Dia nataony toy izany koa ny kalisy rahefa avy nihinana, ka hoy izy: Ity kalisy ity no fanekena vaovao amin'ny rako, izay alatsaka ho anareo. ²¹ Kanefa indro ny tànan'izay mamadika ahy efa mby eto amiko eto ambony latabatra. ²² Raha ny Zanak'olona, dia mandeha araka ny lahatra; fa loza ho an'izay lehilahy hamadika azy. ²³ Dia nifanontany ny mpianatra hoe iza re no dia hahavita izany amin'izy ireo. ²⁴ Ary velona koa ny ady hevitra tamin'izy ireo, momba ny hahalalany izay lehibe indrindra amin'izy ireo,

²⁵ ka hoy Jesoa taminy: Amin'ny jentily ny mpanjaka no mizaka azy rehetra, ary izay mandidy azy no atao hoe mpanao soa; ²⁶ fa aminareo kosa tsy mba toy izany, fa aoka izay lehibe aminareo no ho toy ny zandry, ary izay mandidy no ho toy ny mpanompo.